দশম শ্ৰেণীৰ শিক্ষাৰ্থীৰ বাবে ‘প্ৰেৰণা’ আঁচনিৰ শুভাৰম্ভণি মুখ্যমন্ত্ৰীৰ
ৰঙিলী বাৰ্ত্তাসেৱা- অসম ৰাজ্যিক বিদ্যালয় শিক্ষা পৰিষদৰ অন্তৰ্গত হাইস্কুল শিক্ষান্ত পৰীক্ষা আৰু আদৰ্শ বিদ্যালয়ৰ চি বি এছ ইৰ দশম শ্ৰেণীৰ পৰীক্ষাত অৱতীৰ্ণ হ’বলগীয়া শিক্ষাৰ্থীৰ বাবে ‘প্ৰেৰণা’ নামৰ আঁচনিৰ শুভাৰম্ভ ।শুকুৰবাৰে গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ প্ৰেক্ষাগৃহত আয়োজিত এক অনুষ্ঠানত মুখ্যমন্ত্ৰী ড০ হিমন্ত বিশ্ব শৰ্মাই এই প্ৰেৰণা আঁচনিখনৰ শুভাৰম্ভ কৰে । শিক্ষার্থীসকলক অধ্যয়ন সামগ্রী, কিতাপ, পুষ্টিকৰ খাদ্য আদি ক্ৰয় কৰাৰ ক্ষেত্ৰত সহায়ৰ লগতে তেওঁলোকৰ আত্মবিশ্বাস, মানসিক স্বাস্থ্য-মনোবল বৃদ্ধি, দৰিদ্ৰ পৰিয়াল-গ্রামাঞ্চলৰ শিক্ষাৰ্থীৰ মাজত বিদ্যালয় ত্যাগৰ প্ৰৱণতা হ্রাস, হাইস্কুল তথা দশম শ্ৰেণীৰ শিক্ষান্ত পৰীক্ষাত সামগ্রিকভাৱে উত্তীৰ্ণৰ হাৰ বৃদ্ধি, চৰকাৰী-প্রাদেশীকৃত-আদর্শ বিদ্যালয়সমূহত নামভর্তি বঢ়াৰ লক্ষ্যৰে ৰাজ্যত প্ৰথমবাৰৰ বাবে এই আঁচনিখন গ্ৰহণ কৰা হৈছে। এই আঁচনিখনৰ অধীনত ৪.৪০ লাখ শিক্ষার্থীয়ে চলিত নৱেম্বৰৰ পৰা চাৰি মাহলৈ মাহিলি ৩০০ টকাকৈ জলপানি নিজ বেংক একাউণ্টযোগে লাভ কৰিব। ‘প্ৰেৰণা’ৰ শুভাৰম্ভ কৰি অনুষ্ঠানত দিয়া ভাষণত মুখ্যমন্ত্রী ড° শৰ্মাই কয় যে নেতিবাচক চিন্তাই যাতে কেতিয়াও স্থান পাব নোৱাৰে তাৰ বাবে ৰাজ্য চৰকাৰে নতুন প্ৰজন্মক বিভিন্ন ধৰণে প্ৰেৰণা যোগোৱাৰ প্ৰয়াস চলাই আহিছে। আজি শুভাৰম্ভ হোৱা আঁচনিখন এইক্ষেত্রত অন্যতম প্রভাৱী পদক্ষেপ। আর্থিক দুৰৱস্থা যাতে শিক্ষাগ্রহণত বাধা হ’ব নোৱাৰে, তাৰ বাবে ৰাজ্য চৰকাৰে নতুন শিক্ষানুষ্ঠান স্থাপন কৰি নৱপ্ৰজন্মক শিক্ষা লাভৰ সুবিধা দিয়াৰ সমান্তৰালভাৱে নতুন নতুন আঁচনিও গ্ৰহণ কৰিছে। ৰাজ্যৰ কেইবাখনো শিক্ষানুষ্ঠানৰ ছাত্ৰ-ছাত্ৰী উপস্থিত থকা অনুষ্ঠানটোত অসমৰ পৰিৱেশ ক্রমান্বয়ে সলনি হৈছে বুলি তেওঁ মন্তব্য কৰে। আঁচনিখনৰ উদ্দেশ্য ব্যাখ্যা কৰি মুখ্যমন্ত্ৰীয়ে কয়, আমি সকলোৱে জানো, অসমত বহু দুখীয়া ছাত্ৰ-ছাত্ৰী আছে, যিসকলে পৰীক্ষাৰ আগমুহূৰ্ত পুষ্টিকৰ খাদ্য খোৱাৰ বাবে আৰ্থিক পৰিবেশ নাথাকে । কিতাপ এখন কিনিব খুজিলে, কাগজ-বহী কিনিব খুজিলে সুবিধা নাথাকে । আৰু কোনোবা এজন শিক্ষৰ ওচৰলৈ গৈ কিবা শিকিবলৈ ইচ্ছা থাকিলেও পৰিবহণ খৰচ নাথাকে । এই জালপানিটো পোৱাৰ লগে লগে ছাত্ৰ-ছাত্ৰীসকলৰ মাজত বিশেষকৈ দুখীয়া ছাত্ৰ-ছাত্ৰীসকলৰ মাজত এটা আত্মবিশ্বাস আহিব