শ্ৰীলংকাত প্ৰলয়ংকৰী বানৰ ফলত ৫৬জন লোকৰ মৃত্যু
ৰঙিলী বাৰ্ত্তাসেৱা– ধাৰাসাৰ বৰষুণৰ লগতে ভুমিস্খলনৰ ফলত বিপৰ্যস্ত হৈ পৰিছে শ্ৰীলংকা । প্ৰতিকূল বতৰৰ বাবে বৃহস্পতিবাৰৰ পৰা পৰিস্থতিৰ অৱনতি হৈছে দেশখনত । খবৰ অনুসৰি শ্ৰীলংকাৰ বান আৰু ভূমিস্খলনৰ ফলত প্ৰাণ হেৰুৱাইছে ৫৬জন লোকে। তদুপৰি ২১জন লোক সন্ধানহীন হৈ আছে । কমেও ৬০০ ঘৰ-বাৰী কম-বেছি পৰিমাণে ক্ষতিগ্ৰস্ত হোৱা বুলি জানিব পৰা গৈছে। কেৱল বাদুল্লা আৰু নুয়াৰা ইলিয়া অঞ্চলতে ভূমিস্খলনত ২৫জনৰো অধিক লোক মৃত্যুমুখত পৰিছে । অঞ্চলটোত ২১জন লোক সন্ধানহীন হৈ আছে আৰু ১৪জন লোক আহত হৈছে । দেশজুৰি ৰাস্তাই-ঘাটে পানী উঠাৰ ফলত পৰিবহণ ব্যৱস্থা বিপৰ্যস্ত হৈ পৰিছে । বহু ঠাইত ৰে’ল যোগাযোগ সম্পূৰ্ণৰূপে ব্যাহত হৈছে । ৰাস্তাৰ ওপৰত গছ, শিল আদি বাগৰি পৰাত পথ যোগাযোগ বিপন্ন হৈ পৰিছে । এনে পৰিস্থিতিত দেশখনৰ বিভিন্ন ঠাইত অনেক লোক আবদ্ধ হৈ পৰিছে । নৌসেনা বাহিনী আৰু আৰক্ষীয়ে উদ্ধাৰ অভিযান ক্ষিপ্ৰ কৰি তুলিছে । উদ্ধাৰকাৰীসকলে হেলিকপ্টাৰৰ সহায় লৈছে । সমগ্ৰ শ্ৰীলংকাতে অত্যাৱশ্যকীয় সেৱাসমূহক বাদ দি শুকুৰবাৰে চৰকাৰী বন্ধৰ দিন ঘোষণা কৰা হৈছে । ছাত্ৰ-ছাত্ৰীৰ পৰীক্ষাৰ স্থগিত ৰখা হৈছে ।