বালাগাঁও হাইস্কুলৰ খেলপথাৰৰ দুৰৱস্থা আৰু আমাৰ দায়িত্ব
আতিকুত জামান, অভিযন্তা, বালাগাঁও
এখন খেলপথাৰ কেৱল ফুটবল, ক্ৰিকেট বা এথলেটিকছৰ স্থান নহয়। খেলপথাৰ বিদ্যালয় আৰু এখন অঞ্চলৰ জীৱন্ত প্ৰাণকেন্দ্ৰ। ইয়াতেই ছাত্ৰ-ছাত্ৰীসকলে শাৰীৰিক বিকাশৰ লগতে শৃংখলা, দলীয় মনোভাৱ, নেতৃত্ব আৰু সামাজিক সম্প্ৰীতিৰ শিক্ষা লাভ কৰে। এখন সুস্থ খেলপথাৰ এখন সুস্থ সমাজ গঢ়াৰ অন্যতম আধাৰ। কিন্তু বৰপেটা জিলাৰ কলগাছিয়া উন্নয়ন খণ্ডৰ অন্তৰ্গত বালাগাঁও হাইস্কুলৰ খেলপথাৰৰ বৰ্তমানৰ অৱস্থাই এই সত্যক গভীৰভাৱে প্ৰশ্নৰ সন্মুখীন কৰিছে।
বালাগাঁও অঞ্চলৰ একমাত্ৰ বৃহৎ খেলপথাৰখন বছৰৰ প্ৰায় ছয় মাহ একাঁঠু পানীত ডুবি থাকে। বাৰিষা আৰম্ভ হোৱাৰ লগে লগেই খেলপথাৰখন জলমগ্ন হৈ পৰে আৰু স্থায়ী পানী নিষ্কাশন ব্যৱস্থা নথকাৰ ফলত দীৰ্ঘদিন ধৰি পানী জমা হৈ থাকে। ফলস্বৰূপে বিদ্যালয় আৰু অঞ্চলটোৰ ছাত্ৰ-ছাত্ৰী নিয়মীয়া শাৰীৰিক শিক্ষা আৰু ক্ৰীড়া চৰ্চাৰ পৰা বঞ্চিত হয়। কেৱল বিদ্যালয়ৰ শিক্ষাৰ্থীয়েই নহয়, অঞ্চলটোৰ ক্ৰীড়াপ্ৰেমী যুৱ-যুৱতীসকলেও এই খেলপথাৰৰ ওপৰত নিৰ্ভৰশীল। তেওঁলোকৰ ক্ৰীড়া অনুশীলন, ব্যায়াম আৰু সামৰিক বাহিনী বা আৰক্ষীৰ নিযুক্তিৰ বাবে প্ৰয়োজনীয় শাৰীৰিক প্ৰস্তুতিও ব্যাহত হৈছে।
বৰ্তমান সময়ত যুৱ সমাজক মাদকাসক্তি, অপৰাধ আৰু বিভিন্ন সামাজিক অৱক্ষয়ৰ পৰা আঁতৰাই ৰাখিবলৈ খেল-ধেমালিৰ বাহিৰে কোনো বিকল্প নাই। এখন উন্নত খেলপথাৰে যুৱ সমাজক ইতিবাচক দিশত আগুৱাই নিয়াত গুৰুত্বপূৰ্ণ ভূমিকা পালন কৰে। কিন্তু খেলপথাৰখনৰ এনে দুৰৱস্থাই অঞ্চলটোৰ যুৱ সমাজৰ সম্ভাৱনাক সংকুচিত কৰি তুলিছে।
এই সমস্যাৰ মূল কাৰণ হৈছে উপযুক্ত পানী নিষ্কাশন ব্যৱস্থাৰ অভাৱ আৰু দীৰ্ঘদিন ধৰি উন্নয়নমূলক কাম নোহোৱা। বহু বছৰে সমস্যাটো বিদ্যমান হৈ থকাৰ পাছতো বিদ্যালয় কৰ্তৃপক্ষ, শিক্ষা বিভাগ, ক্ৰীড়া বিভাগ আৰু স্থানীয় জনপ্ৰতিনিধিসকলৰ পৰা ফলপ্ৰসূ পদক্ষেপ পৰিলক্ষিত হোৱা নাই। এনে উদাসীনতা উদ্বেগজনক।
এই খেলপথাৰখন উন্নয়নৰ বাবে বৃহৎ কোনো প্ৰকল্পৰ প্ৰয়োজন নাই। বিজ্ঞানসন্মত পানী নিষ্কাশন ব্যৱস্থা, প্ৰয়োজনীয় মাটি ভৰোৱা, সমতলকৰণ আৰু নিয়মীয়া ৰক্ষণাবেক্ষণৰ জৰিয়তে খেলপথাৰখন পুনৰ ব্যৱহাৰোপযোগী কৰি তোলা সম্ভৱ। ইয়াৰ ফলত কেৱল বিদ্যালয়ৰ ছাত্ৰ-ছাত্ৰীয়েই নহয়, সমগ্ৰ অঞ্চলটোৰ যুৱ সমাজ উপকৃত হ’ব।
শিক্ষাৰ মান উন্নয়নৰ কথা কওঁতে আমি প্ৰায়ে পাঠদান, শিক্ষক বা পৰীক্ষাৰ কথাহে আলোচনা কৰোঁ। কিন্তু শাৰীৰিক শিক্ষা আৰু ক্ৰীড়াৰ বাবে প্ৰয়োজনীয় আন্তঃগাঁথনিও সমানে গুৰুত্বপূৰ্ণ। খেলপথাৰৰ দৰে মৌলিক সুবিধাৰ অভাৱে শিক্ষাৰ সামগ্ৰিক লক্ষ্যক ব্যাহত কৰে।
সেয়েহে বালাগাঁও হাইস্কুলৰ খেলপথাৰৰ সমস্যা আৰু পলম নকৰি সমাধান কৰা উচিত। বিদ্যালয় কৰ্তৃপক্ষ, শিক্ষা বিভাগ, ক্ৰীড়া বিভাগ, জিলা প্ৰশাসন আৰু স্থানীয় জনপ্ৰতিনিধিসকলে এই বিষয়টো অগ্ৰাধিকাৰৰ ভিত্তিত গ্ৰহণ কৰি স্থায়ী পানী নিষ্কাশন ব্যৱস্থা আৰু খেলপথাৰৰ উন্নয়নৰ পদক্ষেপ লোৱা সময়ৰ দাবী। এখন সুস্থ খেলপথাৰ মানে কেৱল এখন খেলপথাৰ নহয়, ই এক সুস্থ, সক্ৰিয় আৰু সম্ভাৱনাময় প্ৰজন্ম গঢ়াৰ ভেটি।