আবেলিৰ গান
শুৱলা দাস
যোৰহাট
আবেলিৰ নদীখনৰ পাৰত
নিৰলে বহি শুনিছানে কতিয়াবা ?
শুনিবাচোন
এমুকোৰা হাঁহিৰ খলকনিৰ সিপাৰে
চকুপানীৰ ধাৰাৰে বৈ থকা
এটি মৌন জুৰিৰ ঝিৰঝিৰণি ।
হৃদয় সৰোবৰৰ পৰা উঁহ ফালি ওলাই
অহা যেন বেদনাৰ ঘন জলৰাশি!
যদি শুনা নাই,
শুনিবাচোন
জনঅৰণ্যঘণ গভীৰ কোলাহলৰ
সিপাৰে মৌনতাত কঁপি থকা
এযোৰ ওঁঠৰ
নিসংগতাৰ মৃদু জোকাৰণি!
যদি দেখা নাই , চাবাচোন
থাকি যোৱা আশাৰ
জী উঠা হেপাহৰ
নতুন গজালি !
পূব আৰু পশ্চিম আকাশত কিবাকৈ মকামিলা কৰা
সুৰুজৰ ম্ৰিয়মাণ বুজাবুজি !
বুজিছানে কতিয়াবা ? যদি বুজা নাই
বুজিবাচোন
কোনো নাহে বুলি জনাৰ পিছতো
নঙলামুখত অপেক্ষাৰত
গধূলি গোপাল জোপাৰ
বেজেৰুৱা আশাৰ মুখৰিত পদূলি !
এৰা ! সকলো সময়ৰে কথা
অন্তহীন নিৰৱচ্ছিন্ন সময়ৰ সোঁতত
নিৰবে নিমাতে গৈ থকা বৈ থকা নদীৰ
বুকুত লৈ ফুৰা ভৰা জাঁজৰি।
বুকুত লৈ ফুৰা ভৰা জাঁজৰি।