ৰহস্যময়ী মৃতসাগৰ-কাজি শ্বাহাদত ইছলাম

সিহঁতৰ এটাই কথা আছিল যে সঁচাকৈয়ে আল্লাহে যদি  ওপৰৰ পৰা গজব অথবা শাস্তি দিব বিচাৰে তেন্তে দিয়ক। মুঠতে হজৰত লুত (আঃ)ৰ কথাৰ ওপৰত সিহঁতৰ তিল পৰিমাণো বিশ্বাস হোৱা নাছিল।তাৰ পিছত লুত (আঃ)ৰ ওচৰত আল্লাহে তেওঁৰ দুজন ফিৰিস্তা পঠিয়াই দিলে।ফিৰিস্তা দুজনে সুঠাম যুৱকৰ ৰূপ ধাৰণ কৰি লুত (আঃ)ৰ ঘৰত উপস্থিত হোৱা দেখি সেই এলেকাৰ সমকামী যুৱকবোৰো তেখেতৰ ঘৰত উপস্থিত হ’ল গৈ। সিহঁতৰ লোলুপ দৃষ্টি যুৱকদ্বয়ৰ ওপৰত পৰাত তেখেতে বহুতো কাবৌ কৰিব ধৰিলে।তেখেতে সুঠাম দেহৰ যুৱক দুজনক বাদ দি তেখেতৰ কন্যাক  বিয়া কৰোৱাৰ বাবে অনুৰোধ কৰিলে। কিন্তু অপাৰগ হ’ল।যুৱক দুজনে লুত (আঃ)ক নিজৰ নিজৰ পৰিচয় দি লাহেকৈ ক’লে  তেখেতৰ উম্মাত(followers) সকলক লগত লৈ সেই এলেকা যাতে সোনকালেই পৰিত্যাগ কৰে কাৰণ সেই এলেকাত আল্লাহৰ হুকুমত গজব নাজিল হ’ব। কথামতেই কাম হ’ল।হজৰত লুত (আঃ) তেখেতৰ উম্মাত(followers)সকলক লৈ সেই ঠাইৰ পৰা দূৰলৈ গুচি যোৱাৰ পাছত ফিৰিস্তা দুজনে সেই এলেকাটো ওলোটাই দিলে আৰু তাতেই এখনি হ্ৰদৰ সৃষ্টি হ’ল।আৰু সেয়াই আজিৰ মৃত সাগৰ (Dead Sea)।