মই কবিতা কেনেকৈ লিখিম
জেফলিন চুলতানা, নগাঁও
আপোনাৰ দুচকুত হিংসাৰ দাবানল
মই কবিতা কেনেকৈ লিখিম…!!
কাৰণ আপুনি হেনো মোৰ কাষত শক্তি হিচাপে নাই…!!
হাঃ হাঃ হাঃ… কি আচৰিত …!!
নহয়নে ?
আপুনি ভাবিছে…!!
আবেগ , অনুভূতি , শব্দ ধ্বনি , ভাষা
মোৰ চাগে ধাৰত ল’ব লাগিব
তেন্তে আপুনি ভুল ।
নদীয়ে যেনেদৰে অহৰহ বৈ যায়
কাৰো কথাত উঠা বহা নকৰে
ঠিক সেইদৰে মোৰো নিজস্বতা আছে , বাকস্বাধীনতা আছে
অভিজ্ঞতাৰ কোলাহলে…
মোৰ একো একোটা শব্দ ,ছন্দৰ লক্ষ্য ভেদ কৰিব..!!
আৰু আঁতৰাব আপোনাৰ অপমানৰ ধৃষ্টতা ।
মই সফলতাৰ বাট দেখা নাই
কিন্তু গোলাপ ছিঙিব গৈ কাঁইটৰ আঁচোৰৰ পৰা ৰক্ষা পালোঁ
সহায়ৰ নামত স্বাৰ্থপৰতাৰ পৰা ৰক্ষা পালোঁ ।
সোণৰ চেকুৰা বুটলিবলৈ গৈ
কপালৰ ঘাম মাটিত পেলাম
নৈৰ দৰে তৃষ্ণাত আতুৰ হম
পিছে মোৰ সেই তৃষ্ণা হ’ব বাংময় আঁক-বাঁক ।
মোৰ আঁক-বাঁকে মোৰেই
সঁহাৰিৰ কামনা কৰে
আৰু আপোনাৰ অলিক কল্পনাক অপমান কৰে
মই কবিতা কেনেকৈ লিখিম…!!