কাছাৰৰ, লক্ষীপুৰত নাৰী অধিকাৰ সুৰক্ষাৰ বাবে আইন সচেতনতা শিবিৰ অনুষ্ঠিত
শিলচৰ,ৰঙিলী বাৰ্ত্তাসেৱা- কাছাৰ জিলাৰ লক্ষীপুর ব্লকস্থ শ্রীবৰ গাঁও পঞ্চায়ত কাৰ্যালয়ত এক বিশেষ আইন সচেতনতা শিবিৰ অনুষ্ঠিত হয়। নারী সুৰক্ষা আৰু ক্ষমতায়নৰ লক্ষ্যৰে আয়োজিত এই কাৰ্যসূচী “বেটি বচাও, বেটি পৰাও” পৰিকল্পনাৰ ১০ম বৰ্ষপূর্তি উদযাপনৰ অংশ হিচাপে গঠন কৰা হৈছিল। এই অনুষ্ঠানত ভাৰতীয় ন্যায় সংহিতা (BNS)-ৰ অধীনত নারীসকলৰ অধিকাৰ আৰু সুৰক্ষাৰ বিষয়ে গুৰুত্বপূৰ্ণ আলোচনা কৰা হয়।
এই সচেতনতা শিবিৰ “সঙ্কল্প: ডিস্ট্ৰিক্ট হাব ফৰ এমপাৱাৰমেন্ট অফ উইমেন”, মহিলা আৰু শিশু উন্নয়ন বিভাগ, কাছাৰ জিলাৰ আইনী সেৱা প্ৰাধিকৰণ (DLSA), আৰু অসম ৰাজ্যিক গ্ৰাম্য জীৱিকা মিছন (ASRLMS)ৰ যৌথ উদ্যোগত অনুষ্ঠিত হয়। এই অনুষ্ঠানত স্বনির্ভৰ গোট (SHG)-ৰ সদস্যসকল, জেণ্ডাৰ পইণ্ট পাৰ্ছনসকল, আৰু বহু সচেতন নাগৰিকে অংশগ্ৰহণ কৰে। শিবিৰটোৱে সমাজত নারী অধিকাৰৰ বিষয়ে জাননী বৃদ্ধি কৰাৰ লগতে ন্যায় বিচাৰৰ ক্ষেত্ৰত সজাগতা বৃদ্ধি কৰাৰ বাবে এক গুৰুত্বপূৰ্ণ ভূমিকা গ্ৰহণ কৰে।
অনুষ্ঠানত জিলাৰ আইনী সেৱা প্ৰাধিকৰণৰ সম্পাদক সালমা সুলতানাই নারীসকলৰ অধিকাৰৰ ক্ষেত্ৰত প্ৰযোজ্য বিভিন্ন আইনী ধাৰাৰ বিষয়ে গভীৰ ব্যাখ্যা আগবঢ়ায়। তেওঁ মহিলাসকলৰ আইনী জ্ঞান আৰু সজাগতাৰ গুৰুত্ব উপলব্ধি কৰাই দিয়ে। লগতে, নারী নিৰ্যাতন আৰু বৈষম্য ৰোধ কৰাৰ ক্ষেত্ৰত আইনী ব্যৱস্থাসমূহ কেনেকৈ সহায়ক হব পাৰে, সেই বিষয়ে বিস্তারিতভাৱে আলোচনা কৰে।
ওয়ান ষ্টপ চেণ্টাৰৰ প্ৰশাসক ৰূপালী আকুৰাই “মিচন শক্তি” পৰিকল্পনাৰ অধীনত মহিলাসকলৰ বাবে উপলব্ধ বিভিন্ন সাহায্যসেৱা সম্পৰ্কে বৰ্ণনা দিয়ে। তেওঁ কয় যে, সংকটত থকা মহিলাসকলক সহায় প্ৰদানৰ ক্ষেত্ৰত এই পৰিকল্পনাই এক উল্লেখযোগ্য ভূমিকা পালন কৰি আহিছে।
অসম ৰাজ্যিক গ্ৰাম্য জীৱিকা মিছনৰ (ASRLMS) ব্লক প্ৰোগ্ৰাম মেনেজাৰ শাৰ্লিবোম ৰংপিপি আৰু ব্লক কোঅৰ্ডিনেটৰ মোহন দেৱ-সহ আন বহুতো বিশিষ্ট ব্যক্তি উপস্থিত থাকে। তেওঁলোকৰ উপস্থিতিয়ে গ্রাম্য পৰ্যায়ত মহিলাসকলৰ আইনসচেতনতা বৃদ্ধি কৰাৰ লগতে সামূহিক সহযোগিতাৰ প্ৰয়োজনীয়তা প্রতিফলিত কৰে।
এই অনুষ্ঠানৰ জৰিয়তে মহিলাসকলক নিজৰ অধিকাৰ আৰু ন্যায় বিচাৰৰ ক্ষেত্ৰত অধিক সজাগ কৰি তোলাৰ প্ৰচেষ্টা হাতত লোৱা হয়। বক্তাসকলে পুনৰ পুনৰ এই কথা প্ৰকট কৰে যে, আইনী সজাগতা নাথাকিলে মহিলাসকলে ন্যায় বিচাৰৰ ক্ষেত্ৰত পিছ পৰি যাব পাৰে। সেয়ে সমাজৰ প্ৰতিটো স্তৰত মহিলাসকলৰ বাবে আইনসন্মত সহায় প্ৰদানৰ ক্ষেত্ৰত বিশেষ গুৰুত্ব আৰোপ কৰা হয়।
সার্বিকভাৱে, এই সচেতনতা শিবিৰটোৱে মহিলাসকলক আইনী অধিকাৰৰ বিষয়ে অবগত কৰাৰ লগতে, সামাজিক সুৰক্ষা আৰু ন্যায় বিচাৰৰ ক্ষেত্ৰত আগবাঢ়ি আহিবলৈ অনুপ্ৰাণিত কৰিছে।
শিলচৰৰ তথ্য আৰু জনসংযোগ বিভাগৰ আঞ্চলিক কাৰ্যালয়ৰ জৰিয়তে এই সংবাদ প্ৰকাশ কৰা হয়।