জম্মু-কাশ্মীৰত ডাৱৰ বিস্ফোৰণ
ৰঙিলী বাৰ্ত্তাসেৱা- উত্তৰাখণ্ডৰ পিছত এইবাৰ জম্মু-কাশ্মীৰত ডাৱৰ বিস্ফোৰণ । জম্মু-কাশ্মীৰৰ কিষ্টৱাৰৰ চাচোতী অঞ্চলত বৃহস্পতিবাৰে সংঘটিত হয় ডাৱৰ বিস্ফোৰণৰ ঘটনা । এই ডাৱৰ বিস্ফোৰণত কমেও ২২ জন লোকৰ মৃত্যু হোৱাৰ লগতে আন কেইবাজনো লোক নিৰুদ্দেশ হৈ আছে । এই ভয়ংকৰ ঘটনাৰ পিছত ঘটনাস্থলীত উদ্ধাৰ আৰু ত্ৰাণকাৰ্যৰ বাবে দল পঠিওৱা হৈছে। ডাৱৰ বিস্ফোৰণৰ পাছতে ওফন্দি উঠিছে নদী সমূহ। চাচোতী গাঁৱৰ হিন্দু মন্দিৰ মাচৈল মাতা মন্দিৰৰ ৰান্ধনিশালত ভক্তসকলে খাদ্য গ্ৰহণ কৰি থকা অৱস্থাতে এই ঘটনাটো সংঘটিত হয়। তীব্ৰ শব্দৰে এই দুৰ্যোগৰ সৃষ্টি হোৱাৰ উপৰি পানীৰ তীব্ৰ সোঁত অঞ্চলটোত প্ৰৱেশ কৰে। কিষ্টৱাৰৰ উপায়ুক্ত পংকজ কুমাৰ শৰ্মাই কয়, “এতিয়ালৈকে ২২টা মৃতদেহ উদ্ধাৰ কৰা হৈছে । বৰ্তমান আহত লোকসকলক স্থানান্তৰিত কৰাৰ বাবে উদ্ধাৰ অভিযান চলি আছে । নিৰুদ্দেশ হোৱা লোকসকলক বিচাৰি উলিয়াবলৈও এক অনুসন্ধান অভিযান চলি আছে যদিও পৰিস্থিতি অতি ভয়াৱহ । কিমানজন লোক নিৰুদ্দেশ হৈছে তাৰ এতিয়ালৈকে কোনো তথ্য নাই ।” আনহাতে কেন্দ্রীয় গৃহ মন্ত্রী অমিত শ্বাহে এই ঘটনাত শোক প্রকাশ কৰিছে ৷ সামাজিক মাধ্যম এক্সযোগে কেন্দ্ৰীয় গৃহ মন্ত্ৰী অমিত শ্বাহে শোক প্ৰকাশ কৰি লিখে, “কিষ্টৱাৰ জিলাত সংঘটিত ডাৱৰ বিস্ফোৰণৰ সন্দৰ্ভত লেফটেনেণ্ট গৱৰ্ণৰ আৰু জম্মু-কাশ্মীৰৰ মুখ্যমন্ত্ৰীৰ সৈতে কথা পাতো । স্থানীয় প্ৰশাসনে সাহায্য আৰু উদ্ধাৰ অভিযান চলাই আছে । এন ডি আৰ এফৰ দলসমূহক তৎক্ষণাত ঘটনাস্থলীলৈ প্ৰেৰণ কৰা হৈছে । আমি পৰিস্থিতি অতি নিবিড়ভাৱে নিৰীক্ষণ কৰি আছোঁ আৰু প্ৰতিটো ক্ষেত্ৰতে জম্মু-কাশ্মীৰৰ জনসাধাৰণৰ সৈতে দৃঢ়তাৰে থিয় দি আছোঁ । প্ৰয়োজনীয় সকলো সহায়ৰ বাবে নিশ্চয়তা প্ৰদান কৰিছোঁ ।”