অসম ডন বস্ক’ বিশ্ববিদ্যালয়ে ছেমিকণ্ডাক্টৰ গৱেষণাত আন্তঃৰাষ্ট্ৰীয় অংশগ্ৰহণেৰে এ এছ ডি এ টি ২০২৬ৰ সামৰণি
গুৱাহাটী, ৰঙিলী বাৰ্ত্তাসেৱা- অসম ডন বস্ক’ বিশ্ববিদ্যালয়ৰ আজাৰা চৌহদত দুদিনীয়াকৈ অনুষ্ঠিত গৱেষণা সন্মিলন ২০২৬ – এ এছ ডি এ টি ২০২৬ (দক্ষিণ-পূব এছিয়াত ছেমিকণ্ডাক্টৰ ডিজাইন, এছেম্বলি, টেষ্টিং আৰু পেকেজিঙৰ অগ্ৰগতি)ৰ ২৬ ছেপ্টেম্বৰত সামৰণি পৰে। সন্মিলনখনত ভাৰত আৰু বিদেশৰ গৱেষক, শিক্ষাবিদ, উদ্যোগৰ প্ৰতিনিধি, ছেমিকণ্ডাক্টৰ বিশেষজ্ঞ আৰু ছাত্ৰ-ছাত্ৰীয়ে অংশগ্ৰহণ কৰে।
অসম ডন বস্ক’ বিশ্ববিদ্যালয়ৰ ইলেক্ট্ৰনিক্স আৰু কমিউনিকেচন ইঞ্জিনিয়াৰিং বিভাগে টাইৱানৰ চুং গুঙ বিশ্ববিদ্যালয়ৰ চি-ৰেষ্ট, গুৱাহাটী বিশ্ববিদ্যালয় আৰু অসম দক্ষতা বিশ্ববিদ্যালয়ৰ সহযোগত আয়োজন কৰা এই সন্মিলনখনত ছেমিকণ্ডাক্টৰ ডিজাইন, এছেম্বলি, টেষ্টিং আৰু পেকেজিং, উদীয়মান প্ৰযুক্তি, দক্ষ মানৱসম্পদ বিকাশ, উদ্ভাৱন আৰু উদ্যোগ-শিক্ষানুষ্ঠান সহযোগিতাৰ ওপৰত গুৰুত্ব আৰোপ কৰা হয়।
২৫ ছেপ্টেম্বৰত অনুষ্ঠিত উদ্বোধনী অনুষ্ঠানত অসম ডন বস্ক’ বিশ্ববিদ্যালয়ৰ প্ৰ’ ভাইচ-চেঞ্চেলৰ ফাদাৰ জোছেফ নেলানাট; অসম ডন বস্কো বিশ্ববিদ্যালয়ৰ স্কুল অৱ টেকন’লজীৰ সঞ্চালক অধ্যাপক মনোৰঞ্জন কলিতা; গুৱাহাটী বিশ্ববিদ্যালয়ৰ পৰীক্ষা নিয়ন্ত্ৰক অধ্যাপক কন্দৰ্প কুমাৰ শৰ্মা; অসম দক্ষতা বিশ্ববিদ্যালয়ৰ গৱেষণা আৰু পৰামৰ্শ বিভাগৰ ডীন অধ্যাপক সুনন্দন বৰুৱা; গুৱাহাটী বিশ্ববিদ্যালয়ৰ প্ৰযুক্তি অনুষদৰ ডীন অধ্যাপক শিখৰ কুমাৰ শৰ্মা; আৰু চি-ডেকৰ সঞ্চালক ড০ জিতেশ চৌধুৰী উপস্থিত থাকে। অনুষ্ঠানত বিশ্ববিদ্যালয়ৰ শিক্ষক-শিক্ষয়িত্ৰী, গৱেষক, প্ৰতিনিধি আৰু ছাত্ৰ-ছাত্ৰীয়েও অংশগ্ৰহণ কৰে।
সন্মিলনখনৰ আন্তঃৰাষ্ট্ৰীয় চৰিত্ৰ প্ৰতিফলিত হয় টাইৱানৰ চুং গুঙ বিশ্ববিদ্যালয়ৰ চি-ৰেষ্টৰ অধ্যাপক চেৰ মিং টান; মালয়েছিয়াৰ ইউনিভাৰ্চিটি অৱ ছায়েন্সৰ অধ্যাপক কুৱান ইয়ু চিয়ং; আমেৰিকা যুক্তৰাষ্ট্ৰৰ পেনছিলভেনিয়া ষ্টেট বিশ্ববিদ্যালয়ৰ অধ্যাপক মাধৱন স্বামীনাথন; ছিংগাপুৰ ইউনিভাৰ্চিটি অৱ টেকন’লজি এণ্ড ডিজাইনৰ ড০ সঞ্চালী মিত্ৰ; ছিংগাপুৰৰ এষ্টাৰ কোৱাণ্টাম টেকন’লজিৰ ড০ ল’ চিট চিয়ং এৰন; টাইৱান ইকনমিক এণ্ড কালচাৰেল চেণ্টাৰৰ ড০ লুং-জিয়ে ইয়াং; আৰু টাইৱানৰ ইনফিনিয়নৰ উপ-সভাপতি শ্ৰী চি-হাও টানৰ অংশগ্ৰহণেৰে। বিশেষজ্ঞসকলে পূৰ্ণাঙ্গ বক্তৃতা প্ৰদান কৰাৰ লগতে কাৰিকৰী অধিৱেশনত সভাপতিত্ব কৰে আৰু আলোচনাচক্ৰতো অংশগ্ৰহণ কৰে।
