আজিৰ সমাজত তোমাৰ প্ৰয়োজন
ৰুমী কলিতা দত্ত
২ নং কেন্দুগুৰি,ডিব্ৰুগড়
কলিকালৰ জটিল সন্ধিক্ষণত
পাপ আৰু অন্যায়ৰ ভৰত
আহিবানে প্ৰভু পুনৰ ধৰালৈ
মৰতৰ দুখ-কষ্ট হৰি নিবলৈ ?
দ্বাপৰৰ সেই পৱিত্ৰ নিশাত
দেখা দিছিলা যিদৰে
আজিও ধৰাৰ মানুহে কান্দে
শান্তি আৰু সত্যৰ আশাতে ।
ঠগ-প্ৰৱঞ্চনা, আৰু অহংকাৰে
গ্রাস কৰা এই বৰ্তমানত
তোমাৰ লীলাই দেখুৱাওক বাট
সকলো অন্ধকাৰৰ মাজত।
অত্যাচাৰৰ কংস প্ৰতিজন মানুহৰ
অন্তৰত বাস কৰে,
তোমাৰ ভক্তিৰ পোহৰ পৰিলেহে
সেই কংসৰ অন্ত পৰে।
আজিৰ সমাজতো প্রয়োজন
কালীয় নাগৰ বিষ দমনৰ
শোষণ আৰু অবিচাৰৰ বিৰুদ্ধে
সত্য প্ৰতিষ্ঠা কৰাৰ।
প্ৰকৃতিৰ দুর্যোগ আৰু সংকটত লাগে
তোমাৰ অভয় ছাঁ
গোৱৰ্ধন ধাৰণ কৰাৰ দৰে
ৰক্ষা কৰা ধৰাৰ প্ৰাণৰ-বা ।
আধুনিক জীৱনৰ ব্যস্ততা
আৰু মোহ-মায়াৰ ৰণংগনত
আমাকেও শুনোৱা প্ৰভু
গীতাৰ সেই অমৰ উপদেশ অন্তৰত।
অৰ্জুনৰ দৰে মোহগ্রস্ত মনক দিয়া
সঠিক পথৰ দিশ
সত্য, প্ৰেম আৰু ধৰ্মৰ বাটেৰে
দূৰ কৰা প্ৰতিটো অহংকাৰৰ বিষ ।
হে কৃষ্ণ, এই জন্মাষ্টমীত
তোমাৰ চৰণত জনাইছোঁ প্ৰণিপাত
মানৱতাৰ জয় হওক,
দূৰ হওক কলুষিত মানসিকতাৰ ঘাট ।
বৰ্তমানৰ এই ধুমুহাতো বাঁহীৰ সুৰেৰে
আনা শান্তিৰ সুবাস
প্ৰতিজন হৃদয়ত জাগি উঠক প্ৰভূ
তোমাৰ লীলাৰ অপাৰ বিশ্বাস।