যোৰাবাটৰ ১০ মাইলত সোঁতত উটি গৈ এজনৰ মৃত্যু
ৰঙিলী বাৰ্ত্তাসেৱা- গুৱাহাটী মহানগৰীত পুনৰ কৃত্রিম বানত প্রাণ গ’ল এজনৰ। বুধবাৰে বিয়লি মুষলধাৰ বৰষুণত সৃষ্টি হোৱা কৃত্রিম বানত মহানগৰীৰ যোৰাবাটত এজন লোকে অকাল মৃত্যুক সাবটি ল’বলগীয়া হয়। কৃত্রিম বানত উটি গৈ নলাত সোমাই মৃত্যু হোৱা ব্যক্তিজন সোণাপুৰৰ হাতীগড়ৰ দুর্গা শৰ্মা বুলি আৰক্ষীয়ে চিনাক্ত কৰিছে। আৰক্ষী সূত্রই জানিবলৈ দিয়া মতে, ১০ মাইলত এটা ব্যক্তিগত প্রতিষ্ঠানত কৰ্মৰত আছিল হাতীগড়ৰ দুর্গা শর্মা। বুধবাৰে বিয়লি প্রায় ৪.৩০ বজাত ঘৰলৈ উভতি যোৱাৰ সময়তে কৃত্রিম বানে ব্যক্তিজনক উটুৱাই নিয়ে। ফলত নলাত সোমাই ব্যক্তিজনৰ অকাল মৃত্যু ঘটে। স্থানীয় লোকে আৰক্ষীক খবৰ দিয়াত যোৰাবাট আৰক্ষী ঘটনাস্থলীত উপস্থিত হৈ নলাৰ কাষত শিলত লাগি থকা অৱস্থাত এছ ডি আৰ এফৰ সহযোগত ব্যক্তিজনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে জিএমচিএইচলৈ প্ৰেৰণ কৰে। কৃত্রিম বানত দুর্গা শর্মাই অকাল মৃত্যুক সাবটি লোৱাত সোণাপুৰৰ হাতীগড় অঞ্চলত শোকৰ ছাঁ পৰিছে।