ৰূপৱতী তাই
কালৰাত্ৰী কোনোবা নৰপিশাচে পিন্ধোৱা
লেতেৰা সাজযোৰ তাই খুলি পেলালে
কম্পমান বুকুত সাহসৰ খুটি পুতি
চকুত জ্বলাই তোলে এক নৱ জ্যোতি
নতুন দিনৰ নতুন পোছাক পিন্ধি
তাই আজি ৰূপৱতী
সহ্য নকৰে অত্যাচাৰ আৰু দুনাই
অন্যায়ৰ বিৰুদ্ধে যুঁজিব সদায়
নিজৰ লগতে আনকো নিব আগুৱাই
এই পণ ল’লে তাই বুকু ফিন্দাই !
কল্পনাৰ ফুলনিত
ফুল ফুলাৰ সপোন দেখি
খোজ দিছে দিঠকলে
খোজে খোজে নৱ লয়লাস
অভিনৱ ছন্দ বিকাশ
ভোহাৰি- বিদাৰি- ফালি পুৰণি কালিমা
সাহসৰ আভৰণ গাত ল’লে সানি
ঝংকাৰ তুলি সুপ্ত বীণাৰ সুৰ
দিশে দিশে উৰাই বিপ্লৱৰ জয় গান
জীয়াতে মৰা
দলিতা শোষিতা নাথাকিবা বহি
সাহসৰ বাঘজৰী লোৱা মেৰিয়াই
নৰ পিশাচ বোৰক নিঃশেষ কৰি
জ্বলাওঁ আহা নৱ প্রভাতৰ জ্যোতি
নহ’বা অবলা
সবলা হৈ সাহসেৰে নিজে নিজক বচোৱা !
ইভা গন্ধীয়া ফুকন