ইয়াত এখন গাঁও আছিল
ৰুমী কলিতা দত্ত
২নং কেন্দুগুৰি,ডিব্ৰু
উজাগৰী নিশাৰ কান্দোন নুশুনাকৈ
ইয়াত এখন গাঁও আছিল,
সপোনৰ হেঙুলীয়া আভাৰে ৰঙীন হৈ ।
আছিল হাঁহি, ধেমালি
আৰু খেতিয়কৰ সপোনৰ ধাননি
কিন্তু হঠাৎ আহিল বলীয়া বান পাহাৰ সদৃশ
কালৰূপী দানৱৰ দৰে।
উটুৱাই নিলে সকলো
পকনীয়াত পৰি হেৰুৱা জীৱন
কেৱল চকুলো আৰু বেদনা বাকী।
ভগা পঁজা, বোকাময় পথাৰ
আৰু মৃত পশুধনৰ মৃতদেহ,
এয়াই এতিয়া গাঁৱৰ ছবি
নিষ্ঠুৰ বাস্তৱৰ কৰুণ দৃশ্য।
উজাগৰী নিশাৰ কান্দোন
আৰু সহায়ৰ বাবে কৰা কাতৰ অনুৰোধ
কোন আহিব সহায়ৰ বাবে
নে এইদৰেই জীয়াই থাকিব লাগিব
বেদনাৰ চকুলো বোৱাই
এইয়াই হৈছে কলি যুগৰ প্ৰলয় ।