পৃথিৱীৰ অসুখ – নাছিৰ আহমেদ

যোৱা কেইবাদিনৰ পৰাই

পৃথিৱীৰ খুৱ অসুখ ;

সৰ্ব্ব শৰীৰত প্ৰচণ্ড উত্তাপ  ;

42 ডিগ্ৰী চেলচিয়াছৰ ঘৰ স্পৰ্শ কৰিলেই ।

দুৰাৰোগ্য ব্যাধিত আক্ৰান্ত হৈ যৌৱন-প্ৰাপ্ত
পৃথিৱীৰ দেহ ভাঙি-চিঙি তচনচ হৈ গৈছে  ;

এতিয়া অৱশিষ্ট আছে মাথো অস্থিসাৰ অৱয়ব !

যোৱা বছৰেও পৃথিৱী ঋতুমতী আছিল

দেহৰ শিৰা-উপ-শিৰাৱেদি প্ৰৱাহিত হৈছিল

স্ৰোতস্বিনী,চিৰ প্ৰৱাহিনী গঙ্গা-যমুনা আৰু লুইত,

বিশাল বুকুত গজি উঠিছিল সেউজ পৰ্বত মালা,

চৰাই-চিৰিকটিৰ সাঙ্গীতিক মূৰ্চ্ছনাত
পৃথিৱী ৰজনজনাই গৈছিল  ;

ডেকা-গাভৰুৰ প্ৰাণত যৌৱন উথলি উথলি উঠিছিল !

এতিয়া , সকলো সপোন সপোন লাগে।

পৃথিৱীয়ে হেৰুৱাইছে ৰূপ-ৰস-ৰং-সৌন্দৰ্য্য

একেবাৰে হৈ পৰিছে নিঃস্ব,সৰ্ব্বস্বান্ত !

হয়তো যি কোনো মুহূৰ্ততে পৃথিৱী

কবৰৰ এন্ধাৰ গহ্বৰত বা

শ্মশানৰ চিতাত উঠি  চিৰদিনৰ বাবে হেৰাই যাব !

পৃথিৱীৰ যে খুৱেই অসুখ !!

যোৱা বছৰো পৃথিৱী ঋতুমতী আছিল!!