বৈষ্ণো দেৱী মন্দিৰ পথত ভয়াৱহ ভূমিস্খলনত ৩৬ তীর্থযাত্রী নিহত
ৰঙিলী বাৰ্ত্তাসেৱা- প্রাকৃতিক বিপৰ্যয়ৰ কবলত জম্মু-কাশ্মীৰ। ডাৱৰ বিস্ফোৰণ আৰু প্রলয়ংকৰী বানে কেন্দ্ৰীয়শাসিত অঞ্চলটোৰ জম্মু অঞ্চলত হাহাকাৰ পৰিৱেশৰ সৃষ্টি কৰিছে। প্রবল বৰষুণসৃষ্ট ভয়ংকৰ বানত বিধ্বস্ত হৈ পৰা জম্মু অঞ্চলত স্থানীয় প্রশাসন, আৰক্ষী, এনডিআৰএফ, এছডিআৰএফ, ভাৰতীয় সেনা আৰু স্থানীয় স্বেচ্ছাসেৱকে সাহায্য আৰু উদ্ধাৰ অভিযান চলাই আছে। এতিয়ালৈকে ৩,৫০০তকৈ অধিক লোকক ক্ষতিগ্ৰস্ত অঞ্চলৰ পৰা সুৰক্ষিত স্থানত আশ্রয় দিয়া হৈছে। ইপিনে শ্রীমাতা বৈষ্ণো দেৱী মন্দিৰৰ পথত ভয়াৱহ ভূমিস্খলনৰ ফলত প্ৰাণ হেৰুওৱা লোকৰ সংখ্যা ৩৬জনলৈ বৃদ্ধি পাইছে। বৈষ্ণো দেৱী যাত্ৰাত অংশ লোৱা তীর্থযাত্রীসকলে মন্দিৰৰ পথত বাহৰ পাতি থকা ভোজনালয় এটাত ভূমিস্খলন ঘটাত মঙলবাৰে ১০জনৰ মৃতদেহ উদ্ধাৰ কৰাৰ পাছত বুধবাৰে আন ২৬জনৰ মৃতদেহ উদ্ধাৰ কৰা হয়। ভূমিস্খলনৰ ফলত মাতা বৈষ্ণো দেৱী যাত্ৰাৰ তীৰ্থযাত্রী নিহত হৈছে। তথ্য মতে, ভূমিস্খলন আৰু প্রলয়ংকৰী বানৰ সংহাৰত উটি-ভাহি যোৱা বাসগৃহ আৰু দোকানৰ বহুকেইজন লোক এতিয়াও সন্ধানহীন হৈ আছে। বৈষ্ণো দেৱী যাত্রা বাতিল কৰা হৈছে। প্রাকৃতিক বিপৰ্যয়ৰ কবলত পৰা জম্মু অঞ্চলত ভাৰতীয় সেনাৰ ১৩টা গোট উদ্ধাৰ আৰু সাহায্য অভিযানত জড়িত হৈ আছে। জম্মু-কাশ্মীৰৰ উপ-ৰাজ্যপাল মনোজ সিন্হাই এই প্রাকৃতিক দুর্যোগত প্রাণ হেৰুওৱা প্ৰতিজন লোকৰ পৰিয়াললৈ ৯ লাখ টকাকৈ ক্ষতিপূৰণ হিচাপে আগবঢ়াইছে। ভূমিস্খলন আৰু বানৰ বাবে অঞ্চলটোৰ অধিকাংশ পথেই যাতায়াতৰ বাবে অনুপযোগী হৈছে। ৰে’ল সেৱাও বাতিল কৰা হৈছে। জম্মু-কাশ্মীৰৰ মুখ্যমন্ত্ৰী ওমৰ আব্দুল্লাৰ সৈতে টেলিফোনিক বাৰ্তালাপ কৰি প্ৰধানমন্ত্ৰী নৰেন্দ্ৰ মোদীয়ে সকলো সম্ভাব্য সহায়-সমর্থন কেন্দ্রই আগবঢ়াব বুলি আশ্বাস দিয়ে। প্রধানমন্ত্রী মোদীয়ে প্রাকৃতিক দুর্যোগত প্রাণ হেৰুওৱা লোকলৈ গভীৰ শোক প্ৰকাশ কৰি শোকসন্তপ্ত পৰিয়ালক সমবেদনা জ্ঞাপন কৰিছে।