শ্বাহৰুখ খানক মৃত্যুৰ ভাবুকি দি গ্ৰেপ্তাৰ ছত্তীশগড়ৰ অধিবক্তা
ৰঙিলী বাৰ্ত্তাসেৱা- বলীউডৰ ছুপাৰষ্টাৰ শ্বাহৰুখ খানৰ বিৰুদ্ধে দিয়া মৃত্যুৰ ভাবুকিৰ সৈতে জড়িত ছত্তীশগড়ৰ অধিবক্তা ফৈজান খানক গ্ৰেপ্তাৰ কৰিছে মুম্বাই আৰক্ষীয়ে। যোৱা ৭ নৱেম্বৰত বান্দ্ৰা থানালৈ ফোন কলৰ জৰিয়তে জাৰি কৰা এই ভাবুকিটোত ৫০ লাখ টকাৰ দাবী কৰা হৈছিল। বিচৰা ধন নিদিলে শ্বাহৰুখ খানক হত্যা কৰাৰ ভাবুকি দিয়ে ফোন কৰাজনে। ফোন কৰাৰ সময়ত ব্যক্তিজনে নিজকে “হিন্দুস্তানী” বুলি পৰিচয় দি বিশেষভাৱে শ্বাহৰুখ খানৰ বাসগৃহ মান্নাত, বেণ্ডষ্টেণ্ডৰ কথা উল্লেখ কৰে। ফৈজান খানৰ মোবাইল ফোন ব্যৱহাৰ কৰি ফোনটো কৰা হৈছিল যদিও তেওঁৰ ফোনটো চুৰি হোৱা বুলি দাবী কৰিছিল, আৰু ইয়াৰ অপব্যৱহাৰৰ বিষয়ে তেওঁ অজ্ঞাত আছিল। তেওঁৰ এই দাবী সত্ত্বেও আৰক্ষীৰ তদন্তৰ ফলত ছত্তীশগড়ৰ ৰায়পুৰত ফৈজানক গ্ৰেপ্তাৰ কৰা হয়। ৰায়পুৰ আৰক্ষীয়ে নিশ্চিত কৰে যে ফৈজানে ২ নৱেম্বৰত তেওঁৰ ফোনটো চুৰি হোৱা বুলি জনাইছিল যদিও তদন্ত অব্যাহত থাকে, আৰু তেওঁক অধিক সোধা-পোছাৰ বাবে মুম্বাইলৈ অনা হয়।