ৰাজ্যৰ চাহ শ্রমিকক প্ৰদান কৰা হ’ল ভূমিৰ পট্টা,সদনত গৃহীত বিধেয়ক
ৰঙিলী বাৰ্ত্তাসেৱা- অসম বিধানসভাৰ অধিৱেশনত গৃহীত হ’ল দ্য আছাম ফিক্সেচন অৱ চিলিং অন লেণ্ড হ’ল্ডিংছ (এমেণ্ডমেন্ট) বিধেয়ক। এই বিধেয়কৰ জৰিয়তে ৰাজ্যত তিনি লাখ ৩০ হাজাৰ চাহ শ্রমিকে দখল কৰি থকা মাটিতে লাভ কৰিব ভূমিৰ পট্টা। দীঘলীয়া বিতৰ্ক আৰু উত্তপ্ত পৰিস্থিতিৰ মাজতে চাহ শ্ৰমিকক মাটিৰ পট্টা দিয়াৰ বাবে বিধানসভাত উত্থাপন কৰা সংশোধনী আইন গৃহীত হোৱাৰ লগে লগে শাসকীয় দলৰ বিধায়কসকলে শ্ল’গান দি চৰকাৰখনৰ গুণানুকীৰ্তন কৰে । উল্লেখ্য যে ৰাজ্যৰ চাহ শ্ৰমিকসকলক ভূমিৰ পট্টা প্ৰদান কৰিব বুলি ইতিপূর্বে মুখ্যমন্ত্রী ড° হিমন্ত বিশ্ব শৰ্মাই কৰা ঘোষণা অনুসৰিয়ে চাহ বাগিচাৰ শ্রমিকে লাভ কৰিলে ভূমিৰ পট্টা। বিধানসভাত উত্থাপিত এই বিধেয়কখন পাৰিত কৰাৰ পূৰ্বেই মুখ্যমন্ত্রী ড° শৰ্মাৰ ঘোষণা- কংগ্ৰেছ চৰকাৰে বাগিচাৰ শ্ৰমিকসকলক দাসত্বৰ বান্ধোনত বান্ধি থৈছিল। বৰ্তমানৰ চৰকাৰে ২০০ বছৰৰ শ্ৰমৰ স্বীকৃতি দিলে শ্রমিকসকলক। কোনো চৰকাৰে পূৰ্বে এনে পদক্ষেপ ল’ব পৰা নাছিল। পূৰ্বৰ চৰকাৰৰ বাবে চাহ শ্রমিকসকল আছিল কেৱল ভোটবেংক। ৰাজহ মন্ত্রী কেশৱ মহন্তই বিধেয়কখন পাৰিতকৰণৰ বাবে সদনত বিধেয়খন উত্থাপনৰ পাছত হোৱা বিতৰ্কত অংশগ্রহণ কৰি মুখ্যমন্ত্রী ড° শৰ্মাই তেওঁৰ ভাষণত কয়- ৰাজহ চিলিং এখন ঐতিহাসিক আইন। এই আইনখন অনাত কংগ্ৰেছ দলৰ যি অৰিহণা তাক কোনেও নাকচ কৰিব নোৱাৰে, নিশ্চিতভাৱে ইয়াক স্বীকৃতি দিব লাগিব। কিন্তু এই লেণ্ড চিলিং আইনখন প্রস্তুত কৰোঁতে কংগ্রেছ দলে পদে পদে চাহ বাগিচাৰ মালিকসকলৰ সুৰক্ষাৰ কথাটো চিন্তা কৰিছিল। যেতিয়া লেণ্ড চিলিং আইনখন অন হৈছিল, আইনখনৰ ধাৰা ৪ (২)ত উল্লেখ কৰা হৈছে যে বাগিচাৰ মালিকে চাহ খেতি কৰা মাটিখিনিক বাদ দি অধিক মাটি ৰাখিব নোৱাৰিব। এই নিয়মলৈ ঠিকে আছিল যদিও আইনখনত আন এটা শব্দ উল্লেখ কৰি চাহ বাগিচাৰ মালিকৰ স্বাৰ্থৰ বাবে স্পষ্ট কৰা হ’ল যে চাহ খেতিৰ উপৰি আন মাটি বেলেগ কামৰ বাবে আৰু শ্ৰমিকৰ বাবে ৰাখিব পাৰিব। ইয়াৰ জৰিয়তে চাহ বাগিচাৰ মালিকক অধিক মাটি ভোগ কৰাৰ অধিকাৰ প্ৰদান কৰা হ’ল এই চিলিং আইনৰ জৰিয়তে। যি সময়ত কংগ্ৰেছে হাজাৰ হাজাৰ কৃষকক মাটিৰ অধিকাৰ দিছিল, সেই সময়ত কংগ্রেছ দলক আটাইতকৈ বেছি ভোট দিয়া চাহ শ্রমিকসকলক মাটিৰ অধিকাৰৰ পৰা বঞ্চিত কৰা হ’ল। মুখ্যমন্ত্ৰীয়ে পুনৰ কয়- চাহ বাগিচাৰ শ্ৰমিকসকলক কংগ্ৰেছ চৰকাৰৰ কাৰ্যকালত সদায়ে মালিকৰ দিশেৰেহে চোৱা হৈছিল। কিন্তু এই চৰকাৰে ২০০ বছৰ পিছত মালিক আৰু শ্ৰমিকৰ সম্পৰ্কৰ ঠাইত এজন স্বাধীন দেশৰ নাগৰিকৰ দৰে চাহ শ্রমিকে সমান অধিকাৰ পাব লাগিব। মালিক আৰু শ্রমিকৰ পৰিভাষাৰ পৰিৱৰ্তে এই চৰকাৰে মালিকৰ এটা ভোট, শ্ৰমিকৰ এটা ভোট এই পৰিচয়েৰে চাহ শ্রমিকসকলক আগুৱাই নিয়া হ’ব। এটা ধাৰণা আছে যে চাহ শ্রমিকসকল ৰাজনৈতিকভাৱে শক্তিশালী হ’লে চাহ খেতি কৰা লোকৰ অভাৱ হ’ব। কিন্তু এয়া ভুল ধাৰণা। আজি শ্ৰমিকসকলৰ বুকুৰ পৰাই নেতা, চিকিৎসক, অভিযন্তাৰ জন্ম হৈছে। তাৰ মানে এয়া নুবুজায় যে চাহ শ্রমিকৰ পৰিয়ালত শিক্ষিত লোকৰ জন্ম হ’ব আৰু চাহ বাগিচাৰ পাত কোনে তুলিব? প্রয়োজন হ’লে এতিয়া চাহ বাগিচাৰ মালিকৰ সন্তানেও পাত তুলিব। পৰিৱেশ আৰু পৰিস্থিতি গণতন্ত্রই সলনি কৰে। সেই দাসত্ব শৃংখলৰ পৰা স্থায়ীভাৱে চাহ শ্রমিকক মুক্তি দিবলৈ এই ঐতিহাসিক বিধেয়কখন বিধানসভাত অনা হৈছে। উল্লেখ্য যে বিধানসভাত গৃহীত হোৱা দ্য আছাম ফিক্সেচন অৱ চিলিং অন লেণ্ড হ’ল্ডিংছ (এমেণ্ডমেন্ট) বিধেয়কৰ জৰিয়তে ৰাজ্যৰ ৮২৫ বাগিচাৰ ৩,৩৩,৪৮৬টা চাহ শ্রমিক পৰিয়ালে লাভ কৰিব ২,১৮,৫৫৩ বিঘা ভূমিৰ স্বত্ব। তদুপৰি আবণ্টিত ভূমি ২০ বছৰ পৰ্যন্ত কৰিব নোৱাৰিব বিক্ৰী। কেৱল উন্নয়নৰ বাবে প্ৰতিষ্ঠানিক ঋণ লাভৰ ক্ষেত্ৰত বন্ধক ৰখাৰহে অনুমতি লাভ কৰিব। ২০ বছৰ উকলি গ’লে কেৱল সংশ্লিষ্ট বাগিচাখনৰ মাজতহে ক্রয়- বিক্ৰয় কৰিব পাৰিব। আনহাতে পট্টাপ্রাপ্ত শ্রমিকে ঘৰ নিৰ্মাণৰ বাবে চৰকৰী সাহায্য লাভৰ বাবেও যোগ্য হ’ব। বিধেয়কখনৰ জৰিয়তে যোগ্য ব্যক্তিক চিনাক্তকৰণ-পট্টন প্রক্রিয়া তদাৰকী কৰিবলৈ প্ৰতিখন বাগিচা পর্যায়ত কমিটী গঠনৰ ব্যৱস্থাৰ কথা উল্লেখ কৰা হৈছে। মুখ্যমন্ত্রী ড° শর্মাই বিধেয়কখন সন্দৰ্ভত পুনৰ কয়-প্রতিখন চাহ বাগিচাৰ শ্রমিকক এটা সময়ত যদি ২ লাখকৈও পুঁজি দিব পৰা যায় তেওঁলোকে বেংকৰ পৰা ঋণ লৈ একোটাকৈ ঘৰ নিৰ্মাণ কৰিব পৰিব। সেই দিশতো পৰৱৰ্তী সময়ত চৰকাৰে চিন্তা কৰিব। এই চৰকাৰখনে কনচালটেচন প্রচেছত বিশ্বাস কৰে। সেয়েহে এই বিধেয়কখন অনাৰ পূৰ্বে এচিএমএছ, চাহ জনজাতি ছাত্র সন্থা, আশা, বিচিএমএছ, জাতীয় মহাসভা সকলোৰে সৈতে এই বিধেয়কখনৰ বিষয়ে আলোচনা কৰা হৈছিল। সেই আলোচনাৰ সিদ্ধান্তৰ ভিত্তিতে এই বিধেয়কখন আজি প্রস্তুত কৰা হৈছে। এই বিধেয়কখনত সেয়েহে একমাত্র চৰকাৰৰ বক্তব্যয়েই নাই, আইনখনত শ্রমিকসকলৰ অৱদানো আছে। যোৱা ছমাহত চৰকাৰখনৰ যথেষ্ট কনচালটেচন, আলোচনাৰ মাজেৰে বিধেয়কখন আৰম্ভ কৰা হৈছিল। মই অসমৰ সকলো চাহ জনজাতি-আদিবাসী সমাজখনক আজিৰ এই ঐতিহাসিক মুহূর্তত অসম বিধানসভাৰ হৈ ধন্যবাদ-শুভকামনা যাচিছোঁ।