গুৱাহাটী মেডিকেল কলেজৰ আইচিইউৰ বেডৰ পৰা পৰি নৱজাতকৰ মৃত্যু
ৰঙিলী বাৰ্ত্তাসেৱা- যোৱা ১৫ আগষ্টত দেশৰ ৭৯ সংখ্যক স্বাধীনতা দিৱসৰ দিনা পিতৃ-মাতৃত্বৰ গৌৰৱ অৰ্জন কৰিছিল নুনমাটিৰ উৎপল বৰদলৈ আৰু স্মিতা ডেকাই । বৈবাহিক জীৱনৰ ১৪টা বছৰ ধৰি সপোনক বাস্তৱায়িত কৰাৰ অহৰহ চেষ্টা, অপেক্ষা, ধৈৰ্য আৰু চৰম কষ্টৰ পাছত সন্তান সুখ লাভ কৰিছিল উৎপল আৰু স্মিতাই। কিন্তু হায়ৰে বিধি! কথাতে কোৱা হয় দাতাই দিলেও বিধাতাই নিদিয়ে। দুর্ভগীয়া স্মিতা-উৎপলৰ ক্ষেত্ৰত অৱশ্যে দাতা-বিধাতা দুয়োজনে আশীর্বাদ দিছিল। কিন্তু উত্তৰ-পূৰ্বাঞ্চলৰ ঐতিহ্যমণ্ডিত চিকিৎসা প্রতিষ্ঠান বুলি সততে দাবী কৰি অহা গুৱাহাটী চিকিৎসা মহাবিদ্যালয় হাস্পতাল (জিএমচিএইচ) ৰ চিকিৎসক-চিকিৎসা কৰ্মীৰ চৰম দায়িত্বজ্ঞানহীনতাৰ বাবেই হাততে পায়ো দম্পতীটোৱে হেৰুৱাবলগীয়া হ’ল কণমানি সন্তানক। পৃথিৱীৰ পোহৰ দেখা মাত্র তিনি দিনহে হৈছিল কণমানিটোৰ। কিন্তু ভগৱান জ্ঞান কৰা একাংশ চিকিৎসক-চিকিৎসা কর্মীৰ চূড়ান্ত দায়িত্বজ্ঞানহীনতাৰ বাবে এনআইচিইউৰ ফটো থেৰাপী ইউনিটৰ ৱাৰ্মাৰ বেডৰ পৰা পৰি কণমানিটোৱে প্ৰাণ হেৰুৱায়। এই ঘটনাত আন দুটা নৱজাতক আহত হৈছে । কিন্তু কি পৰিস্থিতিত আৰু কেনেদৰে জিএমচিএইচৰ দৰে এখন প্ৰতিষ্ঠানৰ এনআইচিইউৰ ৱাৰ্মাৰ বেডৰ পৰা নৱজাতক পৰি মৃত্যু হ’ল সেই কথা এতিয়াও স্পষ্ট হোৱা নাই। উল্লেখ্য যে যোৱা ১৫ আগষ্টত জিএমচিএইচত ভর্তি হোৱা স্মিতা ডেকাই সুস্থভাবে জন্ম দিছিল সন্তানটো। দুদিন ঠিকেই আছিল যদিও দেওবাৰে কণমানিটোৰ দেহত জণ্ডিছৰ লক্ষণ দেখা দিয়াৰ বাবেই এনআইচিইউলৈ স্থানান্তৰ কৰা হৈছিল। দুর্ভগীয়া পিতৃ উৎপল বৰদলৈয়ে জানিবলৈ দিয়া মতে চিকিৎসকে শিশুটিৰ সংক্ৰমণ হোৱা বুলি উল্লেখ কৰি দুটা দৰব ফাৰ্মাচীৰ পৰা আনিবলৈ দিছিল। সেইমৰ্মে দুয়োটা দৰব সময় মতে আনি দিছিল পিতৃগৰাকীয়ে। কিন্তু দৰব দিয়াৰ পাছতো নৱজাতকটোৰ সংক্ৰমণ কমা নাছিল। যাৰ বাবেই এনআইচিইউলৈ উন্নত চিকিৎসাৰ বাবে প্ৰেৰণ কৰা হৈছিল। দিনৰ ভাগত নিজৰ কোলাত নচুৱাই ৰখা কণমানিটোৰ সৈতে সেয়াই যে তেওঁৰ শেষ দেখা হ’ব সেয়া সপোনতো ভাবিব পৰা নাছিল দুৰ্ভগীয়া পিতৃগৰাকীয়ে। সোমবাৰে পুৱাৰ সময়ত অপ্রত্যাশিতভাবে আহিল উক্ত খবৰটো। তাৎপৰ্যপূৰ্ণভাৱে সন্তানৰ মৃত্যুৰ খবৰ প্ৰথম অৱস্থাত জিএমচিএইচ কর্তৃপক্ষই গাপ দি ৰাখিছিল। এনআইচিইউত যথেষ্ট জনসমাগম হোৱা পৰিলক্ষিত হৈহে নিজৰ সন্তানৰ খবৰ ল’বলৈ গৈছিল উৎপল বৰদলৈয়ে। কৰ্তব্যৰত সুৰক্ষা কৰ্মী তথা চিকিৎসা কর্মীয়ে প্রথম অৱস্থাত তেওঁক দুর্ব্যৱহাৰ কৰিছিল। সংবাদ মাধ্যমৰ আগত তেওঁ সদৰী