অসমৰ ৫ লাখ বিজেপি কর্মকর্তাৰে বাৰ্তালাপ প্রধানমন্ত্রী মোদীৰ
ৰঙিলী বাৰ্ত্তাসেৱা- ৰাজ্যত নির্বাচনী প্রচাৰ তুংগত উঠাৰ সময়তে প্রধানমন্ত্রী নৰেন্দ্র মোদীয়ে নমো এপৰ জৰিয়তে ‘মেৰা বুথ, সবছে মজবুত’ কাৰ্যসূচীৰে ৰাজ্যখনৰ লাখ লাখ কার্যকর্তাক ভার্চুৱেলী সম্বোধন কৰে। অহা ৯ এপ্ৰিলৰ বিধানসভা নিৰ্বাচনৰ পূৰ্বে অসমত ভার্চুৱেলী বিজেপিৰ পাঁচ লাখ বুথ পৰ্যায়ৰ কৰ্মীক সম্বোধন কৰি প্রধানমন্ত্রী মোদীয়ে কয় যে কংগ্ৰেছৰ আমোলত ৰাজ্যখনত দীর্ঘদিন ধৰি অস্থিৰতা দেখা গৈছিল যদিও যোৱা দহ বছৰত বিজেপিৰ ডাবল ইঞ্জিন চৰকাৰে অঞ্চলটোৰ শান্তি সুনিশ্চিত কৰাৰ বাবে যৎপৰোনাস্তি চেষ্টা কৰাৰ লগে লগে পৰিস্থিতি সলনি হৈছে আৰু ৰাজ্যখনলৈ শান্তিৰ বাতাৱৰণ ঘূৰি আহিছে। অসমৰ পূৰ্বৰ কংগ্ৰেছ চৰকাৰসমূহৰ ‘অসম শাসন’ৰ দিনৰ ভয়াৱহ আৰু অশান্তিৰ দিনবোৰৰ কথা প্ৰথমবাৰৰ বাবে ভোট দিবলগীয়া যুৱপ্ৰজন্মক সোঁৱৰাই দিয়াৰ আহ্বান জনাই সৰু সৰু ভুলেও ৰাজ্যখনক পিছুৱাই ঠেলি দিব পাৰে বুলি সকীয়াই দি প্রধানমন্ত্রী মোদীয়ে অসমত তৃতীয়বাৰৰ বাবে বিজেপি নেতৃত্বাধীন এনডিএ চৰকাৰ হ’ব বুলি নিশ্চিত প্ৰদান কৰাৰ লগতে দলৰ কাৰ্যকৰ্তাসকলে ইয়াৰ বাবে কঠোৰ পৰিশ্ৰম কৰি থকা বুলি উল্লেখ কৰে। ৰাজ্যৰ ৬,৩৪৮টা শক্তিকেন্দ্ৰৰ ভিতৰত ৪,৫০০তকৈও অধিক শক্তিকেন্দ্রত মুঠ ৫ লাখতকৈও অধিক কাৰ্যকৰ্তাই ‘মেৰা বুথ সবচে মজবুত’ কাৰ্যসূচীৰ জৰিয়তে সমৱেত হৈ প্ৰধানমন্ত্ৰীৰ বাৰ্তালাপ শ্ৰৱণ কৰাৰ বিপৰীতে শোণিতপুৰৰ নদুৱাৰ সমষ্টিৰ পংকজ হাজৰিকা, তামুলপুৰ জিলাৰ তামুলপুৰ সমষ্টিৰ ধনেশ্বৰ বসুমতাৰী, নগাঁও জিলাৰ ৰহা সমষ্টিৰ ডিম্পী দাস, কার্বি আংলং জিলাৰ বোকাজান সমষ্টিৰ দেৱৰাজ চিগনাৰ আৰু তিনিচুকীয়া জিলাৰ মাকুম সমষ্টিৰ অর্জুন গোৱালাৰ সৈতে বাৰ্তালাপ কৰা প্ৰধানমন্ত্ৰী নৰেন্দ্ৰ মোদীয়ে ৰাজ্যখনৰ বিভিন্ন বিষয়ৰ বিষয়ত আলোকপাত কৰি কয় যে কংগ্ৰেছে অনুপ্ৰৱেশকাৰীৰ দ্বাৰা ভূমি দখল সম্ভৱ কৰি