ইংলেণ্ডক জয়ৰ বাবে ৬০৮ ৰানৰ লক্ষ্য বান্ধি দিলে টীম ইণ্ডিয়াই
ৰঙিলী বাৰ্ত্তাসেৱা- বার্মিংহাম টেষ্টত ইংলেণ্ডক ৬০৮ ৰানৰ জয়ৰ লক্ষ্য বান্ধি দিলে টীম ইণ্ডিয়াই। প্রথম ইনিংছত ১৮০ ৰানৰ গুৰুত্বপূৰ্ণ অগ্রগতি লাভ কৰা ভাৰতীয় দলটোৱে অধিনায়ক শুভমন গিলৰ দৰ্শনীয় শতক, লোকেশ ৰাহুল, ঋষভ পন্ট আৰু ৰবীন্দ্ৰ জাদেজাৰ অর্ধশতকৰ সহায়ত ৬ উইকেটত ৪২৭ ৰান কৰি দ্বিতীয় ইনিংছ ঘোষণা কৰে। তৃতীয় দিনা এক উইকেটত কৰা ৬৪ ৰানৰ পৰা ইনিংছ মুকলি কৰিবলৈ আহি ভাৰতে ১২৬ ৰানত কৰুণ নায়াৰ আৰু লোকেশ ৰাহুলক হেৰুৱায়। নায়াৰে ২৬ ৰান কৰি বিদায় লয় যদিও ৫৫ ৰানৰ দৰ্শনীয় ইনিংছ খেলে। ইফালে, প্রথম ইনিংছত ২৬৯ ৰান কৰা অধিনায়ক গিলে দ্বিতীয় ইনিংছতো ১৬১ ৰানৰ দুৰ্দান্ত ইনিংছ খেলি ভাৰতীয় দলটোক শক্তিশালী স্থিতিত উপনীত কৰাৰ লগতে এক অভিলেখো স্থাপন কৰে। এখন টেষ্টত দ্বিশতক আৰু শতক অৰ্জন কৰা ভাৰতৰ প্ৰথমগৰাকী অধিনায়ক হিচাপে অভিলেখে গঢ়ে অধিনায়ক গিলে। গিলে পণ্টৰ সৈতে চতুর্থ উইকেটত ১১০ আৰু পঞ্চম উইকেটত জাদেজাৰ সৈতে ১৭৫ ৰান সংগ্ৰহ কৰে। গিলৰ ১৬২টা বলৰ ইনিংছটোত আছিল ১৩টা চাৰি আৰু আঠটা ছয়। ইফালে, পন্টে ৫৮টা বলত ৬৫ ৰান আৰু জাদেজাই ৬৯ ৰান কৰি অপৰাজিত হৈ থাকে। নীতিশ কুমাৰ ৰেড্ডীয়ে ১ আৰু সুন্দৰে ১২ ৰানত অপৰাজিত হৈ থাকে। ৬০৮ ৰানৰ জয়ৰ লক্ষ্য অনুসৰণ কৰিবলৈ আহি চতুর্থ দিনৰ খেলৰ অন্তলৈকে ইংলেণ্ডে দ্বিতীয় ইনিংছত তিনিটা উইকেট হেৰুৱাই মাত্র ৭২ ৰান সংগ্ৰহ কৰে। দিনান্তত আলি প’পে ২৪ আৰু হেৰী ব্ৰুকে ১৫ ৰান কৰি নটআউট হৈ থাকে। ৱেন ডাকেটে ২৫, জেক ক্র’লেই ০ আৰু ৰুটে ৬ ৰান কৰি বিদায় লয়। ভাৰতৰ হৈ আকাশ দীপে দুটা আৰু মহম্মদ চিৰাজে এটা উইকেট লাভ কৰে। হাতত এটা দিন আৰু ৭টা উইকেট বাকী থকা অৱস্থাত ইংলেণ্ডক জয়ৰ বাবে এতিয়াও ৫৩৬ ৰানৰ প্ৰয়োজন।