ৰাজ্যিক কেবিনেটৰ ৯৬৯ কোটি টকাৰ চাৰিটা বিনিয়োগ প্রস্তাৱত অনুমোদন
ৰঙিলী বাৰ্ত্তাসেৱা- মুখ্যমন্ত্রী ড° হিমন্ত বিশ্ব শৰ্মাৰ অধ্যক্ষতাত বুধবাৰে দিছপুৰৰ লোক সেৱা ভৱনত ৰাজ্য চৰকাৰৰ সাপ্তাহিক কেবিনেট বৈঠক অনুষ্ঠিত হয় । কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় । বৈঠকৰ অন্তত কেবিনেটৰ সিদ্ধান্তসমূহ সংবাদমেল যোগে সদৰী কৰে মুখ্যমন্ত্রী হিমন্ত বিশ্ব শৰ্মাই ।অসমত বিনিয়োগকাৰীক উৎসাহ যোগোৱাৰ লগতে বাণিজ্যিক লেয়াৰ ফাৰ্ম স্থাপনকে ধৰি ঝুমইৰ বিনন্দিনীৰ শিল্পীক বিত্তীয় সন্মান প্রদানকে ধৰি ৰাজ্যিক কেবিনেটে গ্রহণ কৰিলে কেইবাটাও গুৰুত্বপূৰ্ণ সিদ্ধান্ত।কেবিনেট সিদ্ধান্ত সন্দর্ভত সংবাদ মাধ্যমৰ আগত মুখ্যমন্ত্রী ড° শর্মাই কয় যে আছাম প্লেন্টেচনৰ কৰ্মচাৰীসকলক প্ৰদান কৰিবলগা ভিআৰএছৰ বাবে ৬ কোটি টকাৰ মঞ্জুৰি প্ৰদান কৰিছে কেবিনেটে। আনহাতে ৰাজ্যিক কেবিনেটে মুঠ ৯৬৯ কোটি টকাৰ চাৰিটা বিনিয়োগ প্রস্তাৱত অনুমোদন জনায়। এই বিনিয়োগৰ ফলত ২,৭০৪ গৰাকী শিক্ষিত যুৱক-যুৱতীয়ে সুযোগ পাব নিয়োগৰ। সেই অনুসৰি কেবিনেটে প্রিমিয়াৰ ক্ৰায়’জেনিকছ লিমিটেডৰ জাগীৰোডত ছেমিকণ্ডাক্টৰ গ্রেড গ্ৰেছ মেনুফেকচাৰিং প্রকল্প নিৰ্মাণৰ বাবে ১২৫ কোটি টকা বিনিয়োগৰ প্ৰস্তাৱত অনুমোদন জনায়। আনহাতে জোনালী কনষ্ট্ৰাকচন প্রাইভেট লিমিটেডৰ পৰ্যটন আৰু আতিথ্য সেৱাৰ সৈতে জড়িত মেৰিয়ট হোটেল আৰু ৰিজ’ৰ্ট প্ৰকল্পৰ বাবে প্রায় ১৮২ কোটি টকাৰ প্ৰস্তাৱ, অম্বুজা নেঅ’টীয়া হেল্থ কেয়াৰ ভেঞ্চাৰ লিমিটেডৰ হাস্পতাল প্রকল্পৰ বাবে প্রায় ৩০২ কোটি টকা আৰু অম্বুজা নেঅ’টীয়া হোটেল ভেঞ্চাৰ লিমিটেড প্ৰকল্পৰ বাবে ৩৬০ কোটি টকা, অম্বুজা নেঅ’টীয়া হেল্থ কেয়াৰ ভেঞ্চাৰ লিমিটেডৰ হাস্পতাল আৰু অম্বুজা নেঅটীয়া হোটেল ভেঞ্চাৰ লিমিটেডৰ হোটেল প্রকল্প দুটাৰ বাবে কেবিনেটে আজি অনুমোদন জনায়। ৰাজ্যিক কেবিনেটে ঝুমইৰ বিনন্দিনী অনুষ্ঠানত অংশগ্ৰহণকাৰী শিল্পী, কলা-কুশলীসকলক উৎসাহ প্রদান কৰাৰ বাবে ১২ অক্টোবৰত এককালীন মাননি প্রদানৰো সিদ্ধান্ত গ্রহণ কৰে। আনহাতে কেবিনেটে গোলাঘাটৰ দেৰগাঁৱত নর্থ-ইষ্ট এগ্র’ প্রডাক্টছ এণ্ড ছার্ভিচেছৰ দ্বাৰা বাহুবলী কণী উৎপাদনৰ বাবে বাণিজ্যিক লেয়াৰ ফাৰ্ম স্থাপনত অনুমোদন জনায়। ফার্মখন প্রায় ২৫-৩০ কোটি টকা বিনিয়োগেৰে স্থাপন কৰা হ’ব আৰু ই প্রায় ৭০০ প্রত্যক্ষ-পৰোক্ষ নিযুক্তিৰ সৃষ্টি কৰিব।