শিক্ষানুষ্ঠানৰ জয়ন্তী অনুষ্ঠানবোৰত প্ৰাক্তন শিক্ষাৰ্থীৰ ভূমিকা
ড°বুলজিৎ বুঢ়াগোহাঁই
আজাৰা,গুৱাহাটী
শিক্ষানুষ্ঠানসমূহৰ ৰূপালী জয়ন্তী, সোণালী জয়ন্তী, হীৰক জয়ন্তী, মহাৰজত জয়ন্তী আদি উপলক্ষ্যসমূহ কেৱল উৎসৱমুখৰ আয়োজনত সীমাবদ্ধ নহয়; এইবোৰ শিক্ষানুষ্ঠান আৰু সমাজৰ মাজত বিদ্যমান স্থায়ী সম্পৰ্কৰ এক জীৱন্ত প্ৰতিফলন । এই উপলক্ষ্যসমূহত আয়োজন কৰা অনুষ্ঠানত প্ৰাক্তন শিক্ষাৰ্থীসকলৰ সক্ৰিয় অংশগ্ৰহণ বিশেষভাৱে উল্লেখযোগ্য। তেওঁলোকৰ উপস্থিতি আৰু সক্ৰিয় অংশগ্ৰহণে অনুষ্ঠানবোৰক ঐতিহ্য আৰু সামাজিক সংযোগৰ ক্ষেত্ৰত অধিক সমৃদ্ধ কৰি তোলে। বহু বছৰ পূৰ্বে জ্ঞান আহৰণ কৰা সেই শিক্ষানুষ্ঠানলৈ পুনৰ উভতি আহি অতীত স্মৰণ কৰা, শিক্ষক-শিক্ষয়িত্ৰীসকলৰ প্ৰতি কৃতজ্ঞতা জনোৱা আৰু নিজৰ জীৱন অভিজ্ঞতা বিনিময় কৰা এই অনুষ্ঠানসমূহৰ এক গুৰুত্বপূৰ্ণ দিশ। এই অনুষ্ঠানসমূহত প্ৰাক্তন শিক্ষাৰ্থীসকলে শিক্ষানুষ্ঠানত অৰ্জন কৰা জ্ঞানৰ সহায়ত সমাজৰ বিভিন্ন ক্ষেত্ৰত আগবঢ়োৱা অৱদানসমূহৰ বিষয়ে বিশদভাৱে আলোচনা কৰে। সাহিত্য, বিজ্ঞান, সংগীত, নাটক, সাংবাদিকতা, কৃষি, উদ্যোগ, শিক্ষা, ব্যৱসায়, সমাজসেৱা, ৰাজনীতি, ক্ৰীড়া, চিত্ৰ-ভাস্কৰ্য আদি বিভিন্ন ক্ষেত্ৰত সফলতা অৰ্জন কৰা প্ৰাক্তন শিক্ষাৰ্থীসকলৰ অভিজ্ঞতা শুনি বৰ্তমানৰ শিক্ষাৰ্থীসকল অনুপ্ৰাণিত হয়। এই উদাহৰণসমূহে শিক্ষানুষ্ঠানৰ গুৰুত্বপূৰ্ণ ভূমিকাক স্পষ্টভাৱে প্ৰতিফলিত কৰে। ইয়াৰ উপৰিও, এনে অনুষ্ঠানসমূহে বৰ্তমানৰ শিক্ষাৰ্থীসকলক প্ৰাক্তন শিক্ষাৰ্থীসকলৰ সৈতে পোনপতীয়াকৈ মত-বিনিময় কৰাৰ এক গুৰুত্বপূৰ্ণ সুযোগ প্ৰদান কৰে। কেৰিয়াৰ নিৰ্বাচন, উচ্চশিক্ষা, প্ৰতিযোগিতামূলক পৰীক্ষা, দক্ষতা উন্নয়ন , উদ্যমিতা আদি দৰে বিষয়সমূহত প্ৰাক্তন শিক্ষাৰ্থীসকলৰ ব্যৱহাৰিক অভিজ্ঞতা বৰ্তমানৰ শিক্ষাৰ্থীসকলৰ বাবে অতি মূল্যবান সম্পদ হিচাপে কাম কৰে। পাঠ্যপুথিত উপলব্ধ নোহোৱা বহু বাস্তৱিক জ্ঞান এই আলোচনাসমূহৰ জৰিয়তে শিক্ষাৰ্থীসকলে সহজে আয়ত্ত কৰিবলৈ সক্ষম হয়। এনে অনুষ্ঠানসমূহৰ আন এক ইতিবাচক দিশ হ’ল প্ৰাক্তন আৰু বৰ্তমানৰ শিক্ষাৰ্থীসকলৰ মাজত এক দৃঢ় আৰু শক্তিশালী সম্পৰ্ক গঢ়ি তোলা। এই সম্পৰ্কৰ ফলস্বৰূপে শিক্ষানুষ্ঠানৰ উন্নয়ন, ছাত্ৰবৃত্তি প্ৰদান, আন্তঃগাঁথনি উন্নয়ন আৰু নতুন পাঠ্যক্ৰম আৰম্ভ কৰাৰ দৰে বিভিন্ন ক্ষেত্ৰত সহায় লাভ কৰিব পৰা যায়। বহু ক্ষেত্ৰত প্ৰাক্তন শিক্ষাৰ্থীসকলে শিক্ষানুষ্ঠানৰ উন্নয়নৰ বাবে আৰ্থিক অথবা প্ৰশাসনিক সহায় আগবঢ়াই সমাজৰ প্ৰতি থকা দায়বদ্ধতা প্ৰকাশ কৰে। শিক্ষানুষ্ঠানসমূহৰ জয়ন্তী বা শতবৰ্ষীয় অনুষ্ঠানসমূহ কেৱল স্মৃতিচাৰণতেই সীমাবদ্ধ নহৈ, এইবোৰ বৰ্তমান আৰু ভৱিষ্যৎ প্ৰজন্মৰ বাবে এক শক্তিশালী প্ৰেৰণাৰ উৎস হিচাপে পৰিগণিত হয়। এনে অনুষ্ঠানসমূহ সু-পৰিকল্পিতভাৱে আয়োজন কৰিলে শিক্ষানুষ্ঠান, শিক্ষাৰ্থী আৰু সমাজ—তিনিও সমানে উপকৃত হয়; ইয়াৰ বাবে সংশ্লিষ্ট কৰ্তৃপক্ষৰ সক্ৰিয় ভূমিকা অতি প্ৰয়োজনীয়।