মানৱেন্দ্ৰ শৰ্মা কমপ্লেক্সত প্ৰদেশ কংগ্ৰেছৰ যোগদান কাৰ্যসূচী
ডাঃ শংকৰজ্যোতি কুটুম, যোগেশ্বৰ কলিতাসহ অগপ-বিজেপি-ইউপিপিএলৰ ২ শতাধিক নেতা-কৰ্মীৰ যোগদান
ৰঙিলী বাৰ্ত্তাসেৱা- গুৱাহাটীৰ মানৱেন্দ্ৰ শৰ্মা কমপ্লেক্সত আজি অসম প্ৰদেশ কংগ্ৰেছ কমিটীৰ এখন বিশাল যোগদান সভা অনুষ্ঠিত হয়। এই যোগদান সভাত প্ৰাক্তন অগপ নেতা তথা অসম বিধানসভাৰ প্ৰাক্তন অধ্যক্ষ গণেশ কুটুমৰ পুত্ৰ ডাঃ শংকৰজ্যোতি কুটুম, অবড়ো সুৰক্ষা সমিতিৰ সভাপতি যোগেশ্বৰ কলিতাসহ বিজেপি, অগপ, ইউপিপিএলকে ধৰি একাধিক ৰাজনৈতিক দল আৰু জাতীয় সংগঠনৰ দুই শতাধিক নেতা-কৰ্মীয়ে আনুষ্ঠানিকভাৱে কংগ্ৰেছত যোগদান কৰে। নিখিল ভাৰত কংগ্ৰেছ কমিটিৰ সংবাদ মাধ্যম আৰু যোগাযোগ বিভাগৰ অধ্যক্ষ পৱন খেৰা, বিভাগটোৰ অসমৰ তত্ৱাৱধায়কৰ দায়িত্বত থকা চৰণ সিং চাপ্ৰা আৰু প্ৰদেশ কংগ্ৰেছৰ সভাপতি গৌৰৱ গগৈৰ উপস্থিতিত আজি কংগ্ৰেছ দলত যোগ দিয়া প্ৰত্যেকেই অনাগত নিৰ্বাচনত দুৰ্নীতিপৰায়ণ হিমন্ত বিশ্ব শৰ্মা নেতৃত্বাধীন বিজেপি চৰকাৰক ওফৰাই পেলাবলৈ সংকল্প গ্ৰহণ কৰে। ওদালগুৰি জিলা বিজেপিৰ সদস্য খগেন চন্দ্ৰ বড়ো, ইউপিপিএলৰ কাৰ্যনিৰ্বাহক কমিটিৰ সদস্য বিৰখাং বড়ো, প্ৰতিষ্ঠাপক উপ-সভাপতি ৰাফেল দৈমাৰী, হৰিশিঙাৰ ইউপিপিএলৰ যুৱ নেতা ৰিংছাৰ বাগলাৰী, ইউপিপিএল নেতা কাতিৰাম বড়ো, ছাদিক আলী আৰু ফজিৰ আলীয়েও আজি আনুষ্ঠানিকভাৱে কংগ্ৰেছ দলত যোগ দিয়ে। আজিৰ সভাখনত কেবাগৰাকী অধিবক্তা, সমাজ সংগঠক আৰু যুৱ সমাজকৰ্মীয়েও কংগ্ৰেছ দলত যোগ দিয়ে। এইসকলৰ ভিতৰত অন্যতম হৈছে অধিবক্তা শ্বাহ নৱাজ আৰু গোৰেশ্বৰৰ যুৱ সংগঠক কুলদ্বীপ ৰাজবংশী। কংগ্ৰেছৰ ৰাষ্ট্ৰীয় নেতা পৱন খেৰাই আজিৰ যোগদান সভাত যোগ দিয়া সকলোকে দলটোলৈ স্বাগতম জনাই আৰু নিজৰ চমু ভাষণত নতুন উদ্যমেৰে দুৰ্নীতিপৰায়ণ হিমন্ত বিশ্ব শৰ্মাৰ চৰকাৰখনৰ কবলৰ পৰা অসমৰ ৰাইজক মুক্তি দিয়াৰ হকে প্ৰতিগৰাকী কংগ্ৰেছ কৰ্মীকে কাম কৰিবলৈ আহ্বান জনায়। সভাখনত ভাষণ প্ৰদান কৰি প্ৰদেশ কংগ্ৰেছৰ সভাপতি গৌৰৱ গগৈয়ে কয় যে নিৰ্বাচনলৈ যিমানেই দিন চমু চাপিছে সিমানেই অসমত কংগ্ৰেছৰ শক্তি বৃদ্ধি হৈ গৈ আছে বাবে হিমন্ত বিশ্ব শৰ্মা শংকিত হৈ পৰিছে। ”ছেপ্টেম্বৰ মাহৰ ১০ তাৰিখৰ পৰা প্ৰতিটো মাহৰ ১০ তাৰিখতে অসমৰ সকলোতে বিভিন্ন দল-সংগঠনৰ পৰা মানুহে কংগ্ৰেছত যোগ দি আছে। আজিৰ দৰে এনেকৈ ১০ তাৰিখৰ আগতেও যোগদান সভা পাতিবলগীয়া হৈছে। কংগ্ৰেছ দল আজি শক্তিশালী হৈ উঠিছে।’’- গগৈয়ে কয়। আজি কংগ্ৰেছত নতুনকৈ যোগ দিয়া প্ৰতিজন নেতা-কৰ্মীৰ সাহসী আৰু সময়োচিত সিদ্ধান্তৰ বাবে আৰু অসমৰ জনতাইয়ো সাহস পাব বুলিও কয় প্ৰদেশ কংগ্ৰেছৰ সভাপতিগৰাকীয়ে। আনহাতে, সভাখনত ভাষণ প্ৰদান কৰি প্ৰাক্তন সাংসদ ৰিপুণ বৰাই কয়, ”মুখ্যমন্ত্ৰী হিমন্ত বিশ্ব শৰ্মাৰ চৰকাৰে যোৱা ৫ বছৰত হিতাধিকাৰী সৃষ্টি কৰাৰ বাদে প্ৰকৃতাৰ্থত ৰাজ্যখনৰ উন্নতি হ’ব পৰা একো কৰা নাই। ঋণৰ উপৰি ঋণ লৈছে। নিৰ্বাচনী বৈতৰণী পাৰ হ’বলৈ অসমখনক অৰ্থনৈতিকভাৱে বিধ্বস্ত কৰিছে।’’ তেওঁ আৰু কয় যে চাট জিপিটি, গ্ৰ’ক, জেমিনি আদি প্ৰতিটো এআইক ভাৰতৰ আটাইতকৈ দুৰ্নীতিগ্ৰস্ত মুখ্যমন্ত্ৰী কোন বুলি সুধিলে অসমৰ মুখ্যমন্ত্ৰী হিমন্ত বিশ্ব শৰ্মা বুলি উত্তৰ দিয়ে। হিমন্ত বিশ্ব শৰ্মাৰ এনে কাৰ্যত অসমবাসী লজ্জিত হ’বলগীয়া হৈছে বুলিও কয় বৰাই। তেওঁ আৰু কয় যে অতি নিৰ্লজ্জ, হাস্যকৰ, টুলুঙা মন্তব্যৰে মুখ্যমন্ত্ৰীৰ চকীখনৰ গৰিমা হ্ৰাস কৰা মুখ্যমন্ত্ৰী ইয়াৰ পূৰ্বে অসমৰ জনতাই কাকো দেখা নাছিল। আজিৰ এই যোগদান সভাখনত প্ৰাক্তন সাংসদ আৰ পি শৰ্মা, আব্দুল খালেক, প্ৰাক্তন বিধায়ক সত্যব্ৰত কলিতা, বিনন্দ শইকীয়াকে ধৰি কংগ্ৰেছ দলৰ কেবাগৰাকী জ্যেষ্ঠ নেতা উপস্থিত আছিল৷