ৰঙা ৰঙা ফাগুন আহিছে
সেউজীয়া পাতবোৰ সৰি লঠঙা হৈছে
খোজত খৰমৰাই উঠিছে সৰাপাতবোৰ
যিদৰে বয়সে গৰকি বুঢ়া কৰে মানুহ
ডালত পৰি চিঞৰি থকা কিচিৰ মিচিৰ চৰাইবোৰে
ৰঙা ৰঙা ফাগুন আনিছে
যি মলয়াৰ বা লাগি ৰিঙা ৰিঙা হয়
চঞ্চল মনৰ উতনোৱা গা
উন্মনা হৈ পৰে ভৰ যৌৱনা দেহ। ধুলিৰে ধূসৰিত হৈ পৰে
ধোঁৱাবৰণীয়া আকাশ
মাজে মাজে মৃদু বতাহ
চৌদিশ হৈ পৰে মায়াময়
ৰিৱ্ ৰিৱ্ জিৰ্ জিৰ্ ফাগুনীয়ে
চিৰিলি চিৰিলি কলপাতৰ মালা গাঁঠে।
ৰঙা ৰঙা ফাগুন আহিছে,
আকাশ ৰাঙলী কৰি ফুলিছে
পলাশ,মদাৰ,শিমলু
উতলা ফাগুনৰ সুৱাসত
মিচিং ডেকা-গাভৰুও হয় ৰঙীন
এইয়া যে ফাগুনৰ সময়…।
সত্যজিৎ গগৈ
নাহৰকটীয়া
নাহৰকটীয়া