২৪-২৫ নৱেম্বৰত ৰিয়াধত হ’ব আইপিএলৰ মেগা নিলাম
ৰঙিলী বাৰ্ত্তাসেৱা- বিশ্বৰ সৰ্ববৃহৎ ক্রিকেট লীগ ইণ্ডিয়ান প্রিমিয়াৰ লীগ-২০২৫ৰ মেগা নিলামৰ সম্ভাব্য তাৰিখ আৰু স্থান প্ৰকাশ কৰা হৈছে। সংবাদ প্রতিষ্ঠানৰ তথ্য অনুসৰি, আগন্তুক আইপিএলৰ বাবে বৃহৎ নিলাম ২৪ আৰু ২৫ নৱেম্বৰত চৌদি আৰবৰ ৰিয়াধত অনুষ্ঠিত হোৱাৰ সম্ভাৱনা আছে। এই সংক্রান্তত যাৱতীয় সকলো ব্যৱস্থা গ্রহণ কৰা হৈছে আৰু শীঘ্ৰে চূড়ান্ত সিদ্ধান্ত প্ৰকাশ কৰাৰ সম্ভাৱনা আছে। অৱশ্যে, ভাৰতীয় ক্রিকেট নিয়ন্ত্রণ ব’র্ডে এতিয়াও আনুষ্ঠানিকভাৱে নিলামৰ স্থান বা তাৰিখ ঘোষণা কৰা নাই। প্রতিবেদন অনুসৰি, বিচিচিআইৰ বিষয়াসকলে ইতিমধ্যে সম্ভাব্য স্থানসমূহৰ মূল্যাংকন কৰিবলৈ চৌদি আৰবলৈ প্ৰাৰম্ভিক ভ্ৰমণ কৰিছে। আইপিএল-২০২৫ৰ মেগা নিলামৰ বাবে প্ৰথমতে জেদ্দাৰ নাম বিবেচনা কৰা হৈছিল যদিও ৰাজধানী চহৰ ৰিয়াধক দুদিনীয়া নিলামৰ বাবে আটাইতকৈ সুবিধাজনক আয়োজক চহৰ হিচাপে নির্বাচিত কৰে। বিচিচিআয়ে ডুবাই, ছিংগাপুৰ, আনকি ভিয়েনাৰ দৰে অন্যান্য আন্তঃৰাষ্ট্ৰীয় স্থানসমূহৰ নামো বিবেচনা কৰিছিল। কিন্তু পৰৱৰ্তী সময়ত চৌদি আৰবক আদর্শ স্থান হিচাপে বাছনি কৰা হৈছে।