ফাগুন- শিখা গোস্বামী মহন্ত

pc.-the janambhumi

ফাগুন

*
আৰুবেলি উৰি আহিছিল এখন চিলা
পলাশ আৰু মদাৰৰে ৰঙোৱা
সূতাত মেৰিয়াই এটা ভালপোৱাৰ কবিতা

**
ৰঙা কাপোৰ পিন্ধি নোলাবা পাৰ্বতী
বাহিৰত ফাগুন
চঞ্চল বা
চুলিত বাহ বান্ধিব জঁটীয়া

*
এখুজি দুখুজিকৈ পাৰি দিয়া বাটত ৰঙাৰ চাদৰ
গছৰ পাত সৰুৱাই কান্দি মৰে কোন
বাউলী ফাগুন

**
এইবেলি আহিল এখন চিঠি
চিলা হৈ চিঠিৰ ঠিকনা
আকাশলৈ চোৱা
চৰাই হৈ উৰিছে চিঠিৰ কথা
ফাগুনক জানো বান্ধিব পাৰি

শিখা গোস্বামী মহন্ত