ৰমজান মাহ আৰু সন্তানৰ অভ্যাস গঠণত অভিভাৱকৰ কিছু কৌশল
ৰমজান মাহ ইছলাম ধৰ্মাৱলম্বী লোক সকলৰ বাবে এটা পৱিত্ৰ তথা মৰ্যদাশীল মাহ ।ইছলামৰ পাঁচটা খুঁটিৰ ভিতৰত ৰোজা অন্যতম । ইছলাম ধৰ্মত এগৰাকী সুস্থ সবল ব্যক্তিৰ বাবে ৰমজান মাহত ৰোজা ৰখাটো ফৰজ অৰ্থাৎ বাধ্যবাধক । এই মাহটোক সহানুভূতিৰ মাহ বুলি কোৱা হয় । এই মাহটোত মানুহৰ খোৱা বোৱা অৰ্থাৎ ৰিজিকৰ হিচাপ নোহোৱাকৈ বঢ়াই দিয়া হয় বুলি কোৱা হয় । এগৰাকী ৰোজাদাৰ ব্যক্তিক যিগৰাকী ব্যক্তিয়ে ইফতাৰ কৰাব তাৰ গোনাহ মোচন হ’ব । জাহান্নামৰ পৰা মুক্তি পাব । এই ৰমজান মাহ অৰ্থাৎ ত্ৰিশটা দিন তিনিটা ভাগত ভাগ কৰিছে প্ৰথম দহটাক ৰহমতৰ অংশ বুলি কৈছে । মাজৰ দহটাক এই অংশ ৰোজাৰ বিনিময়ত পাপ মাপ হ’ব বুলি বৰ্ণিত । তৃতীয় অংশত যিয়ে ৰোজা ৰাখিব জাহান্নামৰ পৰা মুক্তি পাব । সন্তান এটিৰ ৰোজা ফৰজ হয় সাত বছৰত । শিশুটিয়ে একেৰাহে দহ,এঘাৰ ঘণ্টা ইমান সময় লঘোনে থাকিব নোৱাৰে সহজে । সাত বছৰ পাৰ হ’লে যিহেতু ৰোজা বাধ্যবাধক তাৰ বাবে আমি শিশুটিক অভ্যাস কৰাব লাগে । সাত বছৰ পাৰ হোৱাৰে পৰা । শিশু সকল অনুকৰণ প্ৰিয় । সেয়েহে সাধাৰণতে দেখা যায় যেতিয়াই পিতৃ মাতৃ চেহেৰী গ্ৰহণ কৰিবলৈ উঠে । শিশুটিও আহাৰ গ্ৰহণ কৰিবলৈ ইচ্ছুক হয় । টোপনি ক্ষতি হয় বুলি বহু অভিভাৱকে শাসন কৰে নতুবা বিৰক্ত হোৱা দেখা যায় । এনে নকৰি শিশুটিক চেহেৰী গ্ৰহণ কৰিবলৈ দিব লাগে । দিনৰ আধা সময় লঘোন থকাৰ পিছত শিশুটিক খোৱাব লাগে আৰু মৰমেৰে বুজাই দিব লাগে । আজি আধা ৰোজা সম্পন্ন হ’ল । কাইলৈ আধা দিন লঘোনে থাকিলে এটা ৰোজা সম্পূৰ্ণ হ’ব । এনেদৰে কিছু কৌশল কৰি নিজৰ শিশুটিক ৰোজা ৰখাৰ অভ্যাস গঠণ কৰিব লাগে । ৰোজা ৰখাটো কেৱল ধৰ্মৰ কাৰণে ভাল সেইটোৱেই নহয় বিজ্ঞান সন্মত ভাৱে স্বাস্থ্যৰ কাৰণেও ভাল । শিশু এটিক সৰুৰে পৰা নীতি-নিয়ম শিষ্টাচাৰ,সু-সংস্কাৰেৰে গঢ়ি তোলাৰ দায়িত্ব অভিভাৱকৰ ।
নাজমিনা মজিদ
ধুবুৰী