ফাগুনৰ আগমন
ৰাখী মণি কলিতা, হাজৰিকাপাৰা , দৰং
শীতৰ বিদায় বেলাত
নৱ জীৱনৰ খবৰ লৈ
আহে ফাগুন,
প্ৰকৃতিৰ বুকুত
ৰঙৰ আলেখ লিখি যায়।
শুকান পাতৰ মাজে মাজে
কুঁহিপাতৰ হাঁহি,
পলাশ-শিমলুৰ আভা
মৃদু বতাহত ভাঁহি আহে
প্ৰেমৰ অচিন চিনাকি গোন্ধ।
মনবোৰো যেন হালধীয়া হয়,
সূৰ্যৰ উষ্ণ আহ্বানত।
ফাগুন মাথোঁ ঋতু নহয়,
ই এক অনুভৱ ।
পুৰণি বেদনাক পাহৰি পেলাই
নতুন আশা বুকুত সজোৱা।
জীৱনো যেন ফাগুনৰ দৰে
এক নীৰৱ সাহস।