প্ৰণাম
শিল্পী তুমি বিষ্ণুৰাভা
তোমাক প্ৰণাম ,
কলাগুৰু ৰূপে তুমি
চিৰজ্যোতিষ্মান ৷
অসমৰ চুকে-কোণে
পাহাৰে-ভৈয়ামে
বিলাইছিলা সংস্কৃতিৰ আভা ,
কৃষ্টিৰ পথাৰত
বিধে- বিধে শইচ ৰুই
বঢ়াইছিলা সংস্কৃতিৰ শোভা ৷
তুমি আছিলা কৃষকৰ বন্ধু ,
দুখীয়াৰ হিয়াৰ আমঠু ৷
তোমাৰ গীতৰ সুৰৰ মুৰ্চনা ,
কালজয়ী গীত তুমি কৰিলা ৰচনা ৷
গীতিকাৰ , সুৰকাৰ ,
চিত্ৰকৰ , কলাকাৰ ,
নৃত্যবিশাৰদ তুমি
সৰ্বগুণাকৰ ৷
শিল্পী তুমি বিষ্ণুৰাভা
তোমাক প্ৰণাম ৷৷
-অৰুণা গোস্বামী
তিতাবৰ