প্ৰয়াত উপাসা ফুকনৰ খাৰঘূলীস্থিত বাসগৃহত শোকসন্তপ্ত পৰিয়ালবৰ্গক সাক্ষাৎ সাংসদ গৌৰৱ গগৈৰ
ৰঙিলী বাৰ্ত্তাসেৱা- অসমৰ প্ৰাক্তন গৃহমন্ত্ৰী তথা অসম আন্দোলনৰ অন্যতম নেতা প্ৰয়াত ভৃগু কুমাৰ ফুকনৰ একমাত্ৰ জীয়াৰী উপাসা ফুকনৰ যোৱাকালি আকস্মিক আৰু ৰহস্যজনক মৃত্যুত গভীৰ শোক প্ৰকাশ কৰিছে সাংসদ গৌৰৱ গগৈয়ে । অতিশয় বেদনাদায়ক এই দুৰ্ঘটনাৰ খবৰ লাভ কৰি যোৰহাটৰ সাংসদ গৌৰৱ গগৈয়ে প্ৰয়াত উপাসা ফুকনৰ খাৰঘূলীস্হ বাসগৃহত গৈ তেওঁৰ শোকসন্তপ্ত মাতৃ আৰু পৰিয়ালৰ অন্যান্য সকলক সাক্ষাৎ কৰে।উক্ত সাক্ষাৎকালত শ্ৰীমতী ফুকনৰ একমাত্ৰ কন্যাক হেৰুওৱাই গভীৰ শোক সাগৰত ডুব গৈ থকাৰ মাজতো অতি আবেগিকভাবে সাংসদ গগৈক অৱগত কৰে যে – কেনেকৈ তেওঁৰ প্ৰয়াত স্বামীৰ স্মৃতি ৰক্ষা কৰিবৰ বাবে প্ৰয়াস কৰি আহিছে আৰু অনাগত দিনত তেখেতৰ ত্যাগ আৰু অৱদানক কেনেকৈ নতুন প্ৰজন্মই জানিব পাৰিব সেইবিষয়ৰ পৰিকল্পনা। কন্যা জীয়াই থাকোতে দুয়োগৰাকীয়ে একেলগে চেষ্টা কৰিছিলো আৰু এতিয়া অকলেই শুভাকাংক্ষীৰ সৈতে আগবঢ়াই নিব লাগিব। সাংসদ গগৈয়ে তেওঁৰ এনে পৰিকল্পনাৰ শলাগ লয় আৰু এনে পৰিকল্পনা বাস্তবায়িত কৰিবলৈ প্ৰয়োজন অনুসৰি তেওঁ সহায়ৰ হাত আগবঢ়োৱাৰ প্ৰতিশ্ৰুতি প্ৰদান কৰে।সাংসদ গগৈৰ উপস্হিতিত শ্ৰীমতী ফুকনে পুৰণি স্মৃতি ৰোমন্হন কৰি কয় যে – তোমাৰ দেউতা প্ৰাক্তন মুখ্যমন্ত্ৰী প্ৰয়াত তৰুণ গগৈয়ে আমাৰ ঘৰলৈ প্ৰয়াত চিলভিয়াচ কন্দপান আৰু প্ৰয়াত শৰৎ বৰকটকীৰ সৈতে সৌহাদ্যমূলক সাক্ষাৎ কৰিবলৈ আহিছিল। মোৰ স্বামীৰ মৃত্যুৰ খবৰ ল’বলৈও আহিছিল। আদৰ্শগত পাৰ্থক্য থাকিলেও তেওঁলোকে অসমৰ জাতীয়তাবাদ,শান্তিৰ পৰিবেশ আৰু উন্নয়নৰ বিষয়ে কথা পাতিছিল।