নিচাযুক্ত ঔষধৰ ব্যৱহাৰ প্ৰতিৰোধ: দৰং জিলালৈ ৰাষ্ট্ৰীয় স্বীকৃতি
মঙলদৈ,ৰঙিলী বাৰ্ত্তাসেৱা- ল’ৰা-ছোৱালীৰ মাজত নিচাযুক্ত ঔষধ আৰু ৰাগিয়াল সামগ্ৰীৰ ব্যৱহাৰ প্ৰতিৰোধ আৰু এইবোৰৰ অবৈধ সৰাবৰাহ ৰোধৰ ক্ষেত্ৰত লাভ কৰা সফলতাৰ বাবে দৰং জিলাই ৰাষ্ট্ৰীয় পৰ্যায়ত শ্ৰেষ্ঠত্ব প্ৰদৰ্শনকাৰী জিলাৰ সন্মান লাভ কৰিছে। ৩০ জুনত নতুন দিল্লীৰ বিজ্ঞান ভৱনত ৰাষ্ট্ৰীয় শিশু অধিকাৰ সুৰক্ষা আয়োগে নাৰ্কোটিকচ্ কন্ট্ৰোল ব্যুৰোৰ সহযোগত আয়োজন কৰা এক অনুষ্ঠানত দৰঙৰ জিলা আয়ুক্ত মুনীন্দ্ৰ নাথ ঙাটেয়ে কেন্দ্ৰীয় গৃহ ৰাজ্য মন্ত্ৰী নিত্যানন্দ ৰাইৰ পৰা এই সফলতাৰ বাবে প্ৰশস্তি পত্ৰ গ্ৰহণ কৰে। অনুষ্ঠানত এই সন্মান লাভ কৰা দৰং অসমৰ একমাত্ৰ জিলা। এই সন্মান গ্ৰহণ কৰি দৰঙৰ জিলা আয়ুক্ত মুনীন্দ্ৰ নাথ ঙাটেয়ে কয় যে,”দৰং জিলাত নিচাযুক্ত ঔষধ আৰু ৰাগিয়াল সামগ্ৰীৰ ব্যৱহাৰ প্ৰতিৰোধ আৰু এইবোৰৰ অবৈধ সৰাবৰাহ ৰোধৰ বাবে আমাৰ প্ৰচেষ্টা অব্যাহত আছে। উক্ত সন্মান লাভ কৰি আমি আনন্দিত হৈছোঁ। দৰং জিলাই লাভ কৰা এই স্বীকৃতিয়ে অধিক আন্তৰিকতা আৰু দায়বদ্ধতাৰে এই ক্ষেত্ৰত কাম কৰি যাবলৈ আমাক অনুপ্ৰেৰণা যোগাব”। উল্লেখ্য যে ৰাষ্ট্ৰীয় শিশু অধিকাৰ সুৰক্ষা আয়োগে নাৰ্কোটিকচ্ কন্ট্ৰোল ব্যুৰোৰ সৈতে ল’ৰা -ছোৱালীৰ মাজত নিচাযুক্ত ঔষধ আৰু ৰাগিয়াল সামগ্ৰীৰ ব্যৱহাৰ প্ৰতিৰোধ আৰু এইবোৰৰ অবৈধ সৰাবৰাহ ৰোধৰ বাবে যুটীয়াভাবে প্ৰস্তুত কৰা কৰ্মসূচী ২০২১ চনৰ ফেব্ৰুৱাৰী মাহত প্ৰকাশ কৰিছিল। সমগ্ৰ দেশজুৰি বিদ্যালয়-শিক্ষানুষ্ঠানসমূহৰ চৌহদৰ সমীপত নিচাযুক্ত সামগ্ৰীৰ বিক্ৰী ৰোধ কৰাৰ লগতে ল’ৰা-ছোৱালীক নিচাযুক্ত সামগ্ৰীৰ গ্ৰাসৰ পৰা ৰক্ষা কৰাৰ বাবে ‘নিচাৰ বিৰুদ্ধে এক যুদ্ধ’ শীৰ্ষক এই কাৰ্যসূচী প্ৰস্তুত কৰা হৈছিল। এই যুটীয়া কৰ্মসূচী ৰূপায়নৰ নিৰীক্ষণৰ বাবে জিলা দণ্ডাধীশ/জিলা আয়ুক্ত সকলক দায়িত্ব দিয়া হৈছিল। নিচাযুক্ত ঔষধৰ ব্যৱহাৰ আৰু অবৈধ সৰাবৰাহ বিৰোধী আন্তঃৰাষ্ট্ৰীয় দিৱসৰ সৈতে সংগতি ৰাখি নতুন দিল্লীৰ বিজ্ঞান ভৱনত ৰাষ্ট্ৰীয় শিশু অধিকাৰ সুৰক্ষা আয়োগে নাৰ্কোটিকচ্ কন্ট্ৰোল ব্যুৰোৰ সহযোগত আয়োজন কৰা অনুষ্ঠানত এই কৰ্মসূচী ৰূপায়নত শ্ৰেষ্ঠত্ব প্ৰদৰ্শন কৰা দেশৰ কেইবাখনো জিলাক ‘শ্ৰেষ্ঠত্ব প্ৰদৰ্শনকাৰী জিলা’ হিচাপে নিৰ্বাচিত কৰি প্ৰশস্তি পত্ৰ প্ৰদান কৰা হয় । ইয়াৰ মাজত দৰং জিলাও আছে। দৰঙৰ জিলা আয়ুক্তই বিজ্ঞান ভৱনত জিলাখনৰ এই সফলতাৰ বাবে প্ৰশস্তি পত্ৰ গ্ৰহণ কৰে।