লগৰীয়া
অমৃতৰ সন্ধানত ফুৰিলো মই
জীৱন সত্ত্বাৰ ঠিকনাৰ বাবে
চেকুৰাই হেপাহৰ ঘোৰা
দিহিঙে দিপাঙে
বিচাৰিলো সুখৰ সফুৰা
শলিতাৰ উত্তাপত চালো
সূৰ্য্যৰ তীব্ৰতা
মৰুভূমিত মৰিচিকাৰ উন্মাদনা
সময়ে কোবাই যোৱা বা-মাৰলিও
আশাভংগ হুমুনিয়াহবোৰ
তোমাৰ সান্নিধ্যত সাৰ পালে
শূন্যতে ঘূৰি ফুৰা সপোনবোৰ
দিঠকৰ ফুল সজালে
শিৰোনাম বিহীন কবিতাবোৰ
প্ৰাণময় হ’ল
বাস্তব মধুময়
কলিজাত বাঢ়িছে বাৰিষাৰ জোন
পোহৰৰ জোনাক চৌপাশে
ড° যুতিকা ওজা
গুৱাহাটী চিকিৎসা মহাবিদ্যালয়