যে নিশ্চিতভাবে চৰকাৰে আমাক বিনামূলীয়া নামভৰ্তি, নিযুত মইনা আঁচনিও দিব আৰু এখন আত্মবিশ্বাসী অসমৰ অধিকাৰী হ’ম । অসমৰ শিক্ষার্থী সমাজ উপকৃত হ’ব পৰাকৈ নৱম শ্ৰেণীৰ ছাত্ৰীসকলক চাইকেল প্রদান, বিনামূলীয়া নামভৰ্তি, কন্যা সন্তানৰ উচ্চ শিক্ষাগ্রহণৰ সুবিধার্থে নিযুত মইনা আঁচনিৰ জৰিয়তে প্রতিমাহে এহেজাৰ টকাৰ পৰা ২,৫০০ টকালৈকে ধনৰাশি দিয়াৰ দৰে ৰাজ্য চৰকাৰে গ্ৰহণ কৰা বিভিন্ন পদক্ষেপৰ বিষয়ে ভাষণ প্রসংগত তেওঁ উল্লেখ কৰে। লগতে নৱম শ্ৰেণীৰ দৰে পঞ্চম শ্রেণীতো চাইকেল প্রদানৰ বিষয়ে ৰাজ্য চৰকাৰে চিন্তা-চৰ্চা কৰাৰ কথা উল্লেখ কৰি মুখ্যমন্ত্রী ড° শৰ্মাই কয় যে এই পদক্ষেপে শিক্ষার্থীসকলক শিক্ষাগ্রহণত যথেষ্ট সহায় কৰিব। নিজ ভাষণত জাতিৰ পিতা মহাত্মা গান্ধীৰ এটা উক্তিৰ উদ্ধৃতি দাঙি ধৰি মুখ্যমন্ত্ৰী ড° শৰ্মাৰ ভাষ্য- শিক্ষা হৈছে সমাজত সমতা অনাৰ এটা পথ। যেতিয়া শিক্ষাই সমতা অনা কথাটো এগৰাকী শিক্ষার্থীয়ে বুজি পায়, তেতিয়া তেওঁৰ মনত আশাৰ বন্তি জ্বলে। সেই আশাৰ বস্তিগছি সমাজত যাতে জুলিব পাৰে আৰু নৱপ্ৰজন্মৰ প্ৰত্যেকে যাতে জীৱনত আশাৰ ৰেঙনি লাভ কৰে, তাৰ বাবে ৰাজ্য চৰকাৰে প্ৰচেষ্টা কৰিছে। স্বচ্ছ প্ৰক্ৰিয়াৰে ডেৰ লাখ যুৱক-যুৱতীক চাকৰি প্ৰদানৰ সমান্তৰালকৈ অসমত এক ঔদ্যোগিক পৰিৱেশ নিৰ্মাণৰ বাবেও পদক্ষেপ গ্ৰহণ কৰিছে ৰাজ্য চৰকাৰে।অনুষ্ঠানত মুখ্যমন্ত্রী ড° শৰ্মাই অসম ৰাজ্যিক বিদ্যালয় শিক্ষা পৰিষদৰ অধীনত হাইস্কুল আৰু আদর্শ বিদ্যালয়সমূহত অধ্যয়নৰত চিবিএছইৰ দশম শ্ৰেণীৰ শিক্ষান্ত পৰীক্ষাৰ্থীসকলক শুভেচ্ছা জ্ঞাপন কৰি পৰীক্ষাভীতিত আক্ৰান্ত নহ’বলৈ পৰামৰ্শ আগবঢ়ায়। তেওঁ কয় যে শিক্ষার্থীসকলৰ বাবে পৰীক্ষা হৈছে জীৱনৰ পৰৱৰ্তী খোজলৈ আগুৱাই যোৱাৰ মাধ্যমহে। পৰীক্ষাৰ্থীসকলে এখন অধ্যয়নসূচী প্ৰস্তুত কৰি পাঠসমূহ নিয়মীয়াকৈ অধ্যয়ন কৰাটো জৰুৰী। এনে পৰিকল্পিত অধ্যায়ৰ পৰীক্ষাক লৈ সৃষ্টি হোৱা উদ্বিগ্নতাও যথেষ্ট হ্রাস কৰে। তেওঁ লগতে প্রধানমন্ত্রী নৰেন্দ্ৰ মোদীৰ ‘পৰীক্ষা পে’ চর্চা’ শীর্ষক অনুষ্ঠানটো চাবলৈ শিক্ষার্থীসকলক আহ্বান জনায়। অনুষ্ঠানত শিক্ষামন্ত্রী ডাঃ ৰণোজ পেণ্ড, সাংসদ দিলীপ শইকীয়া, বিজুলী কলিতা মেধি, শিক্ষা বিভাগৰ সচিব এছ এন চৌধুৰী, বিত্ত বিভাগৰ সচিব পিএন সম্ভাজী, কামৰূপ (মহানগৰ) জিলাৰ আয়ুক্ত সুমিত সত্তাৱান, মাধ্যমিক শিক্ষা বিভাগৰ সঞ্চালক মমতা হোজাইকে ধৰি কেইবাজনো শীর্ষ বিষয়া আৰু বিশিষ্ট ব্যক্তি উপস্থিত আছিল।