ডিব্ৰুগড়ৰ ছেইণ্ট জেভিয়াৰছ স্কুলৰ ছাত্ৰ-ছাত্ৰীৰ মাজত বিনামূলীয়াকৈ মহানিমৰ পুলি বিতৰণ: সাত হাজাৰ পুলি ৰোপণৰ লক্ষ্য
এম হাছিম আলী,ৰঙিলী বাৰ্ত্তাসেৱা- বিশ্ব পৰিৱেশ দিৱসৰ লগত সংগতি ৰাখি ষ্টে ফিট্ যোগা চেণ্টাৰৰ উদ্যোগত ডিব্ৰুগড়ৰ ছেইণ্ট জেভিয়াৰছ স্কুলৰ ছাত্ৰ-ছাত্ৰীৰ মাজত বিনামূলীয়াকৈ মহানিমৰ পুলি বিতৰণ কৰা হয়। বিশ্ব পৰিৱেশ দিৱসৰ দিনাৰে পৰা আজিলৈকে প্ৰায় ১৬০০ মহানিমৰ পুলি ৰোপণ কৰা হয়। মহানিমৰ পুলি ৰোপণৰ ধাৰাবাহিকতা ৰক্ষা কৰি আৰু প্ৰায় ৭০০০ (সাত হাজাৰ) পুলি ৰোপণৰ কাৰ্যসূচী আৰম্ভ কৰি ডিব্ৰুগড়ৰ ছেইণ্ট জেভিয়াৰছ স্কুলৰ ছাত্ৰ-ছাত্ৰীৰ মাজত আজি ৮০০ (আঠ) শ পুলি বিতৰণ কৰা হয়। অনুষ্ঠানত বিদ্যালয়ৰ প্ৰধান ৰাহুল মুন্দাই মহানিমৰ উপকাৰিতাৰ কথা উল্লেখ কৰে আৰু ষ্টে ফিট্ যোগা চেণ্টাৰৰ সঞ্চালকক তেওঁৰ এই কামৰ শলাগ লয় । মহানিমকে ৰোপণৰ বাবে কিয় বাছি লোৱা হ’ল তাৰ উত্তৰত ষ্টে ফিট্ যোগা চেণ্টাৰৰ সঞ্চালক জগদীশ ভৰালীয়ে কয় যে মহানিম হ’ল এক মহৌষধ গছ । ইয়াৰ উপকাৰিতাৰ বিষয়ে কৈ শেষ কৰিব নোৱাৰি। বৰ্তমান জলবায়ুৰ পৰিৱৰ্তন ঘটিছে সেয়ে আমি প্ৰত্যেকেই এজোপা মহানিমৰ পুলি ৰোপণ আৰু প্ৰতিপালন কৰা অতিকৈ জৰুৰী । আমি প্ৰত্যেকেই যদি এজোপাকৈ মহানিম ৰোপণ আৰু প্ৰতিপালন কৰো তেতিয়াহে আমি পৰিৱেশ সংৰক্ষণ কৰিব পাৰিম । জলবায়ুৰ পৰিৱৰ্তনৰ বাবে বিভিন্ন প্ৰাকৃতিক দুৰ্যোগ হ’বলৈ ধৰিছে। শিৱসাগৰত যি বানপানীৰ সৃষ্টি হ’ল সেয়াও জলবায়ুৰ পৰিৱৰ্তনৰেই ফল । যোগ প্ৰশিক্ষক জগদীশ ভৰালী কয় যে আমি যোগৰ জৰিয়তে সুস্থ থকাৰ লগতে সুখাদ্য ও যিদৰে প্ৰয়োজনীয়, ঠিক সেইদৰে আমাৰ চৌপাশৰ পৰিবেশও আমাৰ দৈনন্দিন জীৱনত বহুত প্ৰভাৱ আছে। সেয়ে আমি প্ৰত্যেকেই এজোপা কৈ মহানিম পুলি ৰোপণ আৰু প্ৰতিপালন কৰি এক সুন্দৰ প্ৰাকৃতিক পৰিৱেশৰ সৃষ্টি কৰোঁহক।