শাওণৰ সেউজীয়া গাঁথা
ৰুমী কলিতা দত্ত
২ নং কেন্দুগুৰি,ডিব্ৰু
দুপৰৰ তপত ৰ’দক নেওচি
আকাশত দেখোঁ ক’লা ডাৱৰৰ মেলা,
শাওণৰ প্ৰথমজাক বৰষুণৰ টোপাল সাৱটি
পথাৰে পালে প্ৰাণৰ নতুন মেলা।
বোকাময় পথাৰত কৃষকৰ ভৰিৰ খোজ
সেউজীয়া সপোনৰ একোটা বীজ
বতাহত হালিজালি থকা
কঠিয়াই কয়-আমিও আছোঁ
জীৱনৰ বাবে সাজু হৈ ।
হালৰ সীৰলুত ফুটে মাটিৰ গোন্ধ
বতাহে কঢ়িয়ায় আশাৰ সুগন্ধি
ৰোৱনীৰ হাতৰ পৰশত প্ৰাণ পায়
পথাৰৰ প্ৰতিটো কোণ ।
এয়া মাথোঁ পথাৰ নহয়
এয়া কৃষকৰ জীৱন
ঘাম আৰু শ্ৰমৰ সংগ্ৰাম
ধানৰ গেৰেলিত জিলিকি উঠে ভৱিষ্যত
আমাৰ ক্ষুধা নিবাৰণৰ পবিত্ৰ ধাম।
শাওণৰ এই সেউজীয়া গাঁথা
সদায় গাই থাকক শাওণে
প্ৰতিটো বৰষুণৰ টোপালত ধুই যাওক
কৃষকৰ জীৱনৰ বেদনাৰ ইতিহাস ।