তুলিছিল। কংগ্রেছে অনুপ্রৱেশকাৰীৰ দ্বাৰা অবৈধ ভূমি দখলৰ অনুমতি দিছিল। য’তেই অনুপ্ৰৱেশকাৰীয়ে বসতি স্থাপন কৰে, তাতেই ক্ষুদ্র ব্যৱসায় আৰু স্থানীয় লোকৰ জীৱিকা দখল কৰে বুলি উল্লেখ কৰি প্ৰধানমন্ত্ৰীয়ে কয় যে অবৈধ ভূমি দখলৰ গোচৰ আৰু স্থানীয় ৰাইজে সম্মুখীন হোৱা সমস্যাৰ বিষয়ে বিজেপি কর্মীসকল সম্পূর্ণৰূপে সচেতন হ’ব লাগিব আৰু অবৈধ অনুপ্ৰৱেশকাৰীৰ বাবে যিসকলে ভোগ কৰিছে তেওঁলোকৰ কষ্টৰ বিষয়ে জানিব লাগিব। স্থানীয় তথা খিলঞ্জীয়া লোকৰ অধিকাৰ বিজেপিয়ে ৰক্ষা কৰি আছে বুলি প্রধানমন্ত্রী মোদীয়ে উত্তৰ-পূবৰ শান্তি আৰু উন্নয়নৰ ওপৰত আলোকপাত কৰে। প্রধানমন্ত্রী মোদীয়ে উল্লেখ কৰে যে উত্তৰ-পূৰ্বাঞ্চলৰ বিভিন্ন সংগঠনৰ সৈতে চৰকাৰে ১২খন শান্তি চুক্তি স্বাক্ষৰ কৰিছিল। তেওঁ কয় যে বিজেপিৰ কৰ্মীসকলে মানুহক সোঁৱৰাই দিব লাগিব যে কেনেকৈ কংগ্রেছে আগতে কেৱল কাগজতহে চুক্তি কৰি শিৰোনাম সৃষ্টি কৰিছিল আৰু মানুহক বিপথে পৰিচালিত কৰিছিল। প্রধানমন্ত্রী মোদীয়ে আৰু কয় যে কংগ্ৰেছৰ আমোলত অসম হিংসাত জ্বলি থকা যুগ আমি দেখিছোঁ। অসমত অস্থিৰতাৰ দীর্ঘকাল দেখা গ’ল, কিন্তু কথাবোৰ যোৱা দশকত সলনি হৈছে। কিন্তু আজি আমি এক নতুন আত্মবিশ্বাস দেখিবলৈ পাওঁ, কিয়নো বিজেপিৰ ডাবল ইঞ্জিন চৰকাৰে শান্তিৰ বাবে যৎপৰোনাস্তি চেষ্টা কৰিছে। তামুলপুৰ সমষ্টিৰ ধনেশ্বৰ বসুমতাৰীৰ লগত হোৱা বাৰ্তালাপত প্রধানমন্ত্রী মোদীয়ে কয় যে অসমত কংগ্ৰেছ শাসনৰ সময়ত বিদ্রোহী আৰু ছাত্র সংগঠনৰ সৈতে কোনো চুক্তিয়ে কাম কৰা নাছিল। কংগ্রেছে বড়োসকলক বিশ্বাসঘাতকতা কৰিছিল। বিজেপিয়ে বড়োলেণ্ডত শান্তি প্রতিষ্ঠা আৰু যুৱক-যুৱতীসকলৰ ভৱিষ্যৎ সুৰক্ষিত কৰাৰ বাবে কাম কৰিছিল। আমি আন্তৰিকতাৰে শান্তি চুক্তি ৰূপায়ণ কৰিছোঁ। বিগত দশকত সৎ প্রচেষ্টাৰ জৰিয়তে কেনেকৈ শান্তি প্রতিষ্ঠা হৈছে অসমে প্রত্যক্ষ কৰিছে। তেওঁ কয়- মই আনন্দিত যে আজি শান্তি আছে। বড়োলেণ্ডে এসময়ত কার্ফিউ আৰু বোমাৰ শব্দৰ সন্মুখীন হৈছিল, কিন্তু আজি শান্তি আৰু স্থিতিশীলতা আছে। এইটো দেশৰ বাবে অন্যতম ডাঙৰ আৰ্হি, যিটো অঞ্চলত এসময়ত হিংসা দেখা গৈছিল, এতিয়া শান্তিৰ পথত আগবাঢ়িছে। বার্তালাপৰ আৰম্ভতে অসম বিজেপিৰ কৰ্মকর্তাসকলক আদৰণি জনাই প্রধানমন্ত্রী মোদীয়ে কয়- ময়ো আপোনালোকৰ দৰে কৰ্মকর্তা। মোক যি দায়িত্ব দিয়া হয়, সেই কর্তব্য মই পালন কৰোঁ। আজি বুথ পৰ্যায়ত আপোনালোকৰ সৈতে কথা পতাৰ সুযোগ পাইছোঁ। মই জানো আপোনালোক ব্যস্ত আৰু আপোনালোক সকলোৰে ‘মেৰা বুথ সবচে মজবুত’ৰ সংকল্পৰে ভৰি পৰিছে। ৰহা সমষ্টিৰ ডিম্পী দাসৰ সৈতে হোৱা বার্তালাপত প্রধানমন্ত্রী মোদীয়ে বিজেপিৰ আমোলত অসমত যুৱতী-নাৰীসকলে নির্ভয়ে ভয়-শংকা নোহোৱাকৈ বাহিৰলৈ ওলাব পাৰিছে। দেশৰ নাৰী শক্তিৰ সবলীকৰণৰ বাবে দলে যি কাম কৰি আছে, সেই সম্পর্কে তথ্য দি তেওঁ দৃঢ়তাৰে কয় যে বিজেপিৰ ডাবল ইঞ্জিন চৰকাৰ সমগ্ৰ ভাৰততে মহিলাৰ প্রথম পছন্দ। অসমৰ ‘অৰুণোদয়’ আঁচনি আৰু লাখপতি বাইদেউৰ কাৰ্যসূচীৰ দৰে ডাবল ইঞ্জিন চৰকাৰে কি কৰিব পাৰে, তাৰ সুফল দলৰ কৰ্মীসকলেও শিকিব বুলি মন্তব্য কৰে প্রধানমন্ত্রী মোদীয়ে। তিনিচুকীয়া জিলাৰ মাকুম সমষ্টিৰ অর্জুন গোৱালাৰ সৈতে বাৰ্তালাপ কৰা প্ৰধানমন্ত্ৰী নৰেন্দ্ৰ মোদীয়ে কয় যে দলীয় কর্মীসকলে চাহ বাগিচাত থকা বুথ পৰিদৰ্শন কৰিব লাগিব আৰু টিফিন সভা বা ‘চাই পে চর্চা’ৰ আয়োজন কৰি পূৰ্বতে মানুহে সম্মুখীন হোৱা কাহিনী আৰু সমস্যাৰ কথা শুনিব লাগিব। তেওঁ কয় যে চাহ বাগিচাৰ শ্ৰমিকসকলক দিয়া ভূমিৰ অধিকাৰে এনে হাজাৰ হাজাৰ পৰিয়ালৰ ভৱিষ্যৎ সুৰক্ষিত কৰাৰ লগতে তেওঁলোকৰ মৰ্যাদা সুনিশ্চিত কৰিব। তেওঁ কয়- চাহ বাগিচাৰ শ্ৰমিকসকলক দিয়া ভূমিৰ পট্টাই তেওঁলোকৰ এক পৰিচয় দিলে। ই কেৱল এখন কাগজ নহয়। প্রধানমন্ত্রী মোদীয়ে কয় যে এনডিএ চৰকাৰে বহু কাম কৰিছে যদিও আহিব লগা এনডিএ চৰকাৰৰ প্ৰতি কিন্তু মানুহৰ এতিয়াও বহু আশা আছে।