২০২৬ ৰ বিধানসভা নিৰ্বাচনৰ বাবে আম আদমি পাৰ্টীৰ প্ৰস্তুতি
শ্রমিক দল, অসমৰ সৈতে মিত্ৰতা কৰি আগন্তুক বিধানসভা নির্বাচনত অবতীর্ণ হোৱাৰ সিদ্ধান্ত
ৰঙিলী বাৰ্ত্তাসেৱা- আগন্তুক ২০২৬ চনত হ’ব লগা অসম বিধানসভা নির্বাচনত আম আদমি পাটীৰ নেতৃত্বত অসমৰ সৰু ডাঙৰ সকলো জাতীয় আৰু ৰাজনৈতিক দলক একত্ৰিত কৰি তৃতীয় শক্তি হিচাবে আগবাঢ়িব বিচাৰিছে। সেই উপলক্ষে গুৱাহাটীস্থিত জনজাতীয় জিৰণি চৰাৰ সভাকক্ষত আম আদমি পার্টী, অসম আৰু শ্রমিক দল, অসমৰ ৰাজ্যিক বিষয়ববীয়াৰ উপস্থিতিত এখন জৰুৰী সভা অনুষ্ঠিত হৈ যায়। সভাত আদিবাসী চাহ জনগোষ্ঠীক প্রতিনিধিত্ব কৰি প্ৰতিষ্ঠিত হোৱা শ্রমিক দল, অসম আৰু আম আদমি পার্টীয়ে আগন্তুক নির্বাচনত দুয়োটা দলে সমষ্টি বুজাবুজি আৰু একেলগে নির্বাচনত প্রতিদ্বন্দিতা কৰি বুলি সিদ্ধান্ত গ্রহণ কৰে। সভাত শ্রমিক দল, অসমৰ ৰাজ্যিক সভাপতি বীৰেণ মির্ধাই বিজেপি চৰকাৰে চৰকাৰ গঠন কৰিলে ১০০ দিনৰ ভিতৰত চাহ জনগোষ্ঠী আৰু আদিবাসী লোকসকলক জনজাতিকৰণৰ মৰ্যাদা দিম বুলি প্রতিশ্রুতি দি আজিলৈকে প্রতিশ্রুতিপুৰ নকৰাত বছৰৰ পিছত বছৰ ধৰি প্ৰতাৰণা কৰি অহা বুলি অভিযোগ উত্থাপন কৰে। তাৰোপৰি পূৰ্বৰ কংগ্ৰেছ আৰু এতিয়া বিজেপি চৰকাৰৰ দিনত অসমৰ চাহ বাগিছাসমূহত আদিবাসী অধ্যুষিত গাঁও সমূহত স্বাস্থ্য, শিক্ষা, যোগাযোগ ব্যৱস্থা আৰু আর্থ সামাজিক দিশত এই লোকসকল অতিকৈ পিছপৰি থাকি জীৱনৰ অনিশ্চয়তাত ভোগা বুলি উল্লেখ কৰে। সভাত আপ, অসমৰ ৰাজ্যিক সভাপতি ডাঃ ভবেন চৌধুৰীয়ে অসমৰ আদিবাসী আৰু চাহ জনগোষ্ঠীৰ লোকসকলৰ উত্তৰণৰ বাবে এই মিত্রতা অত্যন্ত জৰুৰী বুলি উল্লেখ কৰে। আপৰ আদিবাসী চাহ জনগোষ্ঠী গোটৰ সভাপতি মহাবীৰ বছে অসমৰ শ্রমিক মজুৰি বৃদ্ধি, ছাত্ৰ-ছাত্ৰীৰ বৃত্তি, খোৱাপানীৰ সুবিধাৰ প্রতিশ্রুতি, সুস্বাস্থ্যৰ আভুৱা-ভঁৰা বিজেপি, কংগ্ৰেছৰ ভুৱা প্রতিশ্রুতি বিৰুদ্ধে যুঁজ দিবলৈ আম আদমি পার্টী সম্পূর্ণ সাজু বুলি উল্লেখ কৰে।