আইৰ পথাৰৰ ৰঙীণ সপোন
ৰুমী কলিতা দত্ত
২নং কেন্দুগুৰি,ধমন,ডিব্ৰুগড়
লুইতৰ বুকুত বালি-শিলে পুতিলে
দিহিং-দিচাঙো শুকাই গ’ল,
দিখৌ বাঢ়িলে ফেনে-ফুটুকাৰে
সপোনৰ গাঁওখন উটুৱাই লৈ গ’ল!
আইৰ পথাৰৰ ৰঙীন সপোনবোৰ
উকা মৰুভূমি হৈ ৰ’ল
বহি আছোঁ আকাশলৈ চাই মূৰ তুলি
আমাৰ সম্পদ আনে কাঢ়ি নিলে
হেৰুৱালোঁ নিজৰ অস্তিত্ববোৰ ছাঁ কৰি।
বুকুত জ্বলা ক্ষোভৰ জুইয়ে
আজি মাতিছে প্ৰতিবাদৰ হাঁক,
ঐক্যৰ বন্দনাৰে ৰাইজে তুলিলে
নতুন পুৱাৰ সঁহাৰিৰ ৰাক।
সুপ্ত হিচাপ সোঁৱৰাই দিবলৈ
সকলোৱে ল’লোঁ পোহৰৰ পণ,
মাতৃভূমিৰ হৃত গৌৰৱ ঘূৰাই আনিবলৈ
আজি সমগ্ৰ ৰাইজৰ হ’ল জাগৰণ।