সাহিত্য সমালোচক ড০ আনন্দ বৰমুদৈৰ অভিনন্দন গ্ৰন্থ উন্মোচন ড০ নগেন শইকীয়াৰ

এম হাছিম  আলী,ডিব্ৰুগড়,ৰঙিলী বাৰ্ত্তাসেৱা- অসমৰ এগৰাকী বিশিষ্ট সাহিত্য সমালোচক, ডিব্ৰুগড় বিশ্ববিদ্যালয়ৰ ইংৰাজী বিভাগৰ অৱসৰপ্ৰাপ্ত মুৰব্বী অধ্যাপক ড০ আনন্দ বৰমুদৈৰ অভিনন্দন গ্ৰন্থ ‘সমালোচনা কলা আৰু সাধনা’  ২৪ আগষ্টত উন্মোচন কৰে প্ৰথিতযশা সাহিত্যিক, মিতভাষ স্ৰষ্টা ড০ নগেন শইকীয়াই। ইয়াৰ লগতে সাহিত্য সমালোচক ড০ আনন্দ বৰমুদৈয়ে অসমীয়াৰ পৰা ইংৰাজীলৈ অনুবাদ কৰা পাঁচখনকৈ গ্ৰন্থ উন্মোচন কৰা হয়।  বিশিষ্ট কবি ড০ ফৰিদা আহমেদৰ কবিতা সংকলন ‘দি হেভেনলি স্কাই’ আৰু বিশিষ্ট কবি শ্বৰীফা খাতুন চৌধুৰীৰ কাব্য সংকলন “ক’পাৰ কালাৰ টাইম” উন্মোচন কৰে বিশিষ্ট কবি, সাহিত্যিক, সমালোচক ড০ কৰবী ডেকা হাজৰিকাই। তেওঁ উন্মোচন কৰি ভাষণ প্ৰসঙ্গত কয় যে কবিতা এটা বেলেগ ভাষালৈ অনুবাদ কৰা অত্যন্ত কঠিন কাম, কাৰণ সেই কবি জনৰ মনৰ ভাৱৰ সৈতে একাত্ম হৈ যাব লাগিব আৰু তেতিয়া হলে প্ৰকৃত ভাৱ ফুটি ওলাব। ইয়াৰ পাছত সত্যজিৎ গগৈৰ কাব্য সংকলন ‘এণ্ড এবান্দণ্ড হৰ্চকাৰ্ট’ উন্মোচন কৰে বিশিষ্ট কবি ডাঃ প্ৰণয় ফুকনে, ড০ কল্যাণ ভূঞাৰ ‘দি স্কাই অ’ভাৰ দি উইণ্ড’ আৰু প্ৰকল্প ৰঞ্জন ভাগৱতীৰ কাব্য সংকলন ‘দি অওল স্কাই’ উন্মোচন কৰে সমালোচক তথা ডিব্ৰুগড় বিশ্ববিদ্যালয়ৰ ইংৰাজী বিভাগৰ মুৰব্বী অধ্যাপক ড০ মৃদুল বৰদলৈয়ে। এই উপলক্ষে ডিব্ৰুগড়ৰ হোটেল গাৰ্ডেন ট্ৰীটত আয়োজিত এক অনুষ্ঠানত উল্লিখিত গ্ৰন্থকেইখন উন্মোচন কৰাৰ লগতে ড০ আনন্দ বৰমুদৈক ৰাজহুৱা সম্বৰ্ধনা জ্ঞাপন কৰা হয়। আয়োজক সকলৰ হৈ আদৰণি ভাষণ দিয়ে  ডাঃ প্ৰণয় ফুকনে। ডিব্ৰুগড় বিশ্ববিদ্যালয়ৰ উপাচাৰ্য ড০ জীতেন হাজৰিকাই প্ৰদান কৰা উদ্বোধনী ভাষণত ড০ বৰমুদৈৰ জীৱন-কৃতী সম্পর্কে আলোকপাত কৰি কয় যে আনন্দ বৰমুদৈ এজন বিশিষ্ট সাহিত্য সমালোচক।তেখেতৰ সমালোচনাৰ আৰ্হি নিৰপেক্ষ আৰু প্ৰেক্ষাপট কেন্দ্ৰীক বিচাৰ সম্পন্ন আৰু  সাহিত্যৰ তাত্বিক ধাৰণাসমূহ বিশেষকৈ পশ্চিমীয়া ধ্যান ধাৰণাৰ। তেখেতে সহজ-সৰল ৰূপত ভাৱবোৰ  তেখেতৰ গ্ৰন্থসমূহত আগবঢ়োৱা দেখা যায়। এনে আলোচনা উদাহৰণ ভিত্তিক হোৱা বাবে সকলোৰে বোধগম্য হৈছে। ড০ বৰমুদৈয়ে আধুনিক অসমীয়া সাহিত্যৰ বুৰঞ্জীক নতুন ধৰণে লিখি উলিয়াইছে। লেখকে যুগ একোটাক লৈ বিশাল বৃত্তান্ত গঢ়িবলৈ বিচৰা নাই যদিও যুগৰ সমাজ-জীৱনক বুজিবলৈ যিবোৰ পাঠ আগবঢ়াইছে সেয়া অতি প্রয়োজনীয়, সেই পাঠৰ আলোচনাত গুৰুত্ব দিছে। সেয়েহে পূৰ্বৰ সাহিত্যৰ বুৰঞ্জীত বিশেষ গুৰুত্ব নিদিয়া কিছুমান পাঠকো তেখেতে আলোচনালৈ আনি পাঠকক আধুনিক অসমীয়া সাহিত্যৰ গতি-প্রকৃতি সম্পর্কে নতুন ধাৰণা এটা দিব পাৰিছে ।