সন্মিলনখনত অনুষ্ঠিত চাৰিখন বিষয়ভিত্তিক আলোচনাচক্ৰত ছেমিকণ্ডাক্টৰৰ ডিজাইনৰ পৰা পেকেজিংলৈ মূল্য শৃংখল; দক্ষ মানৱসম্পদ বিকাশৰ বাবে শিক্ষানুষ্ঠান-উদ্যোগ-চৰকাৰৰ সমন্বয়; উদীয়মান ছেমিকণ্ডাক্টৰ প্ৰযুক্তি; আৰু ছেমিকণ্ডাক্টৰ খণ্ডৰ বিকাশৰ বাবে নীতি, বিনিয়োগ আৰু আন্তঃগাঁথনি আদি বিষয়ত আলোচনা কৰা হয়।
সন্মিলনৰ অন্যতম আকৰ্ষণ আছিল “এখন অধিক স্মাৰ্ট ভৱিষ্যতৰ বাবে ছেমিকণ্ডাক্টৰ: বাস্তৱ জীৱনৰ প্ৰত্যাহ্বানৰ বাবে উদ্ভাৱনীমূলক সমাধান” শীৰ্ষক হেকাথন। উত্তৰ-পূৰ্বাঞ্চল বিজ্ঞান আৰু প্ৰযুক্তি ক্লাষ্টাৰে অসম ডন বস্ক’ বিশ্ববিদ্যালয়ৰ ইলেক্ট্ৰনিক্স আৰু কমিউনিকেচন ইঞ্জিনিয়াৰিং বিভাগৰ সহযোগত আয়োজন কৰা এই কাৰ্যসূচীয়ে ছাত্ৰ-ছাত্ৰী আৰু উদ্ভাৱকসকলক বাস্তৱ জীৱনৰ প্ৰত্যাহ্বানৰ আধাৰত আৰ্হি-ভিত্তিক সমাধান বিকশিত কৰাৰ সুযোগ প্ৰদান কৰে।
সন্মিলনত অনলাইন আৰু অফলাইন দুয়োটা মাধ্যমত ছয়টা কাৰিকৰী অধিৱেশন অনুষ্ঠিত হয়। এই অধিৱেশনসমূহত চি-ডেক, অসম দক্ষতা বিশ্ববিদ্যালয়, গুৱাহাটী বিশ্ববিদ্যালয়, এন আই টি মেঘালয়, এন আই টি অৰুণাচল প্ৰদেশ আৰু অসম অভিযান্ত্ৰিক মহাবিদ্যালয়কে ধৰি বিভিন্ন শিক্ষানুষ্ঠানে অংশগ্ৰহণ কৰে। উদ্যোগ খণ্ডৰ অংশগ্ৰহণৰ অংশ হিচাপে কোৰেল টেকন’লজি আৰু টিৰামে টেকন’লজিয়ে ছেমিকণ্ডাক্টৰ সামগ্ৰীৰ উপস্থাপন কৰে।
পেনছিলভেনিয়া ষ্টেট বিশ্ববিদ্যালয়, চি-ৰেষ্ট–চুং গুঙ বিশ্ববিদ্যালয়, গুৱাহাটী বিশ্ববিদ্যালয়, অসম দক্ষতা বিশ্ববিদ্যালয়, চি-ডেক চাইন, আই আই এছ চি বেংগালুৰু, ইউনিভাৰ্চিটি অৱ ছায়েন্স মালয়েছিয়া, ছিংগাপুৰ ইউনিভাৰ্চিটি অৱ টেকন’লজি এণ্ড ডিজাইন, এষ্টাৰ কোৱাণ্টাম টেকন’লজি, আই আই টি গুৱাহাটী, ইনফিনিয়ন টাইৱান, এন আই টি মেঘালয়, এন আই টি অৰুণাচল প্ৰদেশ আৰু এন আই টি নাগালেণ্ডকে ধৰি বিভিন্ন প্ৰতিষ্ঠানৰ প্ৰতিনিধিয়ে সন্মিলনত অংশগ্ৰহণ কৰে। উদ্যোগ প্ৰতিষ্ঠানসমূহৰ ভিতৰত কোৰেল টেকন’লজি, পি এন এছ ছিছ লেবছ, নুমলীগড় ৰিফাইনেৰী লিমিটেড, অইল ইণ্ডিয়া লিমিটেড, এম এম এছ মালয়েছিয়া আৰু টিৰামে টেকন’লজি উল্লেখযোগ্য।
উদ্বোধনী অনুষ্ঠানত চি-ডেকৰ সৈতে এখন বুজাবুজিৰ চুক্তি স্বাক্ষৰ কৰাও হয়। ২৬ ছেপ্টেম্বৰত অসম ডন বস্কো বিশ্ববিদ্যালয়ৰ নতুন সন্মিলন কক্ষত এ এছ ডি এ টি ২০২৬ৰ সামৰণি পৰে। সন্মিলনখনে দ্ৰুতগতিত বিকশিত হৈ থকা ছেমিকণ্ডাক্টৰ খণ্ডত আন্তঃৰাষ্ট্ৰীয় জ্ঞানৰ আদান-প্ৰদানৰ লগতে প্ৰযুক্তি, দক্ষ মানৱসম্পদ বিকাশ, উদ্ভাৱন, নীতি আৰু সহযোগিতাৰ বিভিন্ন দিশত গুৰুত্বপূৰ্ণ আলোচনাৰ বাবে এক উল্লেখযোগ্য মঞ্চ প্ৰদান কৰে।