যান-জঁটেৰে পৰিপূৰ্ণ বা বেয়া ৰাস্তাত টোল সংগ্ৰহ গ্রহণযোগ্য নহয়ঃউচ্চতম ন্যায়ালয়
ৰঙিলী বাৰ্ত্তাসেৱা- যদি কোনো ৰাস্তা যান-বাহন চলাচলৰ উপযোগী নহয়, তেন্তে তাত টোল সংগ্ৰহ কৰা সম্পূৰ্ণ ভুল।ভাৰতৰ উচ্চতম ন্যায়ালয় এই কথা স্পষ্ট কৰি দিছে।অসম্পূৰ্ণ ৰাস্তা, গাঁতযুক্ত ৰাস্তা বা য’ত যান-জঁটৰ সমস্যা থাকে, তেনে ৰাস্তাত টোল আদায় কৰা উচিত নহয়। ছুপ্রিম ক’ৰ্টে কেৰালা উচ্চ ন্যায়ালয়ৰ এটা ৰায় বাহাল ৰাখিছে, য’ত ত্রিশূৰ জিলাৰ পালিয়েক্কাৰা টোল বুথত টোল সংগ্রহ বন্ধ কৰাৰ নিৰ্দেশ দিয়া হৈছিল। ৬ আগষ্টত কেৰালা উচ্চ ন্যায়ালয়ৰ ডিভিজন বেঞ্চে নেচনেল হাইৱে ৫৪৪ৰ এডাপল্লি-মান্নুথি খণ্ডৰ বেয়া অৱস্থাৰ কাৰণে টোল সংগ্ৰহ ৪ সপ্তাহৰ বাবে বন্ধ কৰি প্ৰথমে ৰাস্তা মেৰামতিৰ নিৰ্দেশ দিছিল। এই ৬৫ কিলোমিটাৰ দৈৰ্ঘ্যৰ খণ্ডত টোল সংগ্ৰহৰ ওপৰত নিষেধাজ্ঞাৰ বিৰুদ্ধে ৰাষ্ট্ৰীয় ৰাজপথ প্ৰাধিকৰণ (এনএইচএআই) আৰু ৰাস্তাৰ ৰক্ষণাবেক্ষণ তথা টোল সংগ্ৰহৰ দায়িত্বত থকা কোম্পানীয়ে উচ্চতম ন্যায়ালয়ত আপিল কৰিছিল। তেওঁলোকৰ যুক্তি আছিল যে ৰাস্তাৰ কেৱল সীমিত অংশতহে বাধা আছে। প্রধান ন্যায়াধীশ বি আৰ গাৱাই আৰু ন্যায়াধীশ কে বিনোদ চন্দ্ৰনে কেৰালা উচ্চ ন্যায়ালয়ৰ ৰায় সলনি কৰিবলৈ অস্বীকাৰ কৰিছে। শুনানিৰ সময়ত ন্যায়ালয়ে ৰাস্তাৰ বেয়া অৱস্থা আৰু তাত সৃষ্ট যান-জঁটৰ উল্লেখ কৰিছিল। ন্যায়ালয়ে কৈছিল, “য’ত এঘণ্টাৰ দূৰত্ব ১২ ঘণ্টাত পাৰ কৰিবলগীয়া হয়, তেনে ৰাস্তাত টোল সংগ্ৰহৰ অনুমতি কিয় দিয়া হ’ব? মানুহে এনে ৰাস্তাত যাতায়াতৰ বাবে ১৫০ টকা কিয় দিব?” উচ্চতম ন্যায়ালয়ে কেৰালা উচ্চ ন্যায়ালয়ৰ সেই টিপ্পনীৰ সৈতে একমত পোষণ কৰিছে, য’ত ক’র্টে কৈছিল, “এইটো সঁচা যে হাইৱে ব্যৱহাৰৰ বাবে মানুহে টোল শুল্ক দিবলৈ বাধ্য, কিন্তু এনএইচএআইৰো দায়িত্ব যে তেওঁলোকে বা তেওঁলোকৰ এজেন্টে বাধাহীনভাৱে মসৃণ যাতায়াত নিশ্চিত কৰিব। জনসাধাৰণ আৰু এনএইচএআইৰ মাজৰ সম্পৰ্ক বিশ্বাসৰ বান্ধোনত বান্ধ খাই আছে। এই বিশ্বাস ভংগ কৰি আইনৰ আশ্ৰয় লৈ জনসাধাৰণৰ পৰা টোল শুল্ক আদায় কৰাটো ভুল। এনএইচএআই বা তেওঁলোকৰ এজেণ্টক এনে অধিকাৰ দিয়া নাযায়। যেতিয়া ৰাস্তাত মানুহে ইতিমধ্যে কষ্টৰ সন্মুখীন হৈছে, তেতিয়া তেওঁলোকক টকা দিবলৈ বাধ্য কৰিব নোৱাৰি।”উচ্চতম ন্যায়ালয়ে তেওঁলোকৰ ৰায়ত উল্লেখ কৰিছে যে টোল বুথত প্ৰায়ে কৰ্মচাৰীৰ সংখ্যা কম থাকে আৰু তেওঁলোকৰ কামৰ ভাৰ বেছি হয়। কৰ্মচাৰীসকলে প্ৰায়ে ৰজাৰ দৰে ব্যৱহাৰ কৰে। মানুহে দীঘলীয়া শাৰীত নিজৰ পালৰ বাবে অপেক্ষা কৰি থাকিবলগীয়া হয়, কিন্তু তাত কাৰো কোনো পৰিৱৰ্তন নহয়। গাড়ীৰ ইঞ্জিন চালু হৈ থাকে, যাৰ ফলত মানুহৰ ধৈৰ্য আৰু পকেটৰ ওপৰত প্ৰভাৱ পৰাৰ উপৰি পৰিৱেশৰ ওপৰতো বিৰূপ প্ৰভাৱ পৰে।