বৰমুদৈ এগৰাকী বিশিষ্ট সাহিত্য সমালোচক হোৱাৰ উপৰিও এগৰাকী সহজ-সৰল লোক আৰু আদৰ্শ শিক্ষক।    ডিব্ৰুগড় বিশ্ববিদ্যালয়ৰ পৰা ড০ বৰমুদৈয়ে যথোচিত সন্মান লাভ নকৰাৰ বাবে তেওঁ উদ্বেগ প্ৰকাশ কৰে অৱশ্যে এই একটা কথাকে ডিব্ৰুগড় বিশ্ববিদ্যালয়ৰ  অৱসৰপ্ৰাপ্ত উপাচার্য ড০ কন্দৰ্প কুমাৰ ডেকাও কৈ আক্ষেপ কৰে। আকাশবাণী ডিব্ৰুগড় কেন্দ্রৰ ঘোষক স্বপ্নালী ভূঞাই আঁতধৰা অনুষ্ঠানত  কল্যাণ ভূঞা আৰু প্ৰকল্প ৰঞ্জন ভাগৱতীৰ দ্বাৰা সম্পাদিত ড০ বৰমুদৈৰ দ্বিভাষিক অভিনন্দন গ্ৰন্থখনি উন্মোচন কৰি অসম সাহিত্য সভাৰ প্ৰাক্তন  সভাপতি, মিতভাষ স্ৰস্টা ড০ নগেন শইকীয়াই কয় যে ড০ বৰমুদৈ এগৰাকী অসমীয়া আৰু ইংৰাজী দুয়োটা ভাষাৰ আজন্ম ছাত্ৰ আৰু শিক্ষক। ড০ বৰমুদৈ এগৰাকী প্ৰখ্যাত সাহিত্য সমালোচক যদিও তেওঁৰ ব্যক্তিত্বত কোনোদিনেই অহংকাৰ ভাৱ দেখা নাই। গহপুৰৰ এখন অখ্যাত গাঁৱৰ পৰা ওলাই আহি নিজৰ অধ্যৱসায়ৰ জৰিয়তে ডিব্ৰুগড় বিশ্ববিদ্যালয়ৰ এগৰাকী অধ্যাপক আৰু বিশিষ্ট সমালোচক হিচাপে যিদৰে প্ৰতিষ্ঠা লাভ কৰিলে সেয়া আশ্চর্যজনক কথা। সাহিত্যিক গৰাকীয়ে ড০ বৰমুদৈক অভিনন্দন জ্ঞাপন কৰি জ্ঞান অৰ্জনৰ তেওঁৰ যি স্পৃহা সেয়া সজীৱ হৈ থকাৰ লগতে তেখেতৰ কৰ্মই জাতীয় জীৱন সমৃদ্ধ কৰিব বুলি আশা প্ৰকাশ কৰে। অনুষ্ঠানত নিজৰ অনুভৱ ব্যক্ত কৰি ড০ বৰমুদৈয়ে সমালোচক সকলক ক্ৰিকেট খেলৰ ‘আম্পায়াৰ’ৰ স’তে তুলনা কৰি জৰ্জ বাৰ্ণাড শ্ব’ৰ উদ্ধৃতিৰে কয় যে আমাক প্ৰদান কৰা এই সম্বৰ্ধনা ঐতিহাসিক। কাৰণ বিশ্বত সমালোচকক সম্বৰ্ধনা জনোৱাৰ উদাহৰণ অত্যন্ত বিৰল। প্ৰসংগক্ৰমে ড০ বৰমুদৈয়ে গ্ৰন্থ সমালোচনা কৰিবলৈ গৈ বিভিন্নজন লেখক-কবিৰ পৰা লাভ কৰা ৰসাল অভিজ্ঞতাৰ কথা ব্যক্ত কৰি সকলোকে আপ্লুত কৰে আৰু সম্বৰ্ধনা জ্ঞাপনৰ বাবে সংশ্লিষ্ট সকলোকে ধন্যবাদ জ্ঞাপন কৰে। অনুষ্ঠানত পাঁচখন গ্ৰন্থৰ উন্মোচকে উন্মোচনী ভাষণ প্ৰদানৰ লগতে ড০ বৰমুদৈক উদ্দেশ্যি অভিনন্দন জ্ঞাপন আৰু বক্তব্য আগবঢ়ায়। অনাতাঁৰ শিল্পী বিপুল ফুকনৰ জ্যোতি সংগীত, দুলেন দত্তৰ জয়ন্ত হাজৰিকাৰ গীত, শিক্ষক সত্যশিখা দুৱৰা, নয়নজ্যোতি হাজৰিকাই প্ৰতিখন কাব্য পুথিৰে একোটিকৈ ইংৰাজী কবিতা পাঠ কৰা অনুষ্ঠানত সাহিত্য অনুবাদক, সাহিত্যিক দেৱীপ্ৰসাদ বাগড়োদিয়া,কামাখ্যা প্ৰসাদ তাচা, ডিব্ৰুগড় বিশ্ববিদ্যালয়ৰ অৱসৰপ্ৰাপ্ত উপাচার্য ড০ কন্দৰ্প কুমাৰ ডেকা, লেখিকা ড০ ভাৰতী দত্ত, কবি ডা০ ইন্টিকাবুৰ ৰহমান, ড০ শশীকান্ত শইকীয়া, ড০পল্লবী বুজৰবৰুৱা,ড০ প্ৰীতিতি বৰ্মন, ডাঃ জীতেন ভূঞাকে ধৰি চহৰখনৰ লগতে ৰাজ্যৰ বিভিন্ন প্ৰান্তৰ সাহিত্যিক, কবি আৰু লেখক-লেখিকা এই গাম্ভীর্যপূৰ্ণ অনুষ্ঠানত উপস্থিত থাকে।