ডিব্ৰুগড়ত বীৰ লাচিত সেনাৰ সংবাদমেল:সাংগঠনিক বিবাদ পালেগৈ আদালতৰ মজিয়া: শৃংখল চলিহাক সংবিধান অধ্যয়ন কৰাৰ আহ্বান
এম হাছিম আলী,ৰঙিলী বাৰ্ত্তাসেৱা- অসমৰ খিলঞ্জীয়া জনসাধাৰণৰ স্বাভিমান আৰু সুৰক্ষা ৰক্ষাৰ লগতে মহাবীৰ লাচিত বৰফুকনৰ আদৰ্শৰে পৰিচালিত লাচিত সেনা অসমৰ সাংগঠনিক স্থিতি, নেতৃত্ব আৰু বিত্তীয় হিচাপ-পত্ৰক লৈ মতানৈক্যই গুৰুত্ব লাভ কৰিছে। অৱশেষত বীৰ লাচিত সেনা, অসমৰ আভ্যন্তৰীণ সাংগঠনিক বিবাদে এইবাৰ আদালতৰ মজিয়া পোৱাৰ পিছতে বিষয়টোৱে বিশেষ চৰ্চা লাভ কৰিছে। সংগঠনটোৰ নেতৃত্ব, সভাপতি পদৰ বৈধতা, সাংগঠনিক নীতি-নিয়ম পালন আৰু প্ৰতিদ্বন্দ্বী সাধাৰণ সভা আহ্বানক কেন্দ্ৰ কৰি সৃষ্টি হোৱা বিবাদৰ সন্দৰ্ভত বৃহত্তৰ ডিব্ৰুগড় প্ৰেছ ক্লাৱত এখন সংবাদমেল অনুষ্ঠিত হয়। সংবাদমেলত সংগঠনটোৰ সভাপতি হেমন্ত বড়াই নিজৰ পক্ষৰ বক্তব্য দাঙি ধৰাৰ লগতে আদালতৰ দ্বাৰস্থ হোৱা আৰু পৰৱৰ্তী আইনী প্ৰক্ৰিয়াৰ বিষয়ে অৱগত কৰে। সংবাদমেলত প্ৰকাশ কৰা তথ্য অনুসৰি, বীৰ লাচিত সেনাৰ সাংগঠনিক বিষয়ক লৈ দীৰ্ঘদিন ধৰি চলি থকা মতানৈক্যই পৰৱৰ্তী সময়ত গুৰুতৰ ৰূপ ধাৰণ কৰে। সংগঠনটোৰ নেতৃত্ব আৰু সাংগঠনিক সিদ্ধান্ত গ্ৰহণৰ প্ৰক্ৰিয়াক লৈ সৃষ্টি হোৱা এই বিবাদৰ মাজতে সভাপতি হেমন্ত বড়াৰ পক্ষই আদালতৰ কাষ চাপে। এই সন্দৰ্ভত গুৱাহাটী আদালতত Title Suit No. 774/2026 আৰু Misc. (J) Case No. 1310/2026 নম্বৰৰ গোচৰ দাখিল কৰাৰ কথা জানিবলৈ দিয়ে৷ হেমন্ত বড়াই প্ৰকাশ কৰামতে, ১৬ অক্টোবৰত আদালতে গোচৰটোৰ সন্দৰ্ভত এক অন্তৱৰ্তীকালীন নিৰ্দেশ জাৰি কৰে। এই নিৰ্দেশক কেন্দ্ৰ কৰিয়েই এতিয়া সংগঠনটোৰ আভ্যন্তৰীণ বিবাদে নতুন মোৰ লৈছে। বিশেষকৈ ২ নৱেম্বৰত আহ্বান কৰা এখন প্ৰতিদ্বন্দ্বী সাধাৰণ সভাক লৈ আদালতে প্ৰদান কৰা নিৰ্দেশে বিষয়টোক অধিক গুৰুত্বপূৰ্ণ কৰি তুলিছে। সংবাদমেলত উল্লেখ কৰা অনুসৰি, ২ নৱেম্বৰত আহ্বান কৰা প্ৰতিদ্বন্দ্বী সাধাৰণ সভা অনুষ্ঠিত কৰাৰ ক্ষেত্ৰত আদালতে প্ৰতিপক্ষক বিৰত থাকিবলৈ অন্তৱৰ্তীকালীন নিষেধাজ্ঞা জাৰি কৰিছে বুলি হেমন্ত বড়াৰ পক্ষই দাবী কৰিছে। লগতে, এই নিষেধাজ্ঞা কিয় বাহাল ৰখা নহ’ব, সেই সন্দৰ্ভত প্ৰতিপক্ষক কাৰণ দৰ্শোৱাৰ জাননী জাৰি কৰা হৈছে বুলিও জানিবলৈ দিয়ে৷ এই নিৰ্দেশৰ পৰিপ্ৰেক্ষিতত সংগঠনটোৰ সাংগঠনিক বিবাদৰ আইনী দিশটো এতিয়া বিশেষভাৱে গুৰুত্ব লাভ কৰিছে। অৱশ্যে, আদালতৰ অন্তৱৰ্তীকালীন নিৰ্দেশ আৰু গোচৰটোৰ চূড়ান্ত সিদ্ধান্তৰ মাজত পাৰ্থক্য আছে। সেয়েহে, এই পৰ্যায়ত আদালতে প্ৰদান কৰা নিৰ্দেশৰ পৰিসৰ আৰু পৰৱৰ্তী শুনানিত গ্ৰহণ কৰিবলগীয়া সিদ্ধান্তই বিষয়টোৰ ভৱিষ্যৎ গতিপথ নিৰ্ধাৰণ কৰিব। গোচৰটোৰ পৰৱৰ্তী শুনানিৰ দিন ১০ নৱেম্বৰত ধাৰ্য কৰা হৈছে বুলি হেমন্ত বড়াৰ পক্ষই সদৰি কৰে৷ সেইদিনা আদালতত উত্থাপিত বিষয়সমূহৰ ভিত্তিত পৰৱৰ্তী আইনী পদক্ষেপৰ বিষয়ে অধিক স্পষ্টতা লাভ কৰাৰ সম্ভাৱনা আছে। সংবাদমেলত প্ৰকাশ কৰা অনুসৰি, ২০২১ চনৰ ৬ জানুৱাৰীত অনুষ্ঠিত বীৰ লাচিত সেনাৰ কেন্দ্ৰীয় সাধাৰণ সভাত হেমন্ত বড়াক সংগঠনটোৰ কেন্দ্ৰীয় সভাপতি হিচাপে নিৰ্বাচিত কৰা হৈছিল। সেই নিৰ্বাচনৰ ভিত্তিত তেওঁ সংগঠনটোৰ সভাপতিৰ দায়িত্ব পালন কৰি আহিছিল। কিন্তু পৰৱৰ্তী সময়ত সংগঠনটোৰ আভ্যন্তৰীণ কাম-কাজ, বিত্তীয় হিচাপ-নিকাচ, কেইবাখনো গ্ৰন্থ প্ৰকাশ,গুৰুত্বপূৰ্ণ নথি-পত্ৰ আদিৰ তথ্য সভাপতি হেমন্ত বড়াই প্ৰধান সচিব ৰন্টু পানী ফুকনক দাখিল কৰিবলৈ পত্ৰ দিয়াৰ পাছতেই মতানৈক্যৰ সৃষ্টি হোৱা বুলি উল্লেখ কৰে৷ এই মতানৈক্যই ক্ৰমাৎ নেতৃত্বকেন্দ্ৰিক বিবাদৰ ৰূপ লয় আৰু সংগঠনটোৰ ভিতৰত দুটা পৃথক পক্ষৰ মাজত সংঘাতৰ পৰিৱেশ সৃষ্টি হয় বুলি হেমন্ত বড়াৰ পক্ষই অভিযোগ কৰিছে। এই হিচাপ বিচৰাৰ পাছতেই সংবিধান উলংঘন কৰি স্বয়ং সভাপতি গৰাকীকে বহিস্কাৰ কৰা বুলি বিবৃতি দিয়া বুলি উল্লেখ কৰে।সংগঠনৰ দৰে এটা সামাজিক -জাতীয়তা বাদী মঞ্চত নেতৃত্ব নিৰ্বাচন, পদবীধাৰীৰ দায়িত্ব, বিত্তীয় স্বচ্ছতা আৰু সাংগঠনিক সিদ্ধান্ত গ্ৰহণৰ প্ৰক্ৰিয়া সংবিধান অনুসৰি পৰিচালিত হোৱাটো অত্যন্ত গুৰুত্বপূৰ্ণ। এই বিষয়সমূহক লৈ যদি মতানৈক্যৰ সৃষ্টি হয়, তেন্তে সংগঠনৰ ভিতৰত প্ৰচলিত বিধি-বিধান আৰু নিৰ্ধাৰিত পদ্ধতি অনুসৰিয়েই তাৰ সমাধান কৰা উচিত বুলি হেমন্ত বড়াৰ পক্ষই নিজৰ বক্তব্যত গুৰুত্ব আৰোপ কৰিছে। সংবাদমেলত ২০২৬ চনৰ ২১ ছেপ্টেম্বৰৰ এটা ঘটনাৰ বিষয়েও উল্লেখ কৰা হৈছে। সংগঠনটোৰ কেন্দ্ৰীয় প্ৰধান সম্পাদক ৰন্টু পানী ফুকনে এখন স্থায়ী পৰিষদৰ বৈঠকৰ জৰিয়তে হেমন্ত বড়াক সভাপতি পদৰ পৰা অপসাৰণ কৰা বুলি প্ৰচাৰ চলোৱা হৈছিল। এই পদক্ষেপক হেমন্ত বড়াৰ পক্ষই অসাংবিধানিক আৰু সংগঠনটোৰ প্ৰচলিত নীতি-নিয়মৰ পৰিপন্থী বুলি অভিহিত কৰিছে। তেওঁলোকৰ মতে, কোনো পদবীধাৰীৰ বিৰুদ্ধে সাংগঠনিক ব্যৱস্থা গ্ৰহণ কৰা বা নেতৃত্বৰ পৰিৱৰ্তন ঘটোৱাৰ ক্ষেত্ৰত সংগঠনৰ সংবিধানত নিৰ্ধাৰিত বিধি-বিধান আৰু প্ৰক্ৰিয়া অনুসৰণ কৰাটো বাধ্যতামূলক। সভাপতি পদৰ পৰা অপসাৰণৰ দাবী আৰু ইয়াৰ বৈধতাক লৈ সৃষ্টি হোৱা মতানৈক্যই সংগঠনটোৰ আভ্যন্তৰীণ বিবাদক অধিক জটিল কৰি তুলিছে বুলি হেমন্ত বড়াৰ পক্ষৰ বক্তব্যৰ পৰা স্পষ্ট হয়। এই বিষয়টোৰ সৈতে জড়িত বিভিন্ন সাংগঠনিক সিদ্ধান্তৰ বৈধতা আৰু তাৰ প্ৰক্ৰিয়াগত দিশসমূহ পৰৱৰ্তী সময়ত আইনী বিচাৰ- বিবেচনাৰ বিষয় হ’ব পাৰে। এই উদ্দেশ্যে বৃহত্তৰ ডিব্ৰুগড় প্ৰেছ ক্লাৱত অনুষ্ঠিত সংবাদমেলত সংগঠনটোৰ সাংবিধানিক ব্যৱস্থা, নীতি -নিয়ম আৰু সাংগঠনিক শৃংখলা অক্ষুণ্ণ ৰখাৰ প্ৰয়োজনীয়তাৰ ওপৰতো গুৰুত্ব আৰোপ কৰা হয়। আনহাতে শংখল চলিহাইয়ো সংবিধান উলংঘন নকৰি সম্পূৰ্ণ অবৈধ ভাৱে ৰণ্টু পানী ফুকনৰ পক্ষ লোৱা কাৰ্য আৰু অবৈধ ভাবে বিভিন্ন জনক সংগঠনৰ বিষয়বাব প্ৰদান কৰা সন্দৰ্ভত প্ৰতিক্ৰিয়া প্ৰকাশ কৰে।সংগঠনটোৰ সকলো সদস্য, বিষয়ববীয়া আৰু সমৰ্থকক সাংগঠনিক বিষয়সমূহৰ ক্ষেত্ৰত সংবিধানসন্মত পদ্ধতি অনুসৰণ কৰিবলৈ আহ্বান জনাইছে৷ হেমন্ত বড়াৰ পক্ষৰ মতে, কোনো সংগঠনৰ নেতৃত্ব আৰু সাংগঠনিক সিদ্ধান্তৰ ক্ষেত্ৰত ব্যক্তিগত মতানৈক্যতকৈ সংবিধান আৰু নিৰ্ধাৰিত বিধি-বিধানক অগ্ৰাধিকাৰ দিয়াটো প্ৰয়োজনীয়। সংগঠনটোৰ ভিতৰত সৃষ্টি হোৱা বিবাদৰ সমাধানৰ বাবে আইনসন্মত আৰু সাংগঠনিকভাৱে স্বীকৃত পদ্ধতি অনুসৰণ কৰিলেহে স্থায়ী সমাধানৰ পথ মুকলি হ’ব পাৰে। বীৰ লাচিত সেনাৰ এই সাংগঠনিক বিবাদৰ পৰৱৰ্তী গতিপথ এতিয়া আদালতৰ শুনানিৰ ওপৰত নিৰ্ভৰ কৰিছে। ২ নৱেম্বৰত আহ্বান কৰা প্ৰতিদ্বন্দ্বী সাধাৰণ সভাক লৈ প্ৰদান কৰা অন্তৱৰ্তীকালীন নিৰ্দেশৰ লগতে সভাপতি পদৰ বৈধতা আৰু সংগঠনৰ সাংগঠনিক সিদ্ধান্তসমূহক লৈ উত্থাপিত প্ৰশ্নসমূহে আগন্তুক দিনত অধিক গুৰুত্ব লাভ কৰাৰ সম্ভাৱনা আছে। সংবাদমেলত মোহিনী মোহন লিগিৰা, প্ৰাণজিত গগৈ আদিকে ধৰি কেইবাগৰাকীও ব্যক্তি উপস্থিত থাকে।