এক আলোকপাত
দেৰগাঁৱৰ অসম আৰক্ষীৰ অশ্বাৰোহণ শিক্ষা কেন্দ্ৰ
শংকৰ দেৱ, দেৰগাঁও
ঐতিহ্যমণ্ডিত দেৰগাঁৱৰ পুৰণি অসম আৰক্ষী প্ৰশিক্ষণ মহাবিদ্যালয় (পিটিচি) তথা বৰ্তমানৰ লাচিত বৰফুকন পুলিচ একাডেমী হৈছে অসম আৰক্ষীৰ অন্যতম প্ৰধান প্ৰশিক্ষণ প্ৰতিষ্ঠান। ইয়াত আৰক্ষী জোৱান আৰু বিষয়া সকলক বিভিন্ন ধৰণৰ প্ৰশিক্ষণ প্ৰদান কৰা হয়। বৰ্তমানৰ লাচিত বৰফুকন পুলিচ একাডেমী খন এক অত্যাধুনিক সা-সুবিধাৰে সজ্জিত আৰু ইয়াত বিৰতি নোহোৱাকৈ ৰাজ্যিক তথা কেন্দ্ৰীয় পৰ্যায়ৰ আৰক্ষীৰ প্ৰশিক্ষণ চলিয়েই থাকে। দেৰগাঁৱৰ এই অসম আৰক্ষীৰ প্ৰশিক্ষণ ব্যৱস্থাৰ এক অন্যতম গুৰুত্বপূর্ণ অংশ হিচাপে লাচিত বৰফুকন পুলিচ একাডেমীৰ অধীনত থকা দেৰগাঁৱৰ অশ্বাৰোহণ শিক্ষা কেন্দ্ৰই অতীতৰ পৰাই এক বিশেষ স্থান অধিকাৰ কৰি আহিছে। এই কেন্দ্ৰটো কেৱল প্ৰশিক্ষণৰ ক্ষেত্ৰ বুলি ক’লেই নহ’ব, ই হৈছে অসম আৰক্ষী বাহিনীৰ ঐতিহ্য, শৃংখলা আৰু পেছাগত দক্ষতাৰ এক জীৱন্ত প্ৰতীক।
ঐতিহাসিকভাৱে লক্ষ্য কৰিবলগীয়া যে এই অশ্বাৰোহণ আৰক্ষী ব্যৱস্থা অসম তথা ভাৰতীয় আৰক্ষীৰ এক প্ৰাচীন আৰু বিশ্বাসযোগ্য অংশ। আজিৰ এই আধুনিক যুগত উন্নত যানবাহন ব্যৱহাৰ হ’লেও, বহু ক্ষেত্ৰত ঘোঁৰা বাহিনী এতিয়াও অত্যন্ত প্ৰয়োজনীয়। বিশেষকৈ জনসমাগম নিয়ন্ত্ৰণ, সংকীৰ্ণ পথ বা দূৰ্গম এলেকাত অভিযান চলোৱা আৰু বিশেষ অনুষ্ঠানত শোভাযাত্ৰাৰ নেতৃত্ব দিয়া আদি ক্ষেত্ৰত অশ্বাৰোহী আৰক্ষীৰ কাৰ্যক্ষমতা এতিয়াও অক্ষুণ্ণ হৈ আছে।
এই শিক্ষা কেন্দ্ৰত প্ৰশিক্ষণ প্ৰণালী যথেষ্ট সুসংগঠিত আৰু বৈজ্ঞানিক পদ্ধতিত গঢ়ি তোলা হয়। নতুনকৈ যোগদান কৰা আৰক্ষী সকলক প্ৰশিক্ষণৰ ক্ৰমিক নিয়মাৱলীৰ মাজেৰে অশ্বাৰোহণৰ প্ৰশিক্ষণো দিয়া হয়—প্ৰথমতে ঘোঁৰাৰ সৈতে পৰিচয়, তাৰ পিছত মৌলিক নিয়ন্ত্ৰণ কৌশল, আৰু শেষত উন্নত স্তৰৰ পেৰেড আৰু অপাৰেচনেল ব্যৱহাৰ। ইয়াৰ লগতে শাৰীৰিক ব্যায়াম, সাম্যতা ৰক্ষা, দ্ৰুত সিদ্ধান্ত লোৱা ক্ষমতা আদি দক্ষতাৰো বিকাশ ঘটোৱা হয়। ঘোঁৰাৰ যত্ন (Horse Management) এই কেন্দ্ৰৰ এক অত্যন্ত গুৰুত্বপূর্ণ দিশ। প্ৰশিক্ষণৰত জোৱান সকলক শিকোৱা হয় কেনেদৰে ঘোঁৰাক সুস্থ কৰি ৰাখিব লাগে—যেনে উপযুক্ত খাদ্য, নিয়মীয়া স্বাস্থ্য পৰীক্ষা, পৰিষ্কাৰ-পৰিচ্ছন্নতা আৰু বিশ্ৰামৰ ব্যৱস্থা। এই জ্ঞানৰ জৰিয়তে আৰক্ষীসকল ঘোঁৰাৰ সৈতে এক বিশ্বাসযোগ্য সম্পৰ্ক গঢ়ি তুলিবলৈ সক্ষম হয়, যি অশ্বাৰোহণত সফলতাৰ মূল আধাৰ। ইয়াৰ উপৰি, এই কেন্দ্ৰই আৰক্ষী বাহিনীৰ মাজত একতা, শৃংখলা আৰু নেতৃত্বৰ গুণ বিকাশত সহায় কৰে। অশ্বাৰোহণৰ দৰে চ্যালেঞ্জিং প্ৰশিক্ষণে জোৱানসকলক মানসিকভাৱে দৃঢ় কৰি তোলে আৰু যিকোনো জটিল পৰিস্থিতিতো শান্তচিত্তে কাম কৰাৰ ক্ষমতা প্ৰদান কৰে।
আন এক উল্লেখযোগ্য দিশ হৈছে যে এই কেন্দ্ৰৰ সামাজিক আৰু সাংস্কৃতিক অৱদান। ৰাজ্যৰ বিভিন্ন উৎসৱ, যেনে বিহু উদযাপন, গণতান্ত্ৰিক শোভাযাত্ৰা আৰু চৰকাৰী অনুষ্ঠানসমূহত অশ্বাৰোহী আৰক্ষীৰ উপস্থিতি জনতাৰ মাজত আকৰ্ষণ সৃষ্টি কৰে। ই একে সময়তে আৰক্ষীৰ সন্মান বৃদ্ধি কৰাৰ লগতে জনসাধাৰণৰ সৈতে সম্পৰ্কও সুদৃঢ় কৰে।
সামগ্ৰিকভাৱে ক’বলৈ গেলে, দেৰগাঁৱৰ অসম আৰক্ষীৰ অশ্বাৰোহণ শিক্ষা কেন্দ্ৰটো হৈছে এক আধুনিক আৰু ঐতিহ্যসমৃদ্ধ প্ৰশিক্ষণ ক্ষেত্ৰ, যিয়ে আৰক্ষী বাহিনীৰ দক্ষতা উন্নত কৰাৰ লগতে ৰাজ্যৰ গৌৰৱ বৃদ্ধি কৰি আহিছে। দেৰগাঁৱত আৰক্ষীৰ বাবে এই প্ৰশিক্ষণৰ সুবিধা থকাৰ লগতে, অসমত অশ্বাৰোহণ খেলৰ প্ৰসাৰৰ বাবে “ইকুৱেষ্ট্ৰিয়ান ফেডাৰেচন অৱ আছাম” (EFA) আৰু ডিব্ৰুগড়ৰ বৰবাৰী অশ্বাৰোহণ কেন্দ্ৰও সক্ৰিয় হৈ আছে। এই ক্ষেত্ৰত সময় সাপেক্ষে বহু আৰক্ষী বিষয়াই অশ্বাৰোহী প্ৰতিযোগিতাত অংশগ্ৰহণ কৰি ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত বিভিন্ন বঁটা লাভ কৰি দেশলৈ সুনাম কঢ়িয়াই অনাত বিশেষভাৱে সফল হোৱা দেখা পোৱা গৈছে। ভৱিষ্যত দিনতো এই কেন্দ্ৰই অধিক উন্নত প্ৰযুক্তি আৰু প্ৰশিক্ষণ পদ্ধতি গ্ৰহণ কৰি অসম আৰক্ষীক আৰু অধিক শক্তিশালী কৰি তুলিব বুলি আশা কৰা যায়।