বিশিষ্ট শিল্পী চৈয়দ ছাদুল্লাৰ দেহাৱসান
ৰঙিলী বাৰ্ত্তাসেৱা- ৰাজ্যৰ সাংস্কৃতিক ক্ষেত্ৰলৈ আন এক দুঃসংবাদ। ৰাজ্যৰ গ’ল্ডেন ভয়চৰ অধিকাৰী, যশস্বী সুৰকাৰ, কবি, অভিনেতা, ঘোষক, নাট্যকাৰ আৰু গীটাৰিষ্ট চৈয়দ ছাদুল্লাৰ দেহাৱসান । গুৱাহাটী মেডিকেল কলেজত চিকিৎসাধীন অৱস্থাতে চৈয়দ ছাদুল্লাৰ মৃত্যু হয়। অসমৰ সাংস্কৃতিক জগতৰ এগৰাকী যশস্বী শিল্পী চৈয়দ ছাদুল্লা অতি সংকটজনক অৱস্থাত গুৱাহাটী চিকিৎসা মহাবিদ্যালয়ত কিছু দিন ধৰি চিকিৎসাধীন হৈ আছিল। মৃত্যুৰ সময়ত তেওঁৰ বয়স আছিল ৭৭ বছৰ। মৃত্যুৰ সময়ত মহান শিল্পীগৰাকীয়ে পত্নীৰ স’তে দুই জীয়ৰী আৰু বহুত আত্মীয়-স্বজন, শুভাকাংক্ষী আৰু গুণমুগ্ধক ইহসংসাৰত এৰি থৈ যায়। যোৱা চাৰি দশক ধৰি চৈয়দ ছাদুল্লাৰ বলিষ্ঠ কণ্ঠই আকাশবাণীৰ সকলো শ্ৰোতাক মন্ত্রমুগ্ধ কৰি ৰাখিছিল। পাহাৰ, ভৈয়াম সকলোতেই চৈয়দ ছাদুল্লাৰ গীতৰ-সুৰৰ গুঞ্জন। ছাদুল্লাৰ ৪৩ বছৰীয়া সাংস্কৃতিক যাত্রাত ডিব্ৰুগড় আকাশবাণীৰ কাৰ্যকালত বর্ণালী, ডাক-পখিলী আৰু হেল্ল’ মন্দাকিনী আদি অতি জনপ্রিয় ৰেডিঅ’ অনুষ্ঠান প্রযোজনা আৰু উপস্থাপন কৰিছিল, যিটো আছিল ফোন ইন অনুষ্ঠান। প্রয়াত ছাদুল্লাই সদায় নিজৰ শ্ৰোতাসকলৰ সৈতে কেৱল ষ্টুডিঅ’ৰ মাইক্ৰ’ফোনৰ জৰিয়তেই নহয়, দূৰৱৰ্তী প্রান্তীয় অঞ্চললৈ ঘূৰি ফুৰি তেওঁলোকৰ মতামত, পৰামৰ্শ আৰু তেওঁলোকৰ সমস্যাসমূহো মত বিনিময়ৰ জৰিয়তে ৰেকর্ডিং কৰি ব্যক্তিগতভাৱে লগ পোৱাটো পছন্দ কৰিছিল। ১৯৬৫ চনত ডি ব্ৰুগড়ৰ ডি এইচ এছকে কলেজৰ ছাত্ৰ হৈ থাকোঁতে তেওঁ অসমৰ জনপ্ৰিয় ৰক বেণ্ডদ্য কুইভাৰ্ছৰ মুখ্য গীটাৰিষ্টো আছিল। সম্প্ৰচাৰক হোৱাটো তেওঁৰ শৈশৱৰ এক সপোন আছিল আৰু সেয়া বাস্তৱলৈ পৰিণত হৈছিল যেতিয়া তেওঁ ১৯৭১ চনত আকাশবাণীত ঘোষক হিচাপে ডিব্ৰুগড়ত প্রায় পাঁচ বছৰ ধৰি আন্তৰিকতাৰে সেৱা আগবঢ়াইছিল। সংগীতৰ প্রতি থকা আকৰ্ষণ আৰু ৰেডিঅ’ৰ প্ৰতি থকা প্ৰেমৰ বাবেই তেওঁ অসম আৰক্ষীয়ে আগবঢ়োৱা আৰক্ষী বিষয়াৰ চাকৰি ত্যাগ কৰি ডিব্ৰুগড় আকাশবাণীত ষ্টাফ শিল্পী হিচাপে ১৯৭৫ চনত যোগদান কৰে। ডিব্ৰুগড়ৰ নালিয়াপুলৰ এম আৰ ৰোডৰ স্থায়ী নিৱাসী তথা আৰফান উল্লাহ আৰু আনোৱাৰা বেগমৰ সন্তান চৈয়দ ছাদুল্লা ১৯৪৮ চনৰ ১ ফেব্ৰুৱাৰীত জন্মগ্ৰহণ কৰি শৈশৱৰে পৰা সাংস্কৃতিক জগতত ভৰি দিছিল। এগৰাকী সংগীত সুৰকাৰ, সংগীতজ্ঞ, কণ্ঠশিল্পী, বাতৰি পাঠক, নাট্যকাৰ, প্ৰযোজক, অভিনয়, মঞ্চ এংকৰ আৰু চিত্ৰনাট্য লেখক হিচাপে ৪৩ বছৰীয়া এক বর্ণিল কর্মজীৱনে সাংস্কৃতিক জগতক উজলাই গৈছে। তেওঁ আকাশবাণী ডিব্ৰুগড় কেন্দ্ৰৰ প্ৰথমগৰাকী বাতৰি পঢ়োতা আছিল। তেওঁ দূৰদৰ্শন, নেচনেল জিঅ’গ্রাফিক চেনেল আৰু ডিছক ‘ভাৰী চেনেলৰ সৰ্বমুঠ ১০০খনতকৈ অধিক ডকুমেণ্টৰীৰ ঘোষক আছিল। আকাশবাণী ডি ব্ৰুগড় কেন্দ্ৰৰ এসময়ৰ প্ৰতি দেওবাৰে সন্ধিয়া চাৰে সাতটা বজাত পোন্ধৰ মিনিটৰ বাবে প্ৰচাৰিত মনোৰঞ্জনধর্মী অনুষ্ঠান ‘বৰ্ণালী’ অনুষ্ঠানৰ সঞ্চালক আছিল। শিৱসাগৰ জিলা সাহিত্য সভাই আগবঢ়োৱা জিকিৰ শিল্পী কেৰিমুদ্দিন আহমেদ সোঁৱৰণী শিল্পী বঁটা ২০২৫ বৰ্ষৰ বাবে চৈয়দ ছাদুল্লাক প্রদান কৰিছিল।তেওঁৰ মৃত্যুই ৰাজ্যৰ সাংস্কৃতিক জগতত শোকৰ ছাঁ পেলাইছে।