মাতৃ দিৱস আয়োজনৰ প্ৰয়োজনীয়তা আছেনে …..
ভূমিষ্ঠ হোৱাৰ পিছতেই পৃথিৱীত প্ৰতিটো শিশুৱে যিখিনি নিৰাপদ ঠাই বিচাৰি পায় সেয়া মাতৃৰ কোলা । ওপজাৰ পিছত শিশুটিয়ে প্ৰথম মাত ফুটোতেই উচ্চাৰণ কৰা শব্দটোৱে ‘ মা’ । বহু উজাগৰী নিশা পাৰ কৰে মাতৃগৰাতীয়ে সন্তানটিক লালন পালন কৰোঁতে । গৰ্ভত ধাৰণ কৰা দিনটোৰ পৰা মাতৃগৰাকী পৃথিৱীত জীয়াই থকালৈকে সন্তানটিক মৰম আপডালৰ মাজত জীয়াই ৰাখিব বিচাৰে । এনেস্থলত মাতৃগৰাকী প্ৰতিগৰাকী সন্তানৰ মনত কেৱল অভিভাৱকেই নহয় দেৱীসদৃশ । একেদৰেই সন্তানেও যিমানেই জনা বুজা নহওঁক মাতৃগৰাকী তেওঁৰ জীৱনত প্ৰচ্ছাযাৰ দৰে থকাটো বিচাৰে ।
মাতৃ আৰু সন্তানৰ মাজত আবেগিক সম্পৰ্ক ইমান গভীৰ হোৱাৰ পিছত এগৰাকী মাতৃক মনত পেলাবলৈ সুকীয়াকৈ মাতৃদিৱসৰ প্ৰয়োজন আছেনে । সন্তানৰ বাবে প্ৰতিটো দিনেই মাতৃ দিৱস হোৱা উচিত । আমাৰ সমাজ খনত মাজে মাজে দুই চাৰিটা বিক্ষিপ্ত ঘটনা ঘটে যিসমূহে প্ৰতিগৰাকী মাতৃৰ মৰ্য্যাদাত কুঠাৰাঘাট কৰে । মাতৃগৰাকী যেতিয়া সন্তানৰ অৱহেলাত ফুটপাথৰ আলহি হ’ব লগা হয় , যেতিয়া পুত্ৰই মদ্যপান কৰিবলৈ মাতৃক ধন দাবী কৰি সেই ধন দিবলৈ মাতৃগৰাকী অসমৰ্থ হোৱাত তেওঁক হত্যা কৰা হয় এনেবোৰ ঘটনাই মাতৃৰ প্ৰতি থকা চৰম অৱহেলাকে সূচায় ।
কেতিয়াবা মনলৈ ভাব আহে অশেষ ত্যাগ আৰু ধৈৰ্য্যৰ মাজেদি বিভিন্ন ঘাট প্ৰতিঘাট , প্ৰত্যাহবান নেওচি ডাঙৰ কৰা সন্তানসকলৰ মনত যাতে এক গভীৰ সন্মানবোধ আৰু চেতনাবোধ জগাই তুলিব পৰা যায় তাৰ বাবে হয়তো কিছু সুকীয়া সময়ৰ প্ৰয়োজন । এই দিনটোত সমগ্ৰ প্ৰান্ততে মাতৃগৰাকীৰ অৱদানৰ কথা বহুল ভাৱে চিন্তা চৰ্চা কৰা কৰিব আৰু এয়াই হয়তো সমাজৰ বাবে এক জনজাগৰণ অনাত সহায়ক হ’ব ।
মানসী মিশ্ৰ