ঢকুৱাখনাৰ ফাটবিহু আৰু নৱ প্ৰজন্ম: এক সাংস্কৃতিক উত্তৰণ
ৰাজু কলিতা,মাজুলী
অসমীয়া জাতীয় জীৱনৰ আটাইতকৈ পৱিত্ৰ আৰু আনন্দদায়ক উৎসৱ হ’ল ব’হাগ বিহু বা ৰঙালী বিহু। এই উৎসৱৰ লগত জড়িত হৈ আছে অসমীয়া মানুহৰ আবেগ, কৃষ্টি আৰু পৰম্পরা। অসমৰ বিভিন্ন প্ৰান্তত বিভিন্ন ধৰণে বিহু উদযাপন কৰা হয়, তাৰ ভিতৰত লখিমপুৰ জিলাৰ ঢকুৱাখনাৰ ‘ফাটবিহু’ এক সুকীয়া আৰু ঐতিহাসিক পৰিচয় বহন কৰি আহিছে। ফাটবিহু কেৱল এটা উৎসৱ নহয়, ই হৈছে আমাৰ জাতীয় সংস্কৃতিৰ এক প্ৰকৃত সংগ্ৰহালয়। এই ফাটবিহুৰ সংৰক্ষণ আৰু বিকাশৰ ক্ষেত্ৰত নৱ প্ৰজন্মৰ ভূমিকা অত্যন্ত গুৰুত্বপূৰ্ণ। ঢকুৱাখনাৰ ফাটবিহুৰ আৰম্ভণি হৈছিল অতীতত পথাৰৰ মুকলি পৰিৱেশত, য’ত গাঁৱৰ ৰাইজে একত্ৰিত হৈ বিহুৰ আনন্দ লৈছিল। ‘ফাট’ শব্দটোৰ অৰ্থ হৈছে মুকলি ঠাই বা নদীৰ ফাট মেলা অংশ। অতীতৰ সেই মুকলি পথাৰৰ পৰা আৰম্ভ হৈ আজি ফাটবিহুৱে এক বৃহৎ অনুষ্ঠানৰ ৰূপ লৈছে যদিও ইয়াৰ মূল উদ্দেশ্য আৰু আদৰ্শ অপৰিৱৰ্তিত হৈ আছে। ফাটবিহুৰ মূল বৈশিষ্ট্য হ’ল ইয়াৰ বিশুদ্ধতা। ইয়াত কোনো আধুনিক বাদ্যযন্ত্ৰ বা বিকৃত সংস্কৃতিৰ সৈতে আপোচ কৰা নহয়। ইয়াৰ পৰিৱৰ্তে ইয়াত প্ৰাচীন কালৰে পৰা চলি অহা ঢোল, পেঁপা, গগণা, টকা আদিৰ ব্যৱহাৰ আৰু পুৰণি বিহু গীতৰ চৰ্চা কৰা হয়ফাটবিহুৰ সৈতে জড়িত হৈ আছে অসমৰ লোক-সংস্কৃতিৰ গভীৰ শিপা। ইয়াত হুঁচৰি, জেং বিহু, ম’হ যুঁজ, নাও খেল আদি প্ৰাচীন পৰম্পৰাসমূহ প্ৰদৰ্শন কৰা হয়। ইয়াৰ জৰিয়তে নতুন প্ৰজন্মই নিজৰ শিপাৰ লগত পৰিচিত হ’ব পাৰে। ফাটবিহুৱে আমাক আমাৰ পূৰ্বপুৰুষৰ জীৱনশৈলী, তেওঁলোকৰ প্ৰকৃতিৰ প্ৰতি থকা দায়বদ্ধতা আৰু সমাজ জীৱনৰ সম্পৰ্কৰ বিষয়ে জ্ঞান দিয়ে। বৰ্তমানৰ নৱ প্ৰজন্মৰ ওপৰত আমাৰ সংস্কৃতিৰ ভৱিষ্যত নিৰ্ভৰশীল। আধুনিকতাৰ প্ৰভাৱত বহু সময়ত নৱ প্ৰজন্ম নিজৰ সংস্কৃতিৰ পৰা আঁতৰি যোৱাৰ সম্ভাৱনা থাকে। কিন্তু ঢকুৱাখনাৰ ফাটবিহুৰ ক্ষেত্ৰত দেখা যায় যে, নৱ প্ৰজন্মই আগভাগ লৈ এই অনুষ্ঠানটিক সজীৱ কৰি ৰাখিছে। ফাটবিহুৰ মঞ্চত উঠি নৱপ্ৰজন্মৰ ল’ৰা-ছোৱালীয়ে ঢোল বজাই, বিহু নাচি আৰু হুঁচৰি গাই নিজৰ সংস্কৃতিৰ প্ৰতি থকা দায়বদ্ধতা প্ৰমাণ কৰিছে।ফাটবিহুৰ ধাৰাবাহিকতা অক্ষুণ্ণ ৰাখিবলৈ নৱ প্ৰজন্মই কিছুমান বিশেষ দায়িত্ব পালন কৰিব লাগিব। যেনে ,বিহুৰ মূল সুৰ আৰু পৰম্পৰা অক্ষুণ্ণ ৰাখি ইয়াক পৰৱৰ্তী প্ৰজন্মলৈ হস্তান্তৰ কৰা।ফাটবিহুৰ সৈতে জড়িত পুৰণি গীত-মাত, নৃত্য আৰু বাদ্যযন্ত্ৰসমূহৰ ওপৰত গৱেষণা কৰা আৰু ইয়াক নথিপ্ৰস্তুত কৰা।সামাজিক মাধ্যম বা ডিজিটেল প্লেটফৰ্মৰ জৰিয়তে ফাটবিহুৰ ঐতিহ্য বিশ্ব দৰবাৰত তুলি ধৰা। গাঁৱৰ বয়োজ্যেষ্ঠ বিহুৱা-বিহুৱতীসকলৰ পৰা বিহুৰ আচল নিয়ম-কানুন শিকি লোৱা। ঢকুৱাখনাৰ ফাটবিহু আৰু নৱ প্ৰজন্ম এক মুদ্ৰাৰ ইপিঠি-সিপিঠি। ফাটবিহুৱে নৱ প্ৰজন্মক সাংস্কৃতিক চেতনা প্ৰদান কৰে আৰু নৱ প্ৰজন্মই ফাটবিহুৰ ঐতিহ্যক জীয়াই ৰাখে। আমাৰ সংস্কৃতিয়েই আমাৰ পৰিচয়। সেয়েহে, ঢকুৱাখনাৰ ফাটবিহুৰ ঐতিহ্যক বৰ্তমান আৰু ভৱিষ্যতৰ প্ৰজন্মই একে উৎসাহেৰে আগুৱাই লৈ যাব বুলি আশা কৰিব পাৰি। ইয়াৰ জৰিয়তে অসমীয়াৰ স্বাভিমান আৰু গৌৰৱ অটুট থাকিব।