পৱন খেৰাৰ অধ্যক্ষতাত অসম প্ৰদেশ কংগ্ৰেছৰ ‘সংবাদ মাধ্যম আৰু যোগাযোগ বিভাগ’ৰ গুৰুত্বপূৰ্ণ পৰ্যালোচনা বৈঠক সম্পন্ন
ৰঙিলী বাৰ্ত্তাসেৱা- অসম প্ৰদেশ কংগ্ৰেছৰ সংবাদ মাধ্যম আৰু যোগাযোগ বিভাগৰ এখন গুৰুত্বপূৰ্ণ পৰ্যালোচনা বৈঠক গুৱাহাটীৰ মানৱেন্দ্ৰ শৰ্মা কমপ্লেক্সত অনুষ্ঠিত হয়। ভাৰতীয় জাতীয় কংগ্ৰেছৰ সংবাদ মাধ্যম আৰু যোগাযোগ বিভাগৰ অধ্যক্ষ পৱন খেৰাৰ অধ্যক্ষতাত অনুষ্ঠিত বৈঠকখনত নিখিল ভাৰত কংগ্ৰেছৰ সংবাদ মাধ্যম বিভাগৰ অসমৰ তত্বাৱধায়ক চৰণ সিং চাপ্ৰা, অসম প্ৰদেশ কংগ্ৰেছ কমিটিৰ সভাপতি তথা সাংসদ গৌৰৱ গগৈ, প্ৰাক্তন সাংসদ আব্দুল খালেক, প্ৰদেশ কংগ্ৰেছৰ সাধাৰণ সম্পাদক প্ৰদ্যুৎ ভূঞাকে প্ৰমুখ্য কৰি জিলা অধ্যক্ষসকল, জ্যেষ্ঠ মুখপাত্ৰ, মুখপাত্ৰ, মিডিয়া পেনেলিষ্টসকল উপস্থিত থাকে। ২০২৬ চনৰ বিধানসভা নিৰ্বাচনৰ প্ৰস্তুতিৰ বাবে সংবাদ মাধ্যম আৰু যোগাযোগ বিভাগে কেনেধৰণে তৎপৰতা আগবঢ়াব সেই বিষয়ে সভাত বিস্তৃত আলোচনা কৰা হয়। হিমন্ত বিশ্ব শৰ্মাৰ নেতৃত্বৰ বিজেপি চৰকাৰখনৰ অসত্য আৰু আভুৱা ভৰা কাম-কাজৰ বিৰুদ্ধে ৰাইজক সজাগ কৰি প্ৰশ্ন উত্থাপন কৰিবৰ বাবে কংগ্ৰেছ নেতা পৱন খেৰাই অসমৰ কংগ্ৰেছৰ সংবাদ মাধ্যম বিভাগ আৰু যোগাযোগ বিভাগৰ নেতা-কৰ্মীসকলক আহ্বান জনায়। গণতান্ত্ৰিক অধিকাৰ সুৰক্ষাৰ হকে মাত মতাৰ লগতে দেশৰ সংবিধানৰ সুৰক্ষাৰ বাবে সকলোৱে কাম কৰি যোৱা উচিত বুলি খেৰাই মন্তব্য কৰে। আনহাতে, অসম প্ৰদেশ কংগ্ৰেছৰ কমিটিৰ সভাপতি গৌৰৱ গগৈয়ে সত্যৰ সন্ধানত যুঁজ দি যাবলৈ সকলো কংগ্ৰেছ কৰ্মীক আহ্বান জনায়। সাংসদ গগৈয়ে নিষ্ঠা আৰু আদৰ্শৰে কাম কৰিলে সকলোৱে সফলতা লাভ কৰিব পাৰে বুলি উল্লেখ কৰি নিজে এজন ৰাষ্ট্ৰীয় পৰ্যায়ৰ মিডিয়া পেনেলিষ্ট হিচাপে কেনেকৈ ৰাজনীতিত প্ৰৱেশ কৰিছিল আৰু উত্থান হৈছিল সেই কথা উল্লেখ কৰি কংগ্ৰেছৰ মুখপাত্ৰসকলক উৎসাহিত কৰে। পৰ্যালোচনা বৈঠকত অংশগ্ৰহণ কৰি ভাৰতীয় জাতীয় কংগ্ৰেছৰ সংবাদ মাধ্যম বিভাগৰ অসমৰ দায়িত্বত থকা চৰণ সিং চাপ্ৰাই দেশ আৰু জাতিৰ স্বাৰ্থত সকলোধৰণৰ প্ৰত্যাহ্বান নেওচি কাম কৰিবৰ বাবে প্ৰদেশ কংগ্ৰেছৰ সংবাদ মাধ্যম বিভাগৰ কৰ্মীসকলক আহ্বান জনায়। জিলা আৰু আঞ্চলিক পৰ্যায়লৈকে কংগ্ৰেছৰ নীতি-আদৰ্শৰ বাৰ্তা লৈ যোৱাতো প্ৰতিগৰাকী কংগ্ৰেছ কৰ্মীৰে দায়িত্ব বুলিও তেওঁ বক্তব্য দাঙি ধৰে। বৈঠকত প্ৰদেশ কংগ্ৰেছৰ সংবাদ মাধ্যম বিভাগৰ অধ্যক্ষ বেদব্ৰত বৰা, জ্যেষ্ঠ মুখপাত্ৰ, প্ৰাক্তন বিধায়ক মোহন বসুমতাৰী, সত্যব্ৰত কলিতা, বিনন্দ শইকীয়া, জ্যেষ্ঠ মুখপাত্ৰ গোপাল শৰ্মা, ঋতুপৰ্ণ কোৱঁৰ, ৰাতুল কলিতা, ৰূপক দাস, মনালিছা হাজৰিকা, বৰ্ণালী ফুকন, হেপ্পী গগৈ, ৰূপা কলিতা, জেহেৰুল ইছলামকে বিভাগটোৰ প্ৰায়সকল বিষয়ববীয়া আৰু সদস্য উপস্থিত থাকে।