মাজুলী মহাবিদ্যালয়লৈ বৈষ্ণৱ প্ৰভাত বৰা বুঢ়াভকতৰ গ্ৰন্থদান

বিকাশ শইকীয়া, মাজুলী,ৰঙিলী বাৰ্ত্তাসেৱা- মাজুলীৰ প্ৰাচীনতম উচ্চ শিক্ষানুষ্ঠান মাজুলী মহাবিদ্যালয়লৈ বিশিষ্ট বৈষ্ণৱ প্ৰভাত বৰা বুঢ়াভকতে আগবঢ়ালে দুহেজাৰ গ্ৰন্থ। নতুন কমলাবাৰী সত্ৰৰ জ্যেষ্ঠ বৈষ্ণৱ, মাজুলী জিলা সাহিত্য সভা, সন্মিলিত শিল্পী সমাজকে মুখ্য কৰি কেইবাটাও অনুষ্ঠানৰ প্ৰতিষ্ঠাপক সভাপতি, সমাজকৰ্মী, শিল্পী পেঞ্চনাৰ  প্ৰভাত বৰা বুঢ়াভকতে আজি মহাবিদ্যালয়খনলৈ আহি নিজ হাতে অধ্যক্ষ ডঃ দেৱজিৎ শইকীয়াৰ হাতত নিজৰ সংগৃহীত গ্ৰন্থসমূহ দান কৰে। ২০১৬ চনৰ ০৮ অক্টোৱৰৰ পৰা শিক্ষাৰ্থীৰ মাজত অধ্যয়নস্পৃহা বৃদ্ধিৰ লগতে  পুথিভঁৰাললৈ গ্ৰন্থ সংগ্ৰহৰ উদ্দেশ্যে মাজুলী মহাবিদ্যালয়ে গ্ৰহণ কৰা ‘গ্ৰন্থদান মহান দান’ শীৰ্ষক কাৰ্যসূচীত ভাগ লৈ বৈষ্ণৱ প্ৰভাত বৰা বুঢ়াভকতে প্ৰদৰ্শন কৰা এই মহানুভৱতাৰ প্ৰতি কৃতজ্ঞতা জনাবলৈ আজি মহাবিদ্যালয়ৰ অধ্যক্ষৰ কক্ষত এখন বিশেষ সভাৰ আয়োজন কৰা হয়। মহাবিদ্যালয়ৰ গ্ৰন্থাগাৰিক প্ৰদীপ চন্দ্ৰ দাসে আঁত ধৰা সভাত সভাপতিত্ব কৰি মহাবিদ্যালয়ৰ অধ্যক্ষ ডঃ দেৱজিৎ শইকীয়াই প্ৰভাত বৰা বুঢ়াভকতে প্ৰদৰ্শন কৰা উদাৰতাৰ বাবে তেওঁক কৃতজ্ঞতা জনোৱাৰ লগতে অনাগত সময়তো মহাবিদ্যালয়খনিলৈ তেওঁ সহায়-সহযোগিতা আগবঢ়াই যাব বুলি আশা কৰে। মাজুলী মহাবিদ্যালয় পৰিয়ালে বুঢ়াভকতৰ এই মহৎ দানৰ কথা কোনোকালে নাপাহৰে বুলি উল্লেখ কৰি ডঃ শইকীয়াই কয়, “গ্ৰন্থদান আন দানৰ সৈতে নিমিলে। যাক অগ্নিয়ে দাহ কৰিব নোৱাৰে, চোৰেও চুৰি কৰি নিব নোৱাৰে, তেনে জ্ঞান য’ত স্তূপীকৃত হৈ থাকে সেই গ্ৰন্থৰ দান কৰ্মৰ সৈতে যুক্ত হোৱাটো বৰ আদৰণীয় কথা।” সভাত মহাবিদ্যালয়ৰ প্ৰশাসনিক সমন্বয়ক প্ৰশান্ত শইকীয়া, শৈক্ষিক সমন্বয়ক অজিত কুমাৰ শইকীয়া, শিক্ষক গোটৰ সম্পাদক তুলসী ৰাজখোৱা, জ্যেষ্ঠ অধ্যাপক ডঃ ব্ৰজেন চন্দ্ৰ নেওগ, ডঃ ৰূপজ্যোতি বৰা, সুৰেন চন্দ্ৰ দাস, কাৰ্তিক নাথ, বসন্ত বৰা, ডঃ প্ৰফুল্ল বৰা, প্ৰণৱজ্যোতি বৰা, ডঃ অৰূপ বুঢ়াগোহাঁই, প্ৰীতিৰেখা গগৈ, প্ৰজ্ঞা পাৰমিতা কৌশিক, ডঃ শ্ৰুতি তালুকদাৰ, বিদিশা ভট্টাচাৰ্য, কৰ্মচাৰী গোটৰ সভাপতি পদ্মধৰ বৰুৱা, সম্পাদক উৎপল বৰুৱা, গ্ৰন্থাগাৰ সহায়ক দেৱজিৎ বৰুৱা, কৰ্মচাৰী নাৰায়ণ শইকীয়া, প্ৰণৱ হাজৰিকা, পল্লৱজ্যোতি ভূঞা, জয়ন্ত মাধৱ দত্ত, মংগলা পায়েং, জয়ন্ত হাজৰিকা, সৰোজিনী ভূঞা প্ৰমুখ্যে লোকসকল উপস্থিত থাকি দাতাৰ এনে মহান পদক্ষেপক বিশেষভাৱে প্ৰশংসা কৰে। সভাত প্ৰভাত বৰা বুঢ়াভকতে মাজুলীৰ প্ৰথমখন উচ্চ শিক্ষানুষ্ঠান মাজুলী মহাবিদ্যালয়ৰ উন্নয়নৰ প্ৰতিটো পদক্ষেপত তেওঁ পাৰ্যমানে সহায় কৰি যাব বুলি উল্লেখ কৰি মহাবিদ্যালয়খনিলৈ সাধ্যানুসাৰে এনে বৰঙণি যোগাই যাব বুলি ব্যক্ত কৰে।