কৰা মতে কি হৈছে বুলি সোধাত কৰ্তব্যৰত কৰ্মীয়ে কি লাগে বুলি প্রশ্নহে কৰিছিল। তাৰ পাছত নিজৰ নামটো কৈ সন্তানটোৰ খবৰ ল’বলৈ অহা বুলি কোৱাৰ পাছত কৌশলেৰে ভিতৰলৈ তেওঁক মাতি নি অপ্রত্যাশিত খবৰটো অৱগত কৰা হৈছিল বুলি কয়। নিজৰ সন্তানৰ মৃত্যুৰ ঘটনাক লৈ এতিয়াও সহজ হ’ব পৰা নাই উৎপল বৰদলৈ। বাৰে বাৰে তেওঁ একেটা কথাই কৈছে। কালি দুপৰীয়াৰ সময়ত হাঁহি-স্ফূর্তি কৰি থকা বেবীটো কিদৰে মৰি যাব পাৰে? অকল উৎপল-স্মিতাৰ সন্তানেই নহয়, এনআইচিইউৰ একেখন বিছনাতে থকা আন দুটা নৱজাতকো মজিয়াত বাগৰি পৰে। অৱশ্যে উক্ত দুয়োটা শিশু সম্প্রতি চিকিৎসাধীন হৈ আছে বুলি জানিব পৰা গৈছে। দুৰ্ভগীয়া উৎপল বৰদলৈয়ে জানিবলৈ দিয়া মতে বেণ্ডেজ মাৰি থোৱা জৰাজীৰ্ণ বিছনাত ৪টাকৈ নৱজাতকক একেলগে ৰখা হৈছিল। নামত উন্নত হাস্পতাল যদিও শিশুৰ বাবে থকা আইচিইউ যথেষ্ট জৰাজীৰ্ণ। দেওবাৰে নিশা ১০ বজাত মই নিজেই মোৰ সন্তানক চাই আহিছিলোঁ। সকলোখিনি ঠিকেই আছিল। আজি হঠাৎ কি হৈ গ’ল মই ভাবি উলিয়াব পৰা নাই। উল্লেখ্য যে সোমবাৰে পুৱা প্রায় ৫.৩০ বজাত এই শিহৰণকাৰী ঘটনাটো সংঘটিত হয়। প্রত্যক্ষদর্শীৰ পৰা জানিব পৰা মতে এনআইচিইউৰ নির্দিষ্ট বিছনাখনত থকা ৪টা নৱজাতকৰ ভিতৰত ২টা মজিয়াত পৰি থকাৰ লগতে উৎপল বৰদলৈৰ সন্তানটো আইচিইউৰ বিছনাৰ ৰেলিঙত ওলমি আছিল। ভয়ানক ঘটনাটোৰ পাছতে সমগ্ৰ ৰাজ্যজুৰি তীব্ৰ প্ৰতিক্ৰিয়াৰ সৃষ্টি হোৱাৰ লগতে ৰাইজে এই দায়িত্বজ্ঞানহীনতাৰ বাবে কৰ্তব্যৰত চিকিৎসক-নাৰ্ছক দোষাৰোপ কৰিছে। ইপিনে ঘটনাটোৰ পাছত আত্মপক্ষ সমর্থন কৰি জিএমচিএইচৰ অধ্যক্ষ ডাঃ অচ্যুত বৈশ্যই এনআইচিইউৰ বিছনা ভগা নাছিল বুলি মন্তব্য কৰাৰ লগতে ঘটনাটোৰ বাবে এটা আভ্যন্তৰীণ তদন্ত জিএমচিএইচৰ বিভিন্ন বিভাগৰ চিকিৎসক বিশেষজ্ঞক লৈ কৰাৰ কথা ঘোষণা কৰে। জানিব পৰা মতে জিএমচিএইচ কর্তৃপক্ষই প্রসূতি বিভাগৰ নাৰ্ছিং ইনচার্জ ভানুপ্রিয়া মিচঙক তাৎক্ষণিকভাৱে নিলম্বনৰ দিয়াৰ নিৰ্দেশ জাৰি কৰিছে। তদন্তত গাফিলতি ধৰা পৰিলে কঠোৰৰ পৰা কঠোৰতম শাস্তি দিয়াৰো প্রতিশ্রুতি তেওঁ দিয়ে। দুর্ভাগ্যজনকভাৱে ১৪ বছৰৰ মূৰত পোৱা এই সুখ যে দুখলৈ পৰিণত হ’ল সেই বতৰা এতিয়াও দুৰ্ভগীয়া মাতৃগৰাকীক জনাবলৈ সাহস কৰা নাই পৰিয়ালবৰ্গই। পৰিয়ালে ঘটনাটোৰ উচিত তদন্ত বিচৰাৰ লগতে মৃতদেহটোৰ মৰণোত্তৰ পৰীক্ষা কৰাৰ বাবে জিএমচিএইচ কর্তৃপক্ষক দাবী জনাইছে। পিতৃ উৎপল বৰদলৈৰ মতে তেওঁলোকে যিখিনি হেৰুৱাবলগীয়া আছিল সেয়া হেৰুৱালে। ভৱিষ্যতে আন কোনো অভিভাৱকে যাতে এই যাতনা ভোগ কৰিবলগীয়া নহয় তাৰ বাবে চৰকাৰক কঠোৰ হ’বলৈ দাবী জনাইছে।