অসম ডন বস্ক’ বিশ্ববিদ্যালয়ত ICMASTS-2026ৰ শুভাৰম্ভ
উদ্বোধনী অধিৱেশনে দুদিনীয়া আন্তঃৰাষ্ট্ৰীয় সন্মিলনৰ আনুষ্ঠানিক শুভাৰম্ভ কৰে
গুৱাহাটী,ৰঙিলী বাৰ্ত্তাসেৱা- অসম ডন বস্ক’ বিশ্ববিদ্যালয়ৰ গণিত বিভাগৰ উদ্যোগত আয়োজিত গণিত আৰু বিজ্ঞান, প্ৰযুক্তি তথা সমাজত ইয়াৰ প্ৰয়োগ সম্পৰ্কীয় দ্বিতীয় আন্তঃৰাষ্ট্ৰীয় সন্মিলন (ICMASTS-2026) ৫ নৱেম্বৰ, ২০২৬ তাৰিখে বিশ্ববিদ্যালয়ৰ সোণাপুৰৰ টাপেছিয়া গাৰ্ডেনছস্থিত একাডেমিক ব্লক–১ৰ প্ৰেক্ষাগৃহত আনুষ্ঠানিকভাৱে উদ্বোধন কৰা হয়। পুৱা ৮:৫৪ বজাত আৰম্ভ হোৱা উদ্বোধনী অধিৱেশনে দুদিনীয়া এই সন্মিলনৰ শুভাৰম্ভ কৰে।
ড° ৰিচা দেৱ দোৱাৰাই আঁত ধৰা অধিৱেশনত বিশিষ্ট অতিথি, আমন্ত্ৰিত বক্তা, শিক্ষক-শিক্ষয়িত্ৰী, প্ৰতিনিধি আৰু অংশগ্ৰহণকাৰীসকলক আদৰণি জনোৱা হয়। জ্ঞান আৰু প্ৰজ্ঞাৰ পোহৰৰ প্ৰতীক হিচাপে মাংগলিক বন্তি প্ৰজ্বলনেৰে অনুষ্ঠানৰ আৰম্ভণি হয়। ইয়াৰ পিছতে সমবেতভাৱে ৰাজ্যিক সংগীত পৰিৱেশন কৰা হয় আৰু উপস্থিত বিশিষ্ট ব্যক্তিসকলক সম্বৰ্ধনা জনোৱা হয়।
অনুষ্ঠানত উপস্থিত থকা বিশিষ্ট ব্যক্তিসকলৰ ভিতৰত আছিল অসম ডন বস্ক’ বিশ্ববিদ্যালয়ৰ উপাচাৰ্য ৰেভাৰেণ্ড ফাদাৰ (ড°) জোছ পেলেলি, সন্মিলনৰ অধ্যক্ষ অধ্যাপক হেমেন ভৰালী, ICMASTS-2026ৰ আহ্বায়ক ড° ফকৰুল এ. মজুমদাৰভূঞা, মূল বক্তা অধ্যাপক ভূপেন ডেকা আৰু জ্যেষ্ঠ অধ্যাপক অধ্যাপক তাৰিণী কুমাৰ দত্ত।
সন্মিলনৰ অধ্যক্ষ অধ্যাপক হেমেন ভৰালীয়ে আদৰণি ভাষণ প্ৰদান কৰে। ইয়াৰ পিছত সন্মিলনৰ আহ্বায়ক ড° ফকৰুল এ. মজুমদাৰভূঞাই ICMASTS-2026ৰ বিষয়ে চমু পৰিচয় দাঙি ধৰি ইয়াৰ লক্ষ্য আৰু উদ্দেশ্যসমূহ ব্যাখ্যা কৰে। মূল বক্তা অধ্যাপক ভূপেন ডেকাই উপস্থিতসকলক শুভেচ্ছা জ্ঞাপন কৰে। তাৰ পিছত অধ্যাপক তাৰিণী কুমাৰ দত্তই বিশেষ ভাষণ প্ৰদান কৰে।
বিশ্ববিদ্যালয়ৰ উপাচাৰ্য ৰেভাৰেণ্ড ফাদাৰ (ড°) জোছ পেলেলিয়ে উদ্বোধনী ভাষণ প্ৰদান কৰি সন্মিলনখন আনুষ্ঠানিকভাৱে উদ্বোধন কৰে আৰু সন্মিলনৰ কাৰ্যসূচী মুকলি ঘোষণা কৰে। ড° সুজিত তালুকদাৰে শলাগৰ শৰাই আগবঢ়াই বিশিষ্ট অতিথি, আমন্ত্ৰিত বক্তা, আয়োজক আৰু সন্মিলনখনৰ সফল শুভাৰম্ভত অৰিহণা যোগোৱা সকলোকে ধন্যবাদ জ্ঞাপন কৰে। ৰাষ্ট্ৰীয় সংগীত পৰিৱেশনেৰে অধিৱেশনৰ সামৰণি পৰে।
উদ্বোধনী অধিৱেশনখনে অংশগ্ৰহণকাৰীসকলক আদৰণি জনোৱাৰ লগতে ICMASTS-2026ৰ শৈক্ষিক আলোচনা আৰু পৰৱৰ্তী কাৰ্যসূচীসমূহৰ বাবে এক ইতিবাচক পৰিৱেশ সৃষ্টি কৰে।