৭৬ তম স্বাধীনতা দিৱস উপলক্ষে মুখ্যমন্ত্ৰী ড॰ হিমন্ত বিশ্ব শৰ্মাই প্ৰদান কৰা ভাষণত ৰাইজৰ প্ৰতি জনোৱা আহ্বান আৰু ঘোষণা
দিছপুৰ,ৰঙিলী বাৰ্ত্তাসেৱা- ৰাইজৰ প্ৰতি আহ্বান
১. প্ৰতিগৰাকী সন্তানে নিজৰ পিতৃ মাতৃৰ উপযুক্ত যত্ন লওক৷ পিতৃ-মাতৃৰ সৈতে সময় কটোৱাৰ বাবে চৰকাৰী কৰ্মচাৰীক জানুৱাৰী মাহত তিনি দিনৰ ছুটী দিয়া হব৷
২. প্ৰকৃতি সুৰক্ষাত আমাৰ সকলোৰে গধূৰ দায়িত্ব আছে৷ স্বাধীনতাৰ অমৃতকালৰ সৈতে সংগতি ৰাখি একোজোপা অমৃত বৃক্ষ ৰোপণ কৰি আৰু তাৰ উপযুক্তভাৱে প্ৰতিপালন কৰি প্ৰকৃতি আৰু পৰিৱেশ সুৰক্ষাত জড়িত হওক৷
৩. নিজ নিজ অঞ্চলৰ একোটা অংগনৱাড়ী কেন্দ্ৰ প্ৰতিপালনৰ দায়িত্ব লৈ নাগৰিক হিচাপে নিজৰ সামাজিক দায়িত্ব পালন কৰক৷
৪ নিজৰ জন্ম গাঁওখনৰ বিকাশত অংশ লোৱাটো সকলোৰে নৈতিক দায়িত্ব৷ নিজৰ গাঁওখনলৈ বছৰি অন্ততঃ এবাৰকৈ ভ্ৰমণ কৰি সেৱা আগবঢ়াওক৷ গাঁও দিৱসৰ দৰে কাৰ্যসূচী পালন কৰি গাওঁখনক বিকাশৰ কেন্দ্ৰবিন্দু ৰূপে গঢ়ি তোলক৷
৫. আধুনিক কৃষি পদ্ধতিৰ সমান্তৰালভাৱে আমাৰ কৃষকসকলে জৈৱিক কৃষি পদ্ধতিটো আত্মনিয়োগ কৰক৷
৬. স্বাস্থ্যৰ উপযুক্তভাৱে যতন লোৱাত গুৰুত্ব দিয়ক৷ নিয়মিত প্ৰাতঃভ্ৰমণ আৰু সান্ধ্যঃভ্ৰমণ কৰক৷
৭. যিসমূহ পৰিয়ালত ঘৰুৱা সহায়ক আছে তেওঁলোকৰ প্ৰতি উপযুক্ত স্নেহভাৱ প্ৰদৰ্শন কৰিবলৈ আহ৩ান জনালো৷ তেওঁলোকক মৰ্যাদা আৰু আত্মসন্মানেৰে জীয়াই থাকিবলৈ সহায় কৰাৰ লগতে শিক্ষালাভৰ সুযোগ দিয়ক৷ ঘৰুৱা সহায়কক অত্যাচাৰ কৰা লোকৰ যাতে উপযুক্ত শাস্তি হয় তাৰ বাবে আইন প্ৰণয়ন কৰা হব৷
৮. দুৰ্নীতিৰ প্ৰতি আপোনালোক সজাগ হব লাগিব৷ চৰকাৰী কৰ্মচাৰীসকলক দুৰ্নীতিত জড়িত নহৈ সততা আৰু ন্যায়ৰ প্ৰতিমূৰ্তি হবলৈ আহ্বান জনালো৷
৯ সমাজক সময়ে সময়ে দুৰ্বল কৰি তোলা এক কাৰক হৈছে অস্পৃশ্যতা৷ ৰাইজক অস্পৃশ্যতা সমুলঞ্চে বিসৰ্জন দিবলৈ আহ্বান জনাইছোঁ৷
ঘোষণা-
১. ৰাজ্যবাসীক Universal Health Coverage প্ৰদান কৰা হব৷ প্ৰধানমন্ত্ৰী আয়ুস্মান কাৰ্ড ৰাজ্যৰ প্ৰতিটো বিপিএল পৰিয়াল আৰু ৰেচন কাৰ্ড থকা পৰিয়াল অৰ্থাৎ গাঁৱৰ ৮৫ শতাংশ আৰু নগৰৰ ৭৫ শতাংশ লোকক প্ৰদান কৰা হব৷
২. অসমৰ প্ৰায় ৪, ০০০ উচ্ছ আৰু উচ্ছতৰ মাধ্যমিক বিদ্যালয়সমূহৰ আন্তঃগাঁথনি উন্নীতকৰণৰ বাবে ১০, ০০০ কোটিটা ব্যয় কৰা হ’ব৷
৩. ন্যায়িক ব্যৱস্থাটোৱে যাতে নাগৰিকক ন্যায় দিয়ে আৰু তাকো ন্যুনতম সময়ত, তাৰ বাবে যিসমূহ অপৰাধমূলক গোচৰৰ অভিযোগ অতি গুৰুতৰ নহয়, তেনে গোচৰসমূহ উঠাই লোৱাৰ বাবে চৰকাৰে আদালতত আৰ্জি দিব৷ ২০২২ বৰ্ষৰ ১৪ আগষ্টৰ মাজনিশা পৰ্যন্ত ৰুজু হোৱা কম গুৰুতৰ গোচৰৰ ক্ষেত্ৰত চৰকাৰে এই ব্যৱস্ত্ৰা লোৱাৰ ফলত আদালতত প্ৰলম্বিত হৈ থকা প্ৰায় ১ লাখ গোচৰ নিষ্পত্তি হব৷
৪. সাম্প্ৰতিক বানত ক্ষতিগ্ৰস্ত লোকসকলক সাহায্য অহা ২০ আগষ্টৰ ভিতৰত প্ৰদান কৰা হব৷
৫. জলাশয়বোৰে প্ৰাকৃতিকভাবে জল ধাৰণ কৰাৰ উপৰি জলজ জৈৱ বৈচিত্ৰ্য সংৰক্ষণৰ দিশতো গুৰুত্বপূৰ্ণ ভূমিকৈ লৈ আহিছে৷ অসমৰ জলাশয়সমূহৰ গুৰুত্ব উপলব্ধি কৰি সেই সমূহৰ সংৰক্ষণৰ বাবে এখন আইন প্ৰণয়ন কৰা হব৷
৬.যিসমূহ পৰিয়ালৰ এটাতকৈ অধিক প্ৰজন্মই গো-চৰণীয়া পথাৰত বসবাস কৰি আহিছে তেনে পৰিয়ালসমূহক মাটিৰ পট্টা প্ৰদান কৰিবলৈ সিদ্ধান্ত লোৱা হৈছে৷
৭. অসমৰ জনজীৱনত প্ৰচলিত হৈ থকা একচনীয়া মাটিৰ ধাৰণাটোৰ বিলুপ্তিকৰণৰ বাবেও চৰকাৰে সিদ্ধান্ত গ্ৰহণ কৰিছে৷ এনেধৰণৰ একচনীয়া ভূমিত বসতি কৰি থকা লোকসকলক ম্যাদী পট্টা প্ৰদানৰ বাবে চৰকাৰে সিদ্ধান্ত গ্ৰহণ কৰিছে৷
৮. শিশুসকলৰ শাৰীৰিক, মানসিক, আবেগিক, বৌদ্ধিক আৰু সামাজিক বিকাশৰ বাবে অঙ্গনৱাড়ী কেন্দ্ৰসমূহে এক গুৰুত্বপূৰ্ণ ভূমিকা পালন কৰে৷ এই অংগনৱাড়ী কেন্দ্ৰসমূহৰ আন্তঃগাঁথনি উন্নত হ’লেহে শিশুসকলৰ বাবে আমি আনন্দদায়ক আৰু অবিৰত বিকাশ সম্ভব কৰিব পাৰিম৷ ৰাজ্যখনত সেইবাবে পোন্ধৰ হাজাৰ অঙ্গনৱাড়ী কেন্দ্ৰ গঢ়ি তুলিবলৈ সিদ্ধান্ত লোৱা হৈছে৷
৯. সম্প্ৰতি অসম চৰকাৰে লাচিত বৰফুকনৰ চাৰিশ বছৰীয়া জন্মজয়ন্তী উদযাপন কৰি আছে৷ লাচিত বৰফুকনৰ বিষয়ে ৰচনা লিখা কাৰ্যত সমগ্ৰ ৰাজ্যৰ জনসাধাৰণক জড়িত কৰি অসম বুৰঞ্জীৰ এই মহিমামণ্ডিত অধ্যায়টোৰ উদযাপন কৰিব খোজা হৈছে৷ সেই উপলক্ষে ৭ নবেম্বৰত মহাবীৰগৰাকীৰ জীৱনৰ ওপৰত এখনকৈ ৰচনা লিখিবলৈ ৰাজ্যবাসীক আহ৩ান জনোৱা হৈছে৷ ইয়াৰ বাবে প্ৰত্যেক ব্যক্তিকে একোখনকৈ মানপত্ৰ প্ৰদান কৰা হব৷
১০. হিংসাৰ পথ পৰিহাৰ কৰি সকলো উগ্ৰপন্ত্ৰী সংগঠনক শান্তিৰ পথলৈ উভতি আহিবলৈ আহ্বান জনালো৷