মা তুমি অনন্যা
লখিমী শৰ্মা
যোৰহাট
এই ধৰাৰ বুকুলৈ আনিলা তুমি আই
অন্তৰৰ কোনোবা নিভৃত কোণৰ পৰা যেন ,
নিজৰি বয় দেৱ আৰাধনাৰ মন্ত্ৰোচ্চাৰণ
য’ত বাৰম্বাৰ প্ৰতিধ্বনিত হয়
হে অন্তঃ জ্ঞান সলিলা আই মাতৃ
তোমাক শত সহস্ৰ প্ৰণাম …….
জন্ম হৈয়ে চকু মেলি দেখিলোঁ
তোমাৰ মুখমণ্ডল ,
মা তোমাৰ হিয়াভৰা মৰমত
আপোন পাহৰা হওঁ আমি ,
তুমি অতুলনীয়
তুমি অনন্যা ,
তুমিয়েই মানৱ জাতিৰ
হৃদয় , তুমিয়েই ধৰণী ধৰোঁতা …….
প্ৰথম স্পৰ্শ হ’লা তুমি
প্ৰথম শব্দ হ’লা তুমি
প্ৰথম দেখা নাৰী
গৰাকীয়েই হ’লা তুমি ,
এই ধৰণীৰ লগত
চিনাকি কৰাই ,
তুমিয়েই দিলা মোক
সৰ্বোতম উপহাৰ !
নিজে লুকাই লুকাই উচুপি থাকি
সন্তানৰ মুখত হাঁহি আনিবলৈ
চেষ্টা কৰা গৰাকীয়েই হ’লা তুমি ,
তোমাৰ চৰণত অৰ্পিত আমাৰ জীৱন
ভালে থাকা আই মাতৃ আজীৱন ,
মা তোমালৈ মনত পৰিলে
স্মৃতিয়ে আমনি কৰে বৰকৈ ,
পাৰিলে , সময় পালে মোৰ কাষলৈ
উভতি আহিবাছোন ,
মই যে ভাগৰি পৰিছোঁ সঁচাকৈ
এপলক জিৰাব দিয়া
তোমাৰ আচলৰ তলত ,
শৈশৱৰ সেই নিচুকনি গীত গাই
মোক টোপনি যাবলৈ
দিবানে আকৌ এবাৰ ।।।