মুখ্য নির্বাচন আয়ুক্ত জ্ঞানেশ কুমাৰৰ নেতৃত্বত গুৱাহাটীত উপস্থিত নিৰ্বাচন আয়োগৰ প্ৰতিনিধি দল
ৰঙিলী বাৰ্ত্তাসেৱা- সমাগত অসম বিধানসভাৰ নিৰ্বাচন, ২০২৬ৰ প্ৰস্তুতিৰ অংশ হিচাপে তিনিদিনীয়া কাৰ্যসূচীৰে সোমবাৰে গুৱাহাটীত উপস্থিত হৈছে ভাৰতৰ মুখ্য নির্বাচন আয়ুক্ত জ্ঞানেশ কুমাৰৰ নেতৃত্বত নির্বাচন আয়োগৰ এটা প্রতিনিধি দল। সোমবাৰে বিয়লি লোকপ্রিয় গোপীনাথ বৰদলৈ আন্তর্জাতিক বিমানবন্দৰত উপস্থিত হোৱা নির্বাচন আয়োগৰ উক্ত প্রতিনিধি দলটোক ৰাজ্যিক মুখ্য নির্বাচনী বিষয়া অনুৰাগ গোৱেলে আদৰণি জনায়। নির্বাচন আয়োগৰ প্ৰতিনিধি দলটোৰ অন্যান্য বিষয়ববীয়াসকল হৈছে নির্বাচন আয়ুক্তদ্বয় ড° এছ, এছ. সান্ধু আৰু ড° বিবেক যোশী, জ্যেষ্ঠ উপ-নির্বাচন আয়ুক্তদ্বয় মনীশ গাৰ্গ আৰু ড° পৱন কুমাৰ শৰ্মা, সঞ্চালক প্রধান আশীষ গোৱেল, উপদেষ্টা এন, এন, বুটোলিয়া, সঞ্চালক বিদ্যাৰাণী কন্থৌজাম ইত্যাদি। দেশৰ নিৰ্বাচন আয়োগৰ উচ্চ পদস্থ বিষয়াৰ দলটোৱে আগন্তুক অসম বিধানসভাৰ সাধাৰণ নিৰ্বাচন, ২০২৬ সন্দর্ভত বিভিন্ন কার্যসূচী তথা বৈঠকত অংশগ্ৰহণ কৰিব। ১৭ ফেব্ৰুৱাৰীত মহানগৰীৰ ৰেডিছন ব্লু হোটেলত আয়োজন কৰা কাৰ্যসূচীত নির্বাচন আয়োগে ৰাজনৈতিক দলসমূহৰ প্ৰতিনিধিসকলৰ সৈতে আলোচনাত মিলিত হ’ব। এই আলোচনাত স্বীকৃতিপ্রাপ্ত ৰাষ্ট্ৰীয় পৰ্যায়ৰ ৰাজনৈতিক দল আৰু ৰাজ্যিক পৰ্যায়ৰ ৰাজনৈতিক দলৰ প্রতিনিধিসকলে অংশগ্ৰহণ কৰিব। তদুপৰি আয়োগে বিষয়াসকলে ৰাজ্যৰ আৰক্ষী মহাপৰিদৰ্শক, ক্ষেত্ৰীয় আৰক্ষী উপ- মহাপৰিদৰ্শক, জিলা নির্বাচন বিষয়া তথা দণ্ডাধীশ আৰু জ্যেষ্ঠ আৰক্ষী অধীক্ষকসকলৰ সৈতে ভোটগ্রহণৰ প্ৰস্তুতি সন্দর্ভত অনুষ্ঠিত হ’বলগীয়া এখন পর্যালোচনা সভাত অংশগ্ৰহণ কৰিব।নিৰ্বাচন আয়োগৰ প্ৰতিনিধিৰ অসম ভ্ৰমণৰ শেষৰ দিনটোত অৰ্থাৎ ১৮ ফেব্ৰুৱাৰীত আয়োগৰ বিষয়াসকলে উক্ত হোটেলতে ৰাজ্যৰ মুখ্য সচিব আৰু আৰক্ষী সঞ্চালক প্ৰধানৰ লগতে এনফ’চমেন্ট এজেঞ্চীৰ নোডেল তথা প্রধান বিষয়া, মুখ্য কার্যবাহী বিষয়া, ষ্টেট পুলিচ নোডেল অফিচাৰ, চি এ পি এফ নোডেল বিষয়া তথা সংশ্লিষ্ট বিভাগৰ জ্যেষ্ঠ বিষয়াসকলৰ সৈতে আলোচনাত মিলিত হ’ব। আনহাতে, ১৮ ফেব্ৰুৱাৰীৰ বিয়লিৰ ভাগত আয়োগৰ দলটোৱে এখন সংবাদ মেল সম্বোধন কৰিব আৰু বুথ পৰ্যায়ৰ বিষয়াসকলৰ সৈতে মত বিনিময় কৰিব।