মাজুলীত নিখিল ভাৰত কংগ্ৰেছ কমিটীৰ সম্পাদক বিকাশ উপাধ্যায়ৰ উপস্থিতিত জিলা কংগ্ৰেছৰ বৰ্দ্ধিত কাৰ্যনিৰ্বাহক সভা সম্পন্ন
বিকাশ শইকীয়া, মাজুলী,ৰঙিলী বাৰ্ত্তাসেৱা- গড়মূৰস্থিত মাধৱদেৱ কৃষ্টি সংঘত মাজুলী জিলা কংগ্ৰেছৰ সভাপতি কোষেশ্বৰ বৰাৰ সভাপতিত্বত জিলা কংগ্ৰেছৰ এখন বৰ্দ্ধিত কাৰ্যনিৰ্বাহক সভা অনুষ্ঠিত হয়। নিখিল ভাৰত কংগ্ৰেছ কমিটীৰ সম্পাদক তথা অসম প্ৰদেশ কংগ্ৰেছ কমিটিৰ সহ: তত্ত্বাৱধায়ক বিকাশ উপাধ্যায় মুখ্য অতিথি হিচাপে উপস্থিত থকা সভাখনিৰ আঁত ধৰে জিলা কংগ্ৰেছৰ সাধাৰণ সম্পাদক দিনমনি দত্তই। আগন্তুক পঞ্চায়ত নিৰ্বাচনৰ প্ৰতি লক্ষ্য ৰাখি অনুষ্ঠিত কৰা আজিৰ সাংগঠনিক সভাখনত আগন্তুক পঞ্চায়ত নিৰ্বাচনৰ প্ৰস্তুতিৰ ওপৰত সাংগঠনিক বক্তব্য আগবঢ়াই মাজুলী ব্লক কংগ্ৰেছৰ সভাপতি লক্ষ্য গায়ন আৰু উজনি মাজুলী ব্লক কংগ্ৰেছৰ সভাপতি মহেন্দ্ৰ শইকীয়াই। ইয়াৰ পিছতে মাজুলী জিলা মহিলা কংগ্ৰেছৰ সভানেত্ৰী কমলালক্ষী পগাগ, জিলা যুৱ কংগ্ৰেছৰ সভাপতি টিংকু পাটিৰ, সেৱাদলৰ জিলা সভাপতি জয়ন্ত মিলি আৰু এন.এছ.ইউ.আইৰ জিলা সভাপতি অমিয় পগাগে সাংগঠনিক দিশত গঠন মূলক বক্তব্য আগবঢ়াই। সভাত আগন্তুক পঞ্চায়ত নিৰ্বাচন আৰু সাংগঠনিক দিশত প্ৰাক্তন মন্ত্ৰী ৰাজীৱ লোচন পেগু, অসম প্ৰদেশ কংগ্ৰেছ কমিটিৰ সম্পাদক বিষ্ণুকমল পায়েং, অসম প্ৰদেশ কংগ্ৰেছ কমিটিৰ সম্পাদক তথা মাজুলী জিলা কংগ্ৰেছৰ তত্ত্বাৱধায়ক মেঘনাথ চেত্ৰী , অসম প্ৰদেশ কংগ্ৰেছ কমিটিৰ সাধাৰণ সম্পাদক তথা মাজুলী জিলা কংগ্ৰেছৰ নৱ নিযুক্ত তত্ত্বাৱধায়ক লক্ষীনাথ সন্দিকৈ আদিৰ লগতে মুখ্য অতিথি নিখিল ভাৰত কংগ্ৰেছ কমিটীৰ সম্পাদক তথা অসম প্ৰদেশ কংগ্ৰেছ কমিটীৰ সহ তত্ত্বাৱধায়ক বিকাশ উপাধ্যায়ে বক্তব্য আগবঢ়াই। তেখেত লোকে প্ৰধানকৈ বিজেপি ৰ মিথ্যাচাৰৰ লগতে জনবিৰোধী নীতি আৰু দুখীয়া জনতাক ভাতে মৰাৰ কামবোৰ ৰোধ কৰিবৰ বাবে আগন্তুক পঞ্চায়ত নিৰ্বাচনত দলীয় প্ৰাৰ্থীক জয়যুক্ত কৰাৰ উদ্দেশ্যে ভোটাৰক সততাৰ মাজেৰে কেনেকৈ মন জয় কৰিব, দলীয় প্ৰাৰ্থী কেনেদৰে নিৰ্বাচন কৰিব, প্ৰতি ঘৰ মানুহৰ ঘৰত প্ৰাৰ্থী সকল গৈ বিজেপিয়ে যে জনতাৰ মঙ্গলৰ পৰিবৰ্তে কেৱল নিজৰ লাভৰ অংকতহে কাম কৰিছে… এই কথাবোৰ ৰাইজক কেনেদৰে জনাব আদি বিষয়ৰ ওপৰত বক্তব্য আগবঢ